කලාව, සාහිත්‍යය සහ සංගීතයට දේශපාලනයක් නොමැති බව මෙන්ම කුමන දේශපාලන වේදිකාවක සිටිය ද තමා මෙරට සියලු කලාකරුවන්ට සලකන්නේ කලාකරුවන් ලෙස බව ජනාධිපතිවරයා පවසනවා.
සුවහසක් රසික හදවත් රසාස්වාදයෙන් පිනවූ මෙරට කලාකරුවන්ගේ ජීවිතවල සැඳෑ සමය ශෝකාන්තයක් වීමට ඉඩ නොතබා රජයේ වගකීම් සහ යුතුකම් නිසි ලෙස ඉටුකරන බවට ජනාධිපති මෛත්‍රීපාල සිරිසේන පොරොන්දු වුයේ ශ්‍රී ලංකා ගායක ගායිකාවන්ගේ ආරක්ෂණ අරමුදල සඳහා රුපියල් ලක්ෂ 250 ක මුදලක් පරිත්‍යාග කිරීම වෙනුවෙන් ඊයේ (03) පස්වරුවේ කොටුව ජනාධිපති මන්දිරයේ පැවති උත්සවයේ දීය.
සිය හැකියාවන් සහ දක්ෂතාවයන් තුළින් දැයක් රසවත් කළ කලාකරුවන්ට නිසි වටිනාකමක් සහ ඇගයීමක් ලබාදෙමින් ඔවුන්ගේ සුබසාධනය වෙනුවෙන් ගතයුතු සියලු පියවර ගැනීමට වත්මන් රජය පසුබට නොවන බවද ජනාධිපතිවරයා මෙහිදී අවධාරණය කළේය.
පසුගිය වසර දෙක තුළ කලාකරුවන්ගේ රෝගී තත්ත්වයන්, අභාවයන් ඇතුළු සියලු අවස්ථාවල ඒ සඳහා ලබා දිය යුතු දායකත්වය ලබාදීමට තමා කටයුතු කළ බව සිහිපත් කළ ජනාධිපවරයා ඉදිරියටත් එම වගකීම් නිසි ලෙස ඉටු කරන බව ප‍්‍රකාශ කළ අතර රටේ ඉදිරි ගමන වෙනුවෙන් කලාකරුවන්ට ඉටු කළ හැක්කේ විශිෂ්ට මෙහෙවරක් බවද පෙන්වාදුන් ජනාධිපති මෛත්‍රීපාල සිරිසේන එම යුතුකම් ඉටු කිරීමට ඔවුන් ඉදිරියට පැමිණෙනු ඇති බවට ද විශ්වාසය පළ කර සිටියේය.
Facebook Comments
