අධිකරණ නියෝග ලබා ගනිමින්, මළවුන්ට උපහාර දැක්වීමේ අයිතිය අහිමි කිරීමට පොලීසිය ගන්නා උත්සාහයන් හමුවේ නොනැවති දිලීපන් අනුස්මරණය කිරීමට උතුරේ සිසු හා දේශපාලන ක්රියාධරයන් පිරිසක් කටයුතු කර තිබේ.
දෙමළ අයිතිය වෙනුවෙන් සාමකාමී උපවාසයක යෙදී 34 අවුරුද්දකට පෙර දිවි පිදූ තිලීපන් නමින් ප්රකට රාසයියා පාර්තීපන් වෙනුවෙන් සැප්තැම්බර් 26 වැනි ඉරිදා උතුරේ ස්ථාන කිහිපයකම පුෂ්ප උපහාර හා පහන් දැල්වුන බවයි පළාත් බද වාර්තාකරුවන් පවසන්නේ.
සිය නිවස ආසන්නයේ නිල ඇදුමින් සැරසුන පොලිස් නිලධාරීන් පිරිසක් යොදවා තිබියදීත් තිලීපන්ගේ ඡායාරූපය සහිත බැනරයක් ඉදිරියේ ඉටිපන්දම් දල්වා පුෂ්ප උපහාර දැක්වීමට දෙමළ ජාතික සන්ධානයේ හිටපු පාර්ලිමේන්තු මන්ත්රී එම්.කේ සිවාජිලිංගම් කටයුතු කර තිබුනි.
තමිළ් අරසු කච්චි (ITAK) මධ්යම කාරක සභික පීටර් ඉලන්චේලියන් ද තම නිවසේදී රාසයියා පාර්තීපන් වෙනුවෙන් පුෂ්ප උපහාර දක්වා පහනක්ද දල්වමින් අනුස්මරණය සිදු කර තිබුනි.
යාපනය විශ්වවිද්යාලයේ සිසුන් පිරිසක්ද රාසයියා පාර්තීපන් වෙනුවෙන් ඊයේ දිනයේ උපහාර දැක්වු බව පළාත් බද වාර්තාකරුවෝ පවසති.
මුලතිව් දිස්ත්රික්කයේ 25 දෙනකුට ආසන්න සංඛ්යාවකට එරෙහිව තිලීපන් සමරු තහංචි පනවමින් උසාවි නියෝග නිකුත් කර තිබුනේ ජනාධිපතිවරයා සංහිඳියාවට කැප වෙන බවට ලෝක නායකයන් ඉදිරියේ එක්සත් ජාතීන්ගේ මහා සභාවේදී පොරොන්දු දී තිබියදීය.
මිය ගිය අයටත් තහනම් නියෝග
රාසයියා පාර්තීපන් සමරුවක් පැවැත්වීමට උතුරු පළාත් සභාවේ හිටපු උප සභාපතිවරයකු සැරසෙන බවට පොලිසිය කළ පැමිණිල්ලක් අනුව 2016 දී අභාවප්රාප්ත වූ දෙමළ ජාතික සන්ධානයේ හිටපු පළාත් සභික ඇන්ටන් ජෙගනාදන් වෙතත් මුලතිව් මහේස්ත්රාත් ආර් සරවනරාජා විසින් තහනම් නියෝගය නිකුත් කර තිබුනි.
උසාවිය නිකුත් කළ තහනම් නියෝගය භාර දෙන්නට ගියවිට ඔහුගේ පුත්රයා විසින් පොලිස් නිලධාරීන් යොමු කර තිබුනේ සුසාන භුමිය ටය.
“අපේ අප්පා මැරිලා අවුරුදු පහක් වෙනවා. එයාටම උසාවි නියෝගය දෙන්න ඕනේ නම් සොහොනට එක්කගෙන යන්නම්,” යයි පොලිස් නිලධාරීන්ට කී පසු ඔවුන් හැරී ගිය බව මියගිය දේශපාලකයාගේ පුත් පීටර් ඉලන්චේලියන් පළාතේ මාධ්යවේදීන්ට පවසා තිබුණි.
හිටපු පළාත් සභා මන්ත්රී තුරෙයිරාසා රවිකරන්, හිටපු පාර්ලිමේන්තු මන්ත්රී එම්. කේ සිවාජිලිංගම් සහ බලහත්කාරයෙන් අතුරුදහන කරනු ලැබුවන්ගේ සංගමයේ මුලතිව් නායිකා මරියසුරේෂ් ඊශ්වරීට විරුද්ධව අධිකරණ තහනම් නියෝගය පනවා තිබුනි.
ත්යාගී තිලීපන් අනුස්මරණ කිරීමට ගිය දෙමළ ජාතික ජනතා පෙරමුණේ පාර්ලිමේන්තු මන්ත්රී සෙල්වරාසා ගජේන්ද්රන් සැප්තැම්බර් 23 වැනිදා යාපනය පොලීසිය විසින් අත්අඩංගුවට ගෙන පසුව ඇප මත මුදා හැර තිබුණි.
සැප්තැම්බර් 15 වැනිදා සිට 26 වැනිදා දක්වා මඩකළපුව කාත්තාන්කුඩි පොලිස් වසමට අයත් ඉඩමක පැවැත්වීමට නියමිතව තිබු තිලිපන් සමරුව මඩකළපුව මහේස්ත්රාත් අධිකරණය මගින් තහනම් කර තිබුනේ කාත්තාන්කුඩි පොලිසියේ ඉල්ලීමකටය.
මඩකලපුව මහේස්ත්රාත් අධිකරණය මගින් තිලීපන් සමරුව අපරාධ නීතිය යටතේ තහනම් කරමින් නියෝගය නිකුත් කර ඇත්තේ මඩකළපුව නගරාධිපති ත්යාගරාජා සරවනබවන්, ක්රිෂ්ණපිල්ලෛ සේයෝන්, පෙරිම්බරාසා ජෙනගන්, සහ කදීහරන් නිසාන්තන් සමරු සංවිධායකයන් වෙතයි.
සිංහල හමුදා කඳවුරු දෙමළ පළාත් වලින් ඉවත් කර ගත යුතුයි, දෙමළ ජනතාවගේ පළාත්වල තාවකාලික දෙමළ ආණ්ඩුවක් පිහිටුවන තෙක් පුනරුත්ථාපන වැඩ තාවකාලිකව අත්හිටවිය යුතුයි, දෙමළ ජනතාවට අයිති ගම් පළාත්වල සිංහලයන් පදිංචි කරවීම කරගෙන යාම නැවැත්විය යුතුයි, දෙමළ පළාත්වල සිංහල පොලිස් ස්ථාන පිහිටුවීම නතර කළ යුතුයි, ත්රස්තවාදය වැලැක්වීමේ පනත යටතේ පොලිස් ආරක්ෂක මූලස්ථාන වල සිටින දේශපාලන රැඳවුම්කරුවන් වහා නිදහස් කළ යුතුයි ආදී ඉල්ලිම් ඉදිරිපත් කරමින් 1987 සැප්තැම්බර් 15 වනදා තීලිපන් උපවාසයක් ආරම්භ කළේය.
යාපනය විශ්ව විද්යාලය ඉදිරිපිට උපවාසයක යෙදී සිටියදී තිලීපන් මිය ගියේ 1987 සැප්තැම්බර් 26 වෙනිදා ය.
Facebook Comments
