සය වසරකට ඉහත දී වැලිකඩ බන්ධනාගාරය තුල සිරකරුවන් ඝාතනය කිරිමට අනුබල දුන් හෝ නියෝග කරන ලද අයවලුන් සම්බන්ධව විමර්ශණ සිදු කරන ලෙසට අධිකරණය නියෝග කර තිබේ.
සිද්ධිය සම්බන්ධ දැනට අත්අඩංගුවේ පසු වන සැකකරුවන් හැර වෙනත් අයෙකු හෝ පිරිසක් එම ස්ථානයේ හෝ වෙන යම් ස්ථානයක සිට මෙම ඝාතනයට අනුබල ලබා දී ඇති නම් එය ද වරදක් බවයි කොළඹ අතිරේක මහේස්ත්‍රාත් රංග දිසානායක පවසා ඇත්තේ.
මෙම වෙඩි තැබීම සිදුකල පිරිසට අනවසරයෙන් බන්ධනාගාරය තුලට ඇතුල් වීමට අවසර ලබා දුන් හෝ අපරාධය සිදු කිරීමට කුමන්ත්‍රණය කල තවත් පුද්ගලයන් සිටී නම් ඔවුන්ද මෙම නඩුවේ සැකකරුවන් ලෙස වහාම ඉදිරිපත් කරන ලෙස රංග දිසානායක අපරාධ පරික්ෂණ දෙපාර්තමේන්තු නිළධාරින්ට නියෝග කල බව අගතියට පත් පාර්ශවය වෙනුවෙන් පෙනී සිටින නීතිඥ සේනක පෙරේරා සිලෝන් නිවුස් හා කියා සිටියේය.
අපරාධයක් බව පැහැදිලි
හිසට සහ පපු ප්‍රදේශවලට වෙඩි ප්‍රහාර එල්ලවීම හේතුවෙන් මෙම ඝාතන සිදුව ඇතැයි අදාළ රැඳවියන් 27 දෙනාගේ මරණ පරික්ෂණ වාර්තා අනුව නිරීක්ෂණය වන බව පවසා ඇති මහේස්ත්‍රාත්වරයා මෙය සැබවින්ම අපරාධයක් බවට ප්‍රකාශ කල බවයි නීතිඥ සේනක පෙරේරා පවසන්නේ.
මේ අතර මෙම සිද්ධියට අදාළව අත්අඩංගුවට ගෙන සිටින හිටපු බන්ධනාගාර කොමසාරිස් එමිල් රංජන් ළමාහේවා සහ පොලිස් මත්ද්‍රව්‍ය නාශක කාර්යංශයේ පොලිස් පරික්ෂක නියෝමාල් රංගජීව පිළබඳව වු මානසික සෞඛ්‍ය පිළිබද වාර්තා නඩුව කැඳවු 24 අඟහරුවාදා අධිකරණයට ඉදිරිපත් කර ඇති අතර එම වාර්තාවන්ට අනුව ඔවුන් හට මානසික ආතතියක් නොමැති බවට තහවුරු වු බවයි නීතිඥවරයා කියා සිටියේ.
දැනට සිද්ධිය සම්බන්ධව අත්අඩංගුවට ගෙන බන්ධනාගාර ගත කර ඇති හිටපු බන්ධනාගාර කොමසාරිස් එමිල් රංජන් ළමාහේවා සහ පොලිස් මත්ද්‍රව්‍ය නාශක කාර්යංශයේ පොලිස් පරික්ෂක නියෝමාල් රංගජීව ලබන මස 8 වනදා තෙක් යලි රක්ෂිත බන්ධනාගාර ගත කිරිමට ද අධිකරණය වැඩි දුරටත් නියෝග කළේය.
Facebook Comments
