සමලිංගික අයිතීන් සම්බන්ධයෙන් කැබිනට් මණ්ඩලය වෙත ඉදිරිපත් කල යෝජනාව ඉවත දැමුවේ තමන් බව ජනාධිපති මෛත්‍රීපාල සිරිසේන පවසයි.
සමලිංගික විවාහ මෙන්ම ගණිකා වෘත්තියද නිතිගත කිරීමට වරින්වර යෝජනා ඉදිරිපත් වූ බව සහ එම යෝජනා සියල්ල ඉවත දැමීමට කටයුතු කලේ තමන් බවට ජනාධිපතිවරයා පවසා සිටියේ ඊයේ (ජන.25) පූජ්‍ය මුරුත්තෙට්ටුවේ ආනන්ද හිමියන්ගේ ජන්ම දිනය වෙනුවෙන් කොළඹ අභයාරාම විහාරස්ථානයේ පැවති උත්සවයකට සහභාගී වෙමිනි.
GSP+ බදු සහන ලබා දීම සඳහා වන යෝජනාවලියේ සමකාමීන්ට අපරාධයක් සේ සලකා දඬුවම් නොකරන ලෙසට යුරෝපා සංගමය කරන යෝජනාව ජනාධිපති මෛත්‍රිපාල සිරිසේන ගේ උපදෙස් අනුව ඉවත් කර දැමූ බව මුදල් රාජ්‍ය අමාත්‍ය ලක්‍ෂ්මන් යාපා අබේවර්ධන මීට පෙර පවසා තිබුනි.
රාජ්‍ය මැදිහත් නොවිය යුතුයි
වැඩිහිටියන් දෙදෙනෙක් අතර ස්ව කැමැත්තෙන් ඇති වන ප්‍රේම සම්බන්ධතාවක් සංස්කෘතිය හෝ සදාචාරාත්මක හේතු පදනම් කරගනිමින් රාජ්‍ය විසින් එයට මැදිහත්වීම ගැටලු සහගත බව මානව හිමිකම් කොමිසම පෙන්වා දෙයි.
මානව හිමිකම් පාර්ශවයෙන් සහ මානවවාදී ලෙසින් සළකා බලන විට එය එසේ නොවිය යුතුය යන්න ජාතික මානව හිමිකම් කොමිසමේ ස්ථාවරය බව එහි සභාපතිනි මහාචාර්ය දීපිකා උඩුගම බීබීසී සංදේශය වෙත ප්‍රකාශ කර ඇත.
බ්‍රිතාන්‍යය පවා සමලිංගික විවාහය නීතිගතකර තිබියදී ශ්‍රී ලංකාවේ තවමත් බ්‍රිතාන්‍ය අධිරාජ්‍යවාදී යුගයේ පනවන ලද නීතියක් ක්‍රියාත්මකවීම එහි පවතින ‘උත්ප්‍රාසය’ බව ද මහාචාර්යවරිය සඳහන් කළාය.
යමෙකුගේ ලිංගිකත්වය මත පදනම් වෙලා වෙනස්කම් කිරීම ශිෂ්ට සම්පන්න සමාජයක් විසින් කොහෙත්ම අනුමත නොකරන බව පවසන ඇය සමලිංගිකත්වය යනු කෘතීම ලිංගිකත්වයක් නොව සතුන් අතර පවා පවතින සාමාන්‍ය සංසිද්ධියක් බව ලෝක සෞඛ්‍ය සංවිධානය පවා පිළිගෙන ඇති බවයි අවධාරණය කරන්නේ.
සමලිංගික සේවනය අපරාධයක් ලෙසින් සැළකීම හේතුවෙන් රට පුරා විශාල පිරිසක් දුක් විඳින බව තමන් සමග අදහස් දැක්වූ බොහෝ දෙනා පෙන්වා දුන් කරුණක් බව මහාචාර්යවරිය වැඩිදුරටත් සඳහන් කළාය.
Facebook Comments
