පාර්ලිමේන්තු මැතිවරණයෙන් පසුව නව ජනාධිපතිවරයාට සහාය පළ කිරීමට ඇති සුදානම උතුරේ දෙමළ අතුරු සන්නද්ධ කණ්ඩායමක නායක හිටපු අමාත්‍යවරයෙක් විසින් ප්‍රකාශයට පත් කර තිබේ.
ඩග්ලස් දේවානන්දා හිටපු ධිවර අමාත්‍යවරයා සැප්තැම්බර් 29 වැනිදා යාපනයේ තෙල්ලිප්පලෙයිහිදී ප්‍රදේශයේ මාධ්‍යවේදීන් වෙත පවසා ඇත්තේ ජනතා විමුක්ති පෙරමුණ මෙන්ම තමන් නායකත්වය දරන ඊලාම් ජනතා ප්‍රජාතාන්ත්‍රවාදි පක්ෂය (EPDP) ද ආයුධ සන්නද්ධ සංවිධානයක් වූ බැවින් දෙපාර්ශවය අතර මනා අවබෝධයක් පවතින බවයි.
“මැතිවරණයෙන් පසුව, ඒ ජයග්‍රහණයෙන් පසුව බලයේ සිටින අය සමඟ සාකච්ඡා කරන්න, මොකද ඔබ දන්නා පරිදි සන්නද්ධ අරගලය හරහා තමයි අද ජාතික ප්‍රවාහයේ ප්‍රජාතන්ත්‍රවාදී මාර්ගයට ඇවිත් ආණ්ඩු බලය ගත්තේ. ඒ වගේ ම අපිත් වරක් සන්නද්ධ අරගලයක යෙදුණා. ප්‍රතිපත්තිමය වශයෙන් ගත් කල ඔවුන් සහ අප අතර ප්‍රතිපත්තිමය වෙනසක් නැහැ. ඒ කියන්නේ ඔවුන් වාම සම්ප්‍රදායෙන් එන අය. ඊ.පී.ඩී.පී ද ආවේ වාම සම්ප්‍රදායකින්. එහෙම බැලුවම අපි අතර හොඳ අවබෝධයක් තියෙනවා.”
ඩග්ලස් දේවානන්දා, ජනාධිපති අනුර කුමාර දිසානායක සහ NPP ආණ්ඩුවේ කැබිනට් ප්‍රකාශක විජිත හේරත් තිදෙනාම 2004 දී චන්ද්‍රිකා බණ්ඩාරනායක කුමාරතුංග විසින් මහින්ද රාජපක්ෂගේ අගමැති ධුරය යටතේ පිහිටුවන ලද ආණ්ඩුවේ එකට අමාත්‍ය ධුර දැරූ අයයි.
පාර්ලිමේන්තු මැතිවරණයේ තරග කර ජයග්‍රහනය ලබා ගැනිමෙන් අනතුරුව නව රජය සමග එක්වීමේ හැකියාව ගැන EPDP නායකයා වැඩි දුරටත් විශ්වාසය පළ කර තිබුනි.
“මැතිවරණයෙන් පසුව, ඉදිරි පාර්ලිමේන්තු මැතිවරණයෙන් පසුව, ඊපීඩීපීයේ වීණාව ලකුණ ජයග්‍රහණය කිරීමෙන් පසු එය ඉටුවන බව විශ්වාසයි.”
ආණ්ඩු පාක්ෂික අතුරු සන්නද්ධ කල්ලියක් ලෙස ක්‍රියාත්මක වූ EPDP සංවිධානයට එරෙහිව නැගී ඇති පැහැරගෙන යාම්, වධහිංසා කිරීම්, කප්පම් ගැනීම් සහ ඝාතන පිළිබඳව නැගී ඇති චෝදනා සම්බන්ධයෙන් කිසිදු ආණ්ඩුවක් මෙතෙක් විභාග කොට නැත. එහි නායක ඩග්ලස් දේවානන්ද 1994 මහ මැතිවරණයෙන් පාර්ලිමේන්තුවට තේරී පත්වීමෙන් පසු පැවති බොහෝ ආණ්ඩුවල ඇමැති ධුර දරා තිබේ.
මහ මැතිවරණය පැවැත්වීමට අදාලව රජයේ මුද්‍රණාලය නිකුත් කළ ගැසට් නිවේදනයට අනුව නොවැම්බර් මස 14 වැනිදා ඡන්ද විමසීම පැවැත්වෙන අතර නව පාර්ලිමේන්තුව රැස් වීමට නියමිතව ඇත්තේ නොවැම්බර් 21 වැනිදා ය.
Facebook Comments
