ලොව පුරා පැතිර යන කොරෝනා වසංගතයෙන් බේරී ශ්‍රී ලංකාවට පැමිනීම සදහා ගුවන් ටිකට් පත් වෙනුවෙන් ජාතික ගුවන් සේවාවට වැඩි මිළක් ගෙවීමට සිදුවු රාජ්‍ය ශිෂ්‍යත්වලාභීන්ගේ සියලු ගමන් වියදම් රජය විසින් ආපසු එම සිසුන්ට ගෙවිය යුතු බව ලංකාවේ ප්‍රමුඛතම ගුරු සංගමයක් බලකර සිටී.
විදේශීය පෞද්ගලික විශ්ව විද්‍යාල සිසුන් කොරෝනාවෙන් බේරා ගැනීම සඳහා රජයේ වියදමින් ගෙන්වා ගනිද්දී රාජ්‍ය ශිෂ්‍යත්ව ලාභීන්ට ලංකාව බලා ඒමට හැකිවුනේ වැඩිපුර මුදල් ගෙවීමෙන් පසුව පමණක් බව ලංකා ගුරු සංගමය පසුගිය සතියේ මුල් වරට රටට අනාවරණය කර තිබුනි.
ඉන්දියාවේ අතරමංව සිටි සිසුන් සති අන්තයේ ශ්‍රී ලංකාවට ගෙන ඒම සඳහා වෙනත් ගුවන් ගමන් වාර වලට වැඩි මුදලක් අය කළ බව ශ්‍රී ලංකන් ගුවන් සමාගම විසින් පිළිගෙන තිබුණි.
ගුවන් සමාගම විසින් නිකුත් කරන ලද නිවේදනයක එය සාධාරණීකරණය කර තිබුනේ “සමාගමේ පාලනයෙන් ඔබ්බට යන” වියදමක් දරන්නට සිදුවූ බව පවසමිනි.
“විශේෂයෙන්ම COVID-19 තත්ත්වය යටතේ දී පවතින මෙහෙයුම් ක්‍රියාපටිපාටීන් මත මෙම ගුවන් යානා ක්‍රියාත්මක වූ අතර එමඟින් කාර්ය මණ්ඩලය සඳහා පුද්ගලික ආරක්ෂණ උපකරණ භාවිතා කිරීම, ගැඹුරු පිරිසිදු කිරීම, මතුපිට මීදුම ඉවත් කිරීම් සහ ගුවන් යානා විෂබීජ නාශක සඳහා වන ක්‍රමවේද ඇතුළු වියදම් තවදුරටත් ඉහළ යන ලදී,” යි එහි වැඩිදුරටත් සඳහන් වේ.
වෛරසය මුලින්ම පැතිරුණු චීනයේ වූහාන් සිට පෞද්ගලික විශ්ව විද්‍යාල සිසුන් ගෙන ඒමේදී එවැනි වියදමක් දරන්නට වුයේද යන්න ශ්‍රී ලන්කන් විසින් පැහැදිලි කර නැත.
රාජ්‍ය ශිෂ්‍යත්ව ලබා උසස් අධයාපන කටයුතු වෙනුවෙන් ඉන්දියාව බලා ගොස් සිටි සිසුන්ට වැඩි මුදලක් ගෙවා ලංකාවට ඒමට සිදුව තිබුනේ කොරෝනා වසංගතය හමුවේ චීනයේ වූහාන් නගරයේ අධ්‍යාපනය ලැබූ සිසුන් කිසිදු මුදල් අය කිරීමකින් තොරව ආන්ඩුව විසින් ලංකාවට ගෙන්වා ගෙන තිබියදීය.
ලංකා ගුරු සංගමය පෙන්වා දෙන්නේ විදේශගත සිසුන් පවතින වසංගත තත්වය හමුවේ මෙරටට ගෙන්වා ගැනීමේ සම්පුර්ණ වගකීම රජය සතු බවයි.
ගුවන් සමාගමට වැය වු අමතර වියදමක් වේ නම්, රාජ්‍ය ශිෂ්‍යත්ව ලබා විදෙස් ගත වු සිසුන් මත පැටවීම ඉතාම කනගාටුදායක තත්වයක් බව පෙන්වා දෙන ගුරු සංගම් නායකයා අවධාරණය කරන්නේ සිසුන් ආපිට ගෙන්වා ගැනීම “මානුෂික මෙහෙයුමක්” ලෙස හුවා දැක්වීමට රජය කටයුතු කළත් එම සියලු වියදම් සිසුන්ගේ දුප්පත් දෙමාපියන්ගේ කර මත පටවා ඇති බවයි.
නිවැරදි නායකත්වය
වුහාන් සිසුන් සියලු දෙනා දින 14 ක් දියතලාව යුද හමුදා පුහුණු කඳවුරේ ස්ථාපිත විශේෂ නේවාසික මධ්‍යස්ථානයේ නිරෝධායනය අවසන් කිරීමෙන් පසු ඔවුන් ඇමතු යුද්ධ හමුදාපති ලුතිනන් ජෙනරාල් ශවේන්ද්‍ර සිල්වා පවසා තිබුනේ එම මෙහෙයුම ශ්‍රී ලංකාවේ රාජ්‍ය තාන්ත්‍රික ජයග්‍රහනයක් මෙන්ම ජනාධිපති ගෝඨාභය රාජපක්ෂගේ නිවැරදි නායකත්වය විදහා දක්වන්නක් ලෙසයි.
කෝවිඩ් 19 වෛරසය හේතුවෙන් ඇති වී තිබෙන අර්බුද පාලනය කිරීම වෙනුවෙන් චීනය, යුරෝපා සංගමය ආදී විවිධ රටවලින් ලංකාවට ආධාර ලැබී තිබෙන බව පෙන්වා දෙන ලංකා ගුරු සංගමයේ ප්‍රධාන ලේකම් ජෝසප් ස්ටාලින් අවධාරණය කරන්නේ එලෙස ලැබී ඇති ආධාර යොදා ගත යුත්තේ මෙවැනි හදිසි අවස්ථා සඳහා බවයි.
තමන් ට දැරිය නොහැකි මුදලක් ගෙවා වුවද වසංගත රෝබිය හමුවේ සිය දරුවන් මෙරටට ගෙන්වා ගන්නට සිදුවූ දෙමාපියන්ට සිසුන්ගේ අධ්‍යාපන කටයුතු සම්පුර්ණ කර ගැනීම සදහා නැවතත් වරක් ඔවුන් විදෙස් ගත කිරීමට සිදු වන බව පෙන්වා දෙන ගුරු නායක ජෝසප් ස්ටාලින් රජයට බල කර සිටින්නේ සිසුන්ගෙන් අයකරගන්නා ලද සියලු වියදම් ආපිට ගෙවන ලෙසයි.
Facebook Comments
