රජය හොරුන් ආරක්ෂා නොකරන බව මේනම කව්රුන් වුවද වැරැදි කර ඇති බවට තහවුරු වුවහොත් වැරදිකරුවන්ට පියවර ගන්නා බව අගමැතිවරයා පවසයි.
එක්සත් ජාතික පක්ෂය හොරුන්ගේ පක්ෂයක් නොවන බව අවධාරණය කරන අගමැති රනිල් වික්‍රමසිංහ චෝදනා සම්බන්ධයෙන් විනිවිද භාවයකින් කටයුතු කරන බවට සපථ කර සිටියේ හැටන් නගරයේ ඩී. කේ. ඩී. ඩබ්ලිව්. සංස්කෘතික මධ්‍යස්ථානයේ 06 ඉරිදා පැවැති එක්සත් ජාතික පක්ෂ සාමාජික හමුවකදීය.
ඇතැම් මාධ්‍ය ආයතන වලට මෙන් දූෂණ වහගෙන සිටීමේ අතීතයක් තම පක්ෂයට නැතැයි ද එම මාධ්‍ය පසුගිය රජයට කඩේ යමින් එම රජයේ දූෂණ වහගෙන සිටි බව ද කී අගමැති වික්‍රමසිංහ යහපාලන රජය යටතේ ඇමැතිවරුන් විමර්ශනවලට ගෙන්වා නීතිපතිවරයා විසින් හරස් ප්‍රශ්නවලට භාජනය කිරීමට තරම් ප්‍රජාතන්ත්‍රවාදය තහවුරු වී ඇති බැව් පැවසීය.
බැඳුම්කර සිද්ධිය සම්බන්ධයෙන් රජය ප්‍රථමයෙන්ම අභ්‍යන්තර කමිටුවක් පත්කළ බව ද පසුව විපක්ෂයේ මන්ත්‍රීවරයකු සභාපති ධුරය දරන පාර්ලිමේන්තු පොදු ව්‍යවසාය කාරක සභාවකින් ඒ ගැන විමර්ශන කළ බව සිහිකල අගමැතිවරයා විපක්ෂයට එල්ලවී තිබූ චෝදනා විභාග කිරීමට පෙර එම පරීක්ෂණ සිදුකළ බව ද කියා සිටියේය.
Facebook Comments
