වසංගතයට මුවාවී පොදු දේපල විකිණීමට එරෙහිව පෙළගැස්මක්

රට තුළ මතු වී තිබෙන වසංගත තත්වය ප‍්‍රයෝජනයට ගනිමින් ආණ්ඩුව විසින් ප‍්‍රජාතන්ත‍්‍ර විරෝධීව අතිශය වටිනාකමකින් යුතු රටේ මහජනතාවට අයිති පොදු දේපල අපහරණයට ලක්කරමින් විකුණා දැමීමට කටයුතු කරමින් සිටින බවට චෝදනා එල්ල වී තිබේ.

ආණ්ඩුවේ එම තීරණයට එරෙහිව සියලූ බලවේග පෙළ ගැස්වීමට අපේක්‍ෂා කරන බවයි පොදු දේපල හා මානව හිමිකම් සුරැකීමේ මධ්‍යස්ථානය පවසන්නේ.

එම මධ්‍යස්ථානයේ සම කැදවුම්කරුවන් වන රන්ජන් සේනානායක හා සිල්වෙස්ටර් ජයකොඩිගේ අත්සනින් යුතුව ජුලි 7 සදුදා නිකුත් කළ මාධ්‍ය නිවේදනයක් මගින් පෙන්වා දෙන්නේ දැනට විදේශිකයන්ට විකුණා ඇති රාජ්‍ය දේපල නැවත රජයට පවරා ගැනීමට කටයුතු කරන බවට ප‍්‍රතිඥා දෙමින් බලයට පැමිණි වත්මන් ආණ්ඩුවද මුදල් අමාත්‍යාංශය යටතේ සෙලන්දිවා නැමැති ආයතනයක් ගොඩනඟා එම ආයතනය යටතට කොළඹ කොටුවේ පිහිටි ඓතිහාසික මෙන්ම පුරාවිද්‍යාත්මක අති විශාල වටිනාකමක් සහිත ගොඩනැගිලි රාශියක් පවරා ගැනීමට පසුගියදා කැබිනට් මණ්ඩල රැස්වීමකදී තීරණය කර ඇති බවයි.

පසුගිය මැයි මාසයේ 17 දින අමාත්‍ය මණ්ඩලය විසින් තීරණය කර ඇත්තේ 2020 මාර්තු මස 4 වැනිදා කැබිනට් මණ්ඩලය විසින් දෙන ලද අනුමැතිය පරිදි භාණ්ඩාගාරයට 100% හිමිකාරත්වය සහිතව සෙලෙන්දිව ආයෝජන සමාගම ස්ථාපිත කරන බවයි.

“සෙලෙන්දිව ආයෝජන සමාගම විසින් රජය සතුව පවතින හඳුනාගත් ආයතන සහ ආයෝජනයන් සඳහා පහසුකම් සැලසීම පිණිස පුද්ගලික-රාජ්‍ය හවුල්කාරිත්ව පදනම යටතේ ආයෝජන පහසුකම් සැපයීමේ ආකෘතියක් සැලසුම් කර ඇති අතර, ඒ යටතේ ‘කොළඹ කොටුව Heritage Square’, ‘නිශ්චල දේපළ සංවර්ධන’ සහ ‘රජයට අයත් සත්කාරක අංශය’ වශයෙන් ආයෝජන කළඹ තුනක් (03) ක්‍රියාත්මක කිරීමට හඳුනාගෙන ඇත,” යි රජය විසින් ප්‍රකාශයට පත් කර ඇති 2021 මැයි 17 අමාත්‍ය මණ්ඩල තීරණවල දැක්වේ.

අක්කර 42 ක පිහිටා ඇති වැලිකඩ බන්ධනාගාර සංකීර්ණය ද නාගරික සංවර්ධන අධිකාරිය හරහා දේශීය හා විදේශීය ආයෝජකයන්ට බදු දීමට රජය තීරණය කර ඇත්තේ එදින කැබිනට් මණ්ඩල රැස්වීමේදීය.

සෙලන්දිවා නැමැති ආයතනය යටතේ පෞද්ගලික රාජ්‍ය හවුල්කාරිත්ව හරහා ( PPP) ක‍්‍රියාමාර්ගයන් ගනිමින් සිටින අතර, ඒ සඳහා සෙලෙන්දිව හෝල්ඩින්ග්ස් SPV (Special Purpose Vehicle) නමින් උප සමාගමක් හඳුන්වා දී ඇත.

පොදු දේපල හා මානව හිමිකම් සුරැකීමේ මධ්‍යස්ථානය පෙන්වා දෙන පරිදි සෙලෙන්දිව හෝල්ඩින්ග්ස් SPV (Special Purpose Vehicle)යටතේ පවරා ගැනෙන ආයතන පහත පරිදිය.

