අතුරුදහන් වුවන් පිළිඳව වු කාර්යාලය ක්‍රියාත්මක කර ඇති බැවින් තමන් තවදුරටත් අතුරුදහන් වුවන්ගේ ගැටලුව සම්බන්ධව එම ඥාතීන් සමඟ සාකච්ඡා කල යුතු නැති බවට ජනාධිපතිවරයා යාපනයේ පැවති උත්සවයක දී කියා තිබේ.
“අද මම එනකොටත් අතුරුදහන් වූවන් පිළිබඳ උද්ඝෝෂණයක් තිබුණා. අතුරුදහන්වූවන් පිළිබඳ කාර්යාල පිහිටුවීම පනතකින් සම්මත කරලා අවශ්‍ය කටයුතු කළා. ඒ කාර්යාල මේ වනවිට වැඩකටයුතු ආරම්භ කරලා තිබෙනවා. අපි ඒ පිළිබඳව අපේ ප‍්‍රතිපත්තිය පැහැදිලි කරලා තිබෙනවා. ඒ නිසා ඒ පිළිබඳ මම තවදුරටත් කතා කළයුතු නැහැ.” යි ජනපති 19 සඳුදා යාපනයේ ශාන්ත පැට්‍රික් විදුහලේ උත්සවය අමතමින් ප්‍රකාශ කළේය.
යාපනයේ ශාන්ත පැට්‍රික් විදුහලේ නව තාක්ෂණික ගොඩනැගිල්ල සිසු අයිතියට පවරාදීමේ හා උතුරු පළාතේ උපාධිධාරින් සදහා ගුරු පත්වීම් ප්‍රදානය කිරීමේ උත්සවයට ජනපති මෛත්‍රීපාල සිරිසේන එන මඟ විරෝධතාවයේ නිරතව සිටි අතුරුදහන් වුවන්ගේ ඥාතීන් හට ජනාධිපතිවරයා සාකච්ඡාවක් ලබා දී එය මග හරිමින් ගිය බවට එම ඥාතීන් චෝදනා කළේය.
උත්සවයට සහභාගි වු ජනාධිපති මෛත්‍රීපාල සිරිසේන, විපක්ෂ නායක ආර් සම්බන්ධන් හා උතුරේ මහ ඇමැති සී වී විග්නේශ්වරන් ඇතුළු කිසිවකුත් යුද්ධාවසානයෙදී ශ්‍රී ලංකා යුද හමුදාවට භාරවීමෙන් අනතුරුව අතුරුදහන් කරන ලද ශාන්ත පැට්‍රික් විදුහලේ හිටපු විදුහල්පති ෆ්‍රාන්සිස් ජෝසප් පියතුමා සම්බන්ධයෙන් කිසිවක් ප්‍රකා නොකිරීම අතුරුදහන් වුවන්ගේ ඥාතීන් මෙන්ම ආදි ශිෂ්‍ය සංගම් නියෝජිතයන්ගේ දැඩි දෝෂ දර්ශනයට ලක් විය.
වසරකට වැඩි කාලයක් උතුරේ ස්ථාන කිහිපයක විරෝධතාවයන් හි නිරත වන අතුරුදහන් වුවන්ගේ ඥාතීන් ජාත්‍යන්තර විමර්ශනයක් සිදු කර අතුරුදහන් වුවන් පිළිබඳ සත්‍ය හෙළි කරන ලෙස රජයට බල කරමින් සිටි.
Facebook Comments
