ශ්‍රී ලංකා ජාතික ක්‍රිකට් කණ්ඩායමේ සහ වයස අවුරුදු 19 න් පහළ ක්‍රිකට් කණ්ඩායමේ උපදේශකවරයා ලෙස මෙරටින් බිහිවු විශිෂ්ඨතම ක්‍රිකට් ක්‍රීඩකයකු පත් කර තිබේ.
අරවින් ද ද සිල්වාගේ ප්‍රධානත්වයෙන් යුතු ක්‍රිකට් තාක්ෂණික උපදේශන කමිටුව විසින් සිදුකරන ලද නිර්දේශයක් මත ශ්‍රී ලංකා ක්‍රිකට් ආයතන විධායක සභාව විසින් මෙම තනතුරු සඳහා මහේල ජයවර්ධන පත් කිරීමට පියවර ගෙන ඇත.
“මේ තනතුරුවලට අපි මහේලව ඉතාමත් සතුටින් පිළිගන්නවා. ඔහුගේ පැමිණීමත් සමඟ ශ්‍රී ලංකා කණ්ඩායමේත් වයස අවුරුදු 19 න් පහළ කණ්ඩායමෙත් ක්‍රීඩකයින්ගේ දස්කම් ඉහළ නංවා ගැනීමට බෙහෙවින්ම උපකාරි වේවි” යැයි ශ්‍රී ලංකා ක්‍රිකට් ආයතන ප්‍රධාන විධායක නිලධාරී ඈෂ්ලී ද සිල්වා පවසයි.
“ක්‍රීඩා කරන අවධියේ පටන් මහේල ක්‍රිකට් ක්‍රීඩාවට ගෙන ආ දැනුම ඉතා විශිෂ්ඨයි. පළමුව ක්‍රීඩකයකු ලෙසත්, පසුව නායකයකු ලෙසත් ඔහු ඉතා විශිෂ්ඨ කාර්යය භාරයක නිරත වුණා. ඔහු මේ වන විට පුහුණුකරුවකු ලෙස කටයුතු කරමින් තවත් විශිෂ්ඨ කාර්යය භාරයක් සිදුකරමි සිටිනවා”
ඒ අනුව ලබන ඔක්තෝම්බර් මසදී එක්සත් අරාබි එමීර් රාජය්‍යයේ පැවැත්වෙන පන්දුවාර විස්සයි-20 ලෝක කුසලාන තරගාවලිය වන අතර එම තරගාවලියේ පළමු වටයේදී ජාතික කණ්ඩායමේ උපදේශකවරයා ලෙස කටයුතු කිරිම ඔහුගේ පළමු වගකීමයි.
මේ දිනවල එක්සත් අරාබි එමීර්හි පැවැත්වෙන ඉන්දීය ප්‍රිමියර් ලීග් ක්‍රිකට් තරගාවලියේ මුම්බායි ඉන්ඩියන්ස් කණ්ඩායමේ ප්‍රධාන පුහුණුකරු ලෙස කටයුතු කරන මහේල ජයවර්ධන එම තරගාවලිය අවසානයත් සමඟ අයි.පී.එල්. ජෛව බුබුලේ සිට ශ්‍රී ලංකා කණ්ඩායමේ ජෛව බුබුලට එක්වනු ඇති බවයි රජයේ නිල වෙබ් අඩවිය පවසන්නේ.
ඊට අමතරව ලබන වසරේදී බටහිර ඉන්දීය කොදෙව් දූපත්හි පැවැත්වීමට නියමිත වයස අවුරුදු 19 න් පහළ ලෝක කුසලාන ක්‍රිකට් තරගාවලියට පෙර සූදානම්වීම සඳහා එම කණ්ඩායමේ උපදේශකවරයකු ලෙස කටයුතු කරන මෙන් කරන ලද ආරාධනාවද ඔහු බාරගෙන තිබේ.
Facebook Comments
