වී බුසල් ලක්ෂයකට වැඩි වෙල්යායක් සූර්ය බලශක්තියට පවරා දීමේ සැලසුමක්

රට බරපතල සහල් අර්බුදයකට මුහුණ පා සිටියදී දසක හයකට අධික කාලයක් තිස්සේ ත්‍රිකුණාමලයේ ගොවීන් දහසකට වැඩි පිරිසක් බඩ වියත රැක ගන්නා කෘෂිකාර්මික භුමියක් සූර්ය බල ශක්තිය උත්පාදනය ව්‍යාපෘතියකට ලබා දීමේ සැලසුම වහාම නතර කරන ලෙස බල කරමින් විරෝධතාවයක් දියත් කර තිබේ.

ජනවාරි 3 වැනි සිකුරාදා ත්‍රිකුණාමලය නගර හා කඩවත් ප්‍රාදේශිය ලේකම් කාර්යාලය ඉදිරිපිට දී විරෝධතා පුවරු ප්‍රදර්ශනය කරමින් ගොවීන් විරෝධතාවය දියත් කර තිබුනේ කාර්යාලය තුල ප්‍රාදේශීය සම්බන්ධීකරණ කමිටු රැස්වීම පැවැත්වෙමින් තිබියදීය.

ත්‍රිකුණාමලය මුත්තුනගර් ග්‍රාම සේවක වසමට අයත් අම්මන්කුලම් කෘෂිකර්ම සම්මේලනය, තගරවෙට්ටුවාන් කෘෂිකර්ම සම්මේලනය, මුත්තුනගර් කෘෂිකර්ම සම්මේලනය සහ මත්තියවැලි කෘෂිකර්ම සම්මේලනය විසින් ඒකාබද්ධව දියත් කළ විරෝධතාවයේදී ඔවුන් චෝදනා කළේ ප්‍රදේශයේ ගොවීන් 1200 ක් වසර 64 ක් තිස්සේ පාරම්පරිකව වගා කටයුතු කරමින් සිටින කුඹුරු අක්කර 1600 ක් සන් රයිස් සෝලා සමාගමට පවරා දීමේ සුදානමක් ඇති බවටයි.

විරෝධතාකරුවන් පවසන්නේ 1961 වසරේ සිට ප්‍රදේශයේ ජනතාවට ගොවිතැන් කිරීම සදහා රජය විසින් බෙදා දුන් භුමිය 1984 වසරේදී ශ්‍රී ලංකා වරාය අධිකාරියට අයිතිය පවරමින් ගැසට් නිවේදනයක් නිකුත් කර ඇති බවයි. නමුත් ඒ සදහා පාර්ලිමේන්තු අනුමැතියක් නොමැති බව ඔවුන් වැඩි දුරටත් පවසා තිබුනි.

විරෝධතාවයට එක්ව සිටි ප්‍රදේශවාසී මුස්ලිම් ජාතික මාතාවක් සදහන් කළේ මේ කන්නයේ අස්වනු නෙලීමෙන් පසු ගොවීන් 1200 දෙනකු හැට හතර වසරක් තිසේසේ වගා කරමින් සිටින කුඹුරු අක්කර 1600 ක් සහ කොරටු සදහා භාවිත කරන තවත් ඉඩම් අක්කර 50 ක් ප්‍රාදේශිය ලේකම් කාර්යාලයේ මැදිහත්වීමෙන් සන් රයිස් සෝලා ආයතනයට ලබා දීමේ සැලසුමක් ක්‍රියාත්මක වන බවට ගොවීන්ට දැන ගන්නට ලැබුන බවයි.

