උතුරේ ජනයාගේ ගැටළුවලට විසදුම් සෙවීමේ ආණ්ඩුවේ සාකච්ජා ආණ්ඩුවේ ස්ථාවරත්වය ජාත්‍යන්තරයට පෙන්වීමේ සැලසුමක් බවට උතුරේ දෙමළ දේශපාලන පක්‍ෂයක් චෝදනා කර තිබේ.
දෙමළ ජාතික ජනතා පෙරමුණේ නායකයා මේ බව කියා සිටියේ ජනාධිපති වික්‍රමසිංහ උතුරේ දෙමළ නායකයන් සමඟ සාකච්ජා කරන බවට කළ ප්‍රකාශය ගැන දෙමළ ජනමාධ්‍යවේදීන් කළ විමසීමකදියි.
“අද ආණ්ඩුවට දෙමළ නියෝජිතයන් එක්ක කතා කරන එක අනිවාර්ය දෙයක්.මොකද රටේ දේශපාලන ස්ථාවරත්වයක් තියෙනවා කියලා ලෝකයට පෙන්වන්න ඕනෑ.එහෙම පෙන්නු වොත් තමයි IMF එකෙන් ණය ලබා ගන්න පුළුවන් වෙන්නේ,“ යි පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් `වීරකේසරී`පුවත් පත හා පවසා තිබේ.
පාර්ලිමේන්තුව ඇමතූ ජනාධිපති රනිල් වික්‍රමසිංහ පසුගිය සතියේදී ප්‍රකාශ කර සිටියේ උතුරේ දෙමළ ජනයාට බලපාන ගැටළුවලට වසරක් ඇතුලත විසදුම් ලබා දීමට ඔවුන්ගේ නායකයන් සමග සාකච්ජා කරන බවයි.
මේ ගැන මෙතෙක් නිල ඇරයුමක් ලැබී නොමැති බව පවසන උතුරේ දෙමළ දේශපාලන නායකයන්, දෙමළ ජනයාගේ ගැටළු වලට විසදුම් සෙවීම සඳහා නම් ජනාධිපති සමග සාකච්ඡා කිරීමට ඔවුන් එකඟ බව `වීරකේසරී` පුවත් පතට කියා තිබේ.
“යහපාලන ආණ්ඩු කාලෙත් මේ වගේ කතා කරලා අතුරු වාර්තාවක් හැදුවත් එය කුණු කුඩේට දැම්මා. අන්තිමේ අපි රැවටුණා.ආයෙත් එවැනි දේකට මුහුණ දෙන්න අපි සුදානම් නැහැ,“යැයි දෙමළ ජාතික සංධානයේ නායක හිටපු විපක්‍ෂ නායක ආර්.සම්බන්ධන් පවසයි.
“කටින් කියනවාට වඩා ක්‍රියාවෙන් එය ඔප්පු කළ යුතුයි. කතා බහට කලින් ඒ ගැන ආණ්ඩුව සහතික වෙන්න ඕනෑ.“
මාරුවෙන් මාරුවට බලයට පැමිණි සෑම ආණ්ඩුවක් සමඟම දෙමළ නායකයන් වෙහෙසට පත් වන තෙක් සාකච්ජා කර ඇති බවට දෙමළ ජනතා ජාතික සන්ධානයේ නායක, උතුරු පළාත් සභාවේ හිටපු මහ ඇමැති සී.වී.විග්නේශ්වරන් සඳහන් කරයි.
“කොච්චර කතා කළත් මෙතෙක් කිසිම දෙයක් වුනේ නැහැ. කතා කරනවා නම් ඒකීය රාජ්‍ය ව්‍යවස්ථාවෙන් නිදහස් වෙන්න දකුණේ නායකයන් සුදානම් වෙන්න ඕනෑ. ස්ථිර විසදුමක් ලබා ගන්න නම් මේ ඒකීය ව්‍යවස්ථාව අත්හැරලා එක්සත් රාජ්‍ය ව්‍යවස්ථාවකට මාරු වෙන්න ඕනෑ.“
මග හරින්න එපා
දෙමළ ජනයාගේ ගැටළු විසඳා ගැනීමට නැවතත් අවස්ථාවක් උදා වී ඇති බැවින්, උතුරේ දේශපාලන නායකයන් විසින් මෙය මග නොහැරිය යුතු බවට ආණ්ඩුවේ හවුල්කාර පාර්ශවයක් වූ ඊළාම් ජනතා ප්‍රජාතන්ත්‍රවාදී පක්ෂයේ නායක,ධීවර ඇමැති ඩග්ලස් දේවානන්දා පවසයි.
“මිට පෙර ඉන්දු-ලංකා ගිවිසුම දෙමළ ජනයාට වැදගත් අවස්තාවක් උදාකර දුන්නා. සමහර දෙමළ නායකයන් හා කොටි සංවිධානය ඒකට විරුද්ධ වීම නිසා දෙමළ ජනතාව සෑහෙන පසු බෑමකට ලක් වුණා.“
ධීවර ඇමැති දේවානන්දා පෙන්වා දෙන්නේ දෙමළ ජනයාගේ ප්‍රශ්න කෙරෙහි අවබෝධයක් ඇති දකුණේ සිංහල නායකයන්ගෙන් අතරින් හොඳම ජනාධිපති රනිල් වික්‍රමසිංහ බවයි.
එම නිසා රජයට එරෙහි දෙමළ නායකයන් මේ අවස්ථාව ප්‍රයෝජනයට ගත යුතු බවද EPDP නායකයා අවධාරණය කරයි.
මේ අතර තමිල් ඊළාම් විමුක්ති සංවිධානය පවසන්නේ දෙමළ ජනයාගේ අභිලාෂයන් සම්පුර්ණ වීමට නම් උතුරු -නැගෙනහිර පළාත් ඒකාබද්ධව පැවතීම වැදගත් බවකි.
“දෙමළ ජාතික ප්‍රශ්නයට විසදුම් හා දෙමළ ජනයාගේ අභිලාෂයන් ගැන උතුරේ නියෝජිතයන්ට පමණක් ඇරයුම් කරලා නැගෙනහිර අත්හැරලා සාකච්ජා කරන්න බැහැ. ඔක්කොම එකට ඉදන් කතා කරන්න ඕනෑ,“යැයි TELO නායක,පාර්ලිමේන්තු මන්ත්‍රී සෙල්වම් අඩෙයික්කලනාදන් පවසයි.
දෙමළ දේශපාලන නායකයන් හමුවීමට පෙර ජනාධිපති වික්‍රමසිංහ හමුවී මේ ගැන දැනුම් දීමට TELO නායකයා අපේක්‍ෂා කරයි.
Facebook Comments
