දුම්වැටි සඳහා නව බදු ප්‍රතිපත්තියක් හඳුන්වා දීම කෙරෙහි සෞඛ්‍ය අමාත්‍යාංශයේ අවධානය යොමුව තිබේ.
ඒ සඳහා වන කැබිනට් පත්‍රිකාව ඉතා කඩිනමින් අමාත්‍ය මණ්ඩලය වෙත යොමු කිරීමට පියවර ගන්නා බවයි සෞඛ්‍ය අමාත්‍ය කෙහෙලිය රඹුක්වැල්ල පවසන්නේ.
ඔහු ඒ බව සදහන් කර ඇත්තේ දුම්කොළ හා මධ්‍යසාර පිළිබඳ ජාතික අධිකාරිය සමඟ සෞඛ්‍ය අමාත්‍යාංශයේදී සැප්තැම්බර් 29 වැනි බදාදා පැවති සාකච්ඡාවකදීය.
එම අධිකාරියේ සභාපති ආචාර්ය වෛද්‍ය සමාධි රාජපක්ෂ ඇතුළු අධ්‍යක්ෂ මණ්ඩල සාමාජිකයන් සාකච්ඡාව සඳහා එක්ව සිටි බව රජයේ ප්‍රවෘත්ති දෙපාර්තමේන්තුව සදහන් කරයි.
නව බදු ප්‍රතිපත්තිය ක්‍රියාත්මක කිරීම තුළින් දුම්වැටි භාවිතයද අවම කිරීමට හැකි වෙතැයි දුම්කොළ හා මධ්‍යසාර පිළිබඳ ජාතික අධිකාරිය විශ්වාසය පළ කරයි.
අලුත් බදු ප්‍රතිපත්තියට අදාළ කෙටුම්පත මේ වන විට සකස් කර ඇතැයි දුම්කොළ හා මධ්‍යසාර පිළිබඳ ජාතික අධිකාරියේ සභාපතිවරයා පෙන්වා දෙයි.
ලොව අනෙකුත් රටවල ක්‍රියාත්මක බදු ප්‍රතිපත්තීන් පිළිබඳවද අධ්‍යයනය කරමින් නව ප්‍රතිපත්තිය ක්‍රියාත්මක කිරීමට එහිදී සාකච්ඡා වු බව රජයේ ප්‍රවෘත්ති දෙපාර්තමේන්තුව තව දුරටත් නිවේදනය කර තිබේ.
“එමෙන්ම 2006 අංක 27 දරණ දුම්කොළ හා මධ්‍යසාර පිළිබඳ ජාතික අධිකාරි පනත වර්තමානයට ගැලපෙන අයුරින් සංශෝධනය කිරීමටද පියවර ගැනේ.”
ඒ අනුව දුම්වැටි සිල්ලරට අලෙවිය, පොදු ස්ථාන වල දුම් පානය, ආදී කරුණු රැසක් සම්බන්ධයෙන් අදාළ පනත සංශෝධනය ඔස්සේ දැඩි නීති රීති ගෙන ඒමට අපේක්ෂා කෙරේ.
දුම්කොළ හා මධ්‍යසාර පිළිබඳව සිදු කළ මහජන මත විමසීමේ සමීක්ෂණ වාර්තාව ද එම අධිකාරිය මගින් අමාත්‍ය කෙහෙලිය රඹුක්වැල්ල වෙත භාර දී තිබේ.
දුම්වැටි ඇසුරුම් තුළ යොදා ඇති රූපමය අවවාද යාවත්කාලීන කිරීම කෙරෙහිද එහිදි සාකච්ඡාවට ලක්ව තිබේ.
දුම්වැටි හා මධ්‍යසාර භාවිතය අවම කිරීම සඳහා වන පුළුල් ප්‍රචාරණයක් ක්‍රියාත්මක විය යුතු බවත් එ් සඳහා අදාළ වැඩපිළිවෙල සකස් කරන ලෙසත් දුම්කොළ හා මධ්‍යසාර පිළිබඳ ජාතික අධිකාරියට අමාත්‍යවරයා උපදෙස් ලබා දුන් බව රජයේ ප්‍රවෘත්ති දෙපාර්තමේන්තුව පවසයි.
ආචාර්ය වෛද්‍ය සමාධි රාජපක්ෂ පසුගිය වසරේ පෙන්වා දී තිබුනේ ශ්‍රී ලංකාවේ කාන්තාවන්ගෙන් සියයට විසි දෙකක් තමන්ගේ නිවස තුලදීම අක්‍රීය දුම්පානයට ගොදුරුවන අතර මෙරට කාන්තාවන්ගෙන් සියයට එකොළහක් රාජකාරි ස්ථානය තුලදී අක්‍රිය දුම් පානයට ගොදුරු වන බවයි.
දුම් පානය සහ මධ්‍යසාර භාවිතය හේතුවෙන් ශ්‍රී ලංකාවේ දිනකට අවම වශයෙන් අසු පස් දෙනකු මිය යන බවත් ඔහු 2020 වසරේදී අනාවරණය කර තිබුනි.
Facebook Comments
