දෙමළ ජාතික සන්ධාන නියෝජිතයන් මේ සතියේ සිට ඇමෙරිකාව ප්‍රමුඛ බටහිර රටවල සංචාරය කිරීමේ අරමුණ රාජපක්‍ෂ ආණ්ඩුවට සහාය දැක්වීමද යන්න සම්බන්ධයෙන් දෙමළ ජනතාව අතර සැක මතුවී තිබේ.
ඇමරිකා එක්සත් ජනපදය බලා සති අන්තයේ කොළඹින් ගුවන් ගත වූ ඇම් ඒ සුමන්දිරන් මන්ත්‍රීවරයා ඇතුළු මුල් පෙලේ නීතිඥ තුන් කට්ටුවක් ඉන් අනතුරුව කැනඩාව හා බ්‍රිතාන්‍යය බලා යන බව දෙමළ ජාතික සන්ධාන ප්‍රකාශකයෙක් පැවසීය. මඩකලපු දිස්ත්‍රික් මන්ත්‍රී ෂානක්‍යන් රාසමානික්කම් බ්‍රිතාන්‍යයේදී සුමන්දිරන් මන්ත්‍රීවරයා මුණගැසීමට නියමිතය.
ඇමෙරිකානු රාජ්‍ය දෙපාර්තමේන්තුවේ ඇරයුමකින් පැවැත්වෙන වොෂින්ටන් සාකච්ජාවන්ට සහභාගී වෙන කණ්ඩායම දෙමළ ජාතික සන්ධානයේ පාර්ලිමේන්තු මන්ත්‍රී ඇම්.ඒ සුමන්දිරන්, ජනාධිපති නීතිඥ කේ. කනග්-ඊශ්වරන් සහ නීතිවේදිනී ආචාර්ය නිර්මලා චන්ද්‍රහසන් ගෙන් සමන්විත වේ.
සිය දරුවන් හා ඥාතීන් වෙනුවෙන් යුක්තිය ඉල්ලා දින 1730 ක් පුරා සත්‍යග්‍රහ ව්‍යාපාරයක නිරතව සිටින බලහත්කාරයෙන් අතුරුදහන් කළවුන්ගේ ඥාතීන්ගේ සංගමය පවසන්නේ දෙමළ ජාතික සන්ධාන නියෝජිත පිරිස විදේශ රාජ්‍ය නායකයන් මුණ ගැසීමට යන්නේ “ජාත්‍යන්තර අපරාධ අධිකරණයෙන් ශ්‍රී ලංකා ආණ්ඩුව බේරා ගැනීමට“බවයි.
ඔවුන් මේ බව කියා සිටියේ පහළොස් වසරකට පෙර මග මගදී වෙඩි තබා මරා දැමුණු දෙමළ ජාතික සන්ධානයේ නායකයෙකු වූ නඩරාජා රවