ශ්‍රී ලංකාවේ පවතින දේශපාලන අර්බුදය කෙරෙහි ජාත්‍යන්තරය මැදිහත් වීම සම්බන්ධව ගන්නා ක්‍රියා මාර්ගය සම්බන්ධව ජාතික නිදහස් පෙරමුණ එහි නායකයාගෙන් විමසා තිබේ.
එම පක්ෂයේ දේශපාලන මණ්ඩල සාමාජිකයන් විමල් වීරවංශට යෝජනා කර ඇත්තේ ජාත්‍යන්තර මැදිහත් වීමට එරෙහිව මහින්ද රාජපක්ෂගේ ද සහභාගිත්වය ඇතිව විරෝධතා සංවිධානය කළ යුතු බවයි.
ව්‍යවස්ථා විරෝධීව අගමැතිවරයකු පත් කර පාර්ලිමේන්තුව කල් දැමීමට එරෙහිව ඇමරිකානු තානාපති කාර්යාලය ඇතුලු බටහිර තානාපති සේවාවන් මෙන්ම යුරෝපා සංගමය හා එක්සත් ජාතීන්ගේ සංවිධානය හා පොදුරාජ්‍ය මණ්ඩල මහ ලේකම් කාර්යාල සිය විරෝධය පල කරමින් පාර්ලිමේන්තුව වහාම කැඳවන ලෙස ජනාධිපති මෛත්‍රිපාල සිරිසේන ගෙන් ඉල්ලා තිබුණි.
කෙසේ වෙතත් ජාතික නිදහස් පෙරමුණේ දේශපාලන මණ්ඩලය විසින් ඉදිරිපත් කර ඇති යෝජනාව සම්බන්ධව වැඩි උනන්දුවක් නොදක්වා ඇති මන්ත්‍රී විමල් වීරවංශ ඒ පිළිබඳව මහින්දා රාජපක්ෂගෙන් විමසා බලා පියවරක් ගන්නා පැවසු බව නම සඳහන් නොකරන ලෙස ඉල්ලා සිටි එම පක්ෂයේ සාමාජිකයකු කියා සිටියේය.
එක්සත් ජාතින්ගේ මහ ලේකම්වරයා විසින් ශ්‍රී ලංකාවේ යුද අපරාධ පිළිබඳව පත් කල දරුස්මාන් කමිටුවට විරෝධය පල කරමින් විමල් වීරවංශ මෙරට පිහිටි එක්සත් ජාතීන්ගේ කාර්යාල ඉදිරිපිට උපවාසයක් පැවැත්වු අතර මානව හිමිකම් කොමිසමේ හිටපු මහ ලේකම් සෙයිද් අල් හුසේන් කුමරු පැමිණි අවස්ථාවේද උද්ඝෝෂණයක් සංවිධානය කර තිබුණි.
එය නවත්වනු ලැබුවේ එවක ජනපති මහින්ද රාජපක්ෂ විසිනි.
Facebook Comments