1. කොළඹ කොටුව හෙරිටේජ් ස්ක්වෙයාර් යටතේ පවරා ගැනෙන දේපල

i. ග‍්‍රෑන්ඞ් ඔරියන්ටල් හෝටලය (98% ක් BOC අයිතිය) සහිත යෝර්ක් වීදිය ගොඩනැගිල්ල (ලංකා බැංකු මහ ගෙදර – BOC පූර්ණ අයිතිය) – අක්කර 1.57 ක භූමි ප‍්‍රමාණය

ii.ගෆූර් ගොඩනැගිල්ල – අක්කර 0.57

iii.විදේශ කටයුතු අමාත්‍යාංශ ගොඩනැගිල්ල – අක්කර 1.5

iV.මහ තැපැල් කාර්යාල ගොඩනැගිල්ල – අක්කර 0.81

2. නිශ්චල දේපල සංවර්ධන පහසුකම් සැලසීම යටතේ පවරා ගැනෙන දේපල

i. සී නෝර් අවන්හල – අක්කර 1.37

ii.වෝටර්ස්එජ් විශ්ව සංවර්ධන ව්‍යාපෘතිය

iii.යාපනය කන්කසන්තුරේ පිහිටි ජාත්‍යන්තර සම්බන්ධීකරණ මධ්‍යස්ථානය

3. රජයට අයත් සත්කාරක අංශය ලෙස හඳුන්වමින් පවරා ගැනෙන දේපල

i.Hilton Colombo & Sports Centre
ii.Grand Hyatt Colombo Hotel

මෙසේ පෞද්ගලික, රාජ්‍ය හවුල්කාරිත්වය ආර්ථික සංකල්පය යටතේ ක‍්‍රියාත්මක කිරීම තුළින් රාජ්‍ය දේපල වක‍්‍රාකාරයෙන් පෞද්ගලිකකරණයට ලක්කොට ඇති බවයි පොදු දේපල හා මානව හිමිකම් සුරැකීමේ මධ්‍යස්ථානය පවසන්නේ.

මෙහිදී රටට අහිමි වන්නේ භූමිය හා ගොඩනැගිලි පමණක් නොවන අතර, පෞරාණික හා සංස්කෘතික අනන්‍යතාවයක් සහිත ලාංකික අනන්‍යතාවය ද අහිමි වන බව එම මධ්‍යස්ථානය පෙන්වා දෙයි.

“මෙහිදී 1955 අගෝස්තු මස 01 වන දින ලංකා බැංකුව විසින් මිලදී ගනු ලැබූ යෝර්ක් වීදිය ගොඩනැගිල්ල වසර 30 කට අධික කාලයක් ලංකා බැංකුවේ ප‍්‍රධාන කාර්යාලය ලෙස භාවිතා කරන ලද ගොඩනැගිල්ලයි. පෞරාණික හා සංස්කෘතිමය වටිනාකමින් අනූන මෙම ගොඩනැගිල්ල ලංකා බැංකුව අයත්ව ඇති පුරාවිද්‍යාත්මක වටිනාකමක්ද සහිත සමස්ත ජාතියේම අභිමානය විදහා දක්වන සංකේතයකි.”

පොදු දේපල හා මානව හිමිකම් සුරැකීමේ මධ්‍යස්ථානය පවසන්නේ සෙලන්දිවා ආයතනයේ හිමිකාරිත්වයෙන් 34% ක් ආයෝජකයන් සඳහා විවෘත වන අතර, සෙල්න්දිවා ආයතනය විසින් පිහිටුවන උප සමාගම් පූර්ණ පෞද්ගලික ව්‍යාපාර වන බැවින්, රාජ්‍ය විගණනයෙන් හා කෝප් කමිටුවට ඇති වගකීමෙන් නිදහස් වන බවයි.

“මෙම ක‍්‍රමයද රාජ්‍ය දේපලවල ක්ෂාරය උරාබිම සඳහා ගොඩනගන ලද උපායශීලී සැලැස්මක් බව ඉතා පැහැදිලිය. එමෙන්ම කොළඹ කොටස් වෙළඳපොලෙහි ලැයිස්තුගත සමාගමක් බවට Selendiva Leisure සමාගම මෙම මසදී කොළඹ කොටස් හුවමාරු වෙළඳපළෙහි ලියාපදිංචියට සුදානම් වන බවටද තොරතුරුද ලැබී ඇත.”

ලංකා බැංකු සේවක සංගමය ඇතුළු ස්වාධීන වෘත්තීය සමිති රාශියක් එක්ව පිහිටුවාගෙන ඇති පොදු දේපල හා මානව හිමිකම් සුරැකීමේ සංවිධානය මාධ්‍ය නිවේදනය මගින් වැඩි දුරටත් අවධාරණය කරන්නේ මෙම අපරාධයට එරෙහිව කටයුතු කිරීමට තීරණය කර ඇති බවයි.

“ඊට අමතරව විවිධ වෘත්තිකයින්ගෙන් සැදුම්ලත් වෘත්තිකයින්ගේ ජාතික පෙරමුණ මගින්ද මීට එරෙහිව පියවර ගැනීමට මේ වනවිට සාකච්ඡා කර ඇත. එසේම, මෙම ක‍්‍රියාවලිය වක‍්‍රාකාරයෙන් ඵක්‍ක්‍ ගිවිසුම ක‍්‍රියාත්මක වීමේ උත්සාහයක්දැයි අපට සැකයක් ඇත.”පොදු දේපල හා මානව හිමිකම් සුරැකීමේ සංවිධානය නිකුත් කළ නිවේදනයේ වැඩි දුරටත් සදහන්ය.