”අපේ ජීවනෝපාය වන අක්කර දෙකක ඉඩම සූර්ය බලශක්ති ව්‍යාපෘතියක් ආරම්භ කරන්න අරන් තියනවා කියලා මේ අවුරුද්දේ අස්වනු නෙලුවට පස්සේ, අපිට දැන ගන්නට ලැබුනා. ඉතින් අපි කොහෙද යන්නේ, අපේ දරුවන් එක්ක අපි කොහෙද යන්නේ? හැමදෙනාම වගා කරන්නේ අක්කර දෙකක නැතිනම් අක්කරයක තමයි. අපි දුප්පත් ගොවියෝ. හාල් සහ මඤ්ඤොක්කා තමයි අපේ ජීවනෝපාය වෙන්නේ. අපි ගොවිතැන් කරන්නේ අලිත් එක්කත් සටන් කරලා. අපිට අපේ කෘෂිකාර්මික ඉඩම් ලබා දිය යුතුයි. වරාය අධිකාරියේ මැදිහත්වීමකින් තොරව අපේ ඉඩම් අපට ලබාදිය යුතුයි.”

‘කෘෂිකර්මය විනාශ කිරීම සංවර්ධනයද? වගා බිම් කොල්ලකන්න එපා, සෝලා පවර් කන්නද?’ ආදී සටන් පාට රැගත් පුවරු විරෝධතාකරුවන් අත් දැකගන්නට ලැබුණි.

මෙම භුමියෙන් වසරකට වී බුසල් එක්ලක්ෂ දොලොස් දාහක් නිෂ්පාදනය කරන බව පෙන්වා දෙන ගොවීන් අවධාරණය කරන්නේ කෘෂිකාර්මික භුමිය සූර්ය බල ශක්තිය උත්පාදනය ව්‍යාපෘතියක ලබා දීම සිදු කළහොත් දහසකට අධික ගොවි පවුල් වල ජීවිකාවට එල්ල වන මරු පහරට අමතරව, වගාවට ජලය සැපයු ප්‍රදේශයේ කුඩා වැව් පහක්ද විනාශයට පත් වන බවයි.

තමන්ට ජීවනෝපාය සලසා දෙන කෘෂිකාර්මික භුමිය සූර්ය බල ශක්තිය උත්පාදනය ව්‍යාපෘතියක පවරා දීම වහාම නතර කර ප්‍රදේශවාසීන්ගේ ජීවිත රැක දෙන ලෙස ඉල්ලමින් සකස් කළ සන්දේශයක් විරෝධතාවය දියත් කළ ගොවීන් ප්‍රාදේශිය ලේකම් එන්. මදිවන්නන් ට බාර දී තිබුනි.

එම සන්දේශයේ පිටපත් ප්‍රාදේශිය සම්බන්ධිකරණ කමිටු රැස්වීමට පැමිණ සිටි ඉලංගෙයි තමිල් අරසු කච්චි (ITAK) ත්‍රිකුණාමලය දිස්ත්‍රික් පාර්ලිමේන්තු මන්ත්‍රී සන්මුගන් කුගදාසන්ට හා ජාතික ජන බලවේගයේ ත්‍රිකුණාමලය දිස්ත්‍රික් පාර්ලිමේන්තු මන්ත්‍රී රොෂාන් අක්මීමනට බාර දීමට විරෝධතාකරුවන් කටයුතු කර තිබේ.

පළාත් බද වාර්තාකරුවන් පවසන්නේ, කෘෂි කාර්මික භුමියේ සැලසුම් කර තිබු සූර්ය බල ශක්තිය උත්පාදනය ව්‍යාපෘතියකට ලබා දීමේ සැලසුම නතර කර ගොවීන්ට ඉදිරියේදීත් එම භුමියේ බාධාවකින් තොරව ගොවිතැන් කටයුතු කරගෙන යෑමට ඉඩ සැලසීමට 2024 වසරේ දෙසැම්බර් 24 වැනිදා පැවැති දිස්ත්‍රික් සම්බන්ධිකරණ කමිටු රැස්වීමේදී තීරණය කළ බව, පාර්ලිමේන්තු මන්ත්‍රී රොෂාන් අක්මීමන විරෝධතාව දියත් කළ ගොවීන්ට ජනවාරි 3 වැනිදා දැනුම් දුන් බවයි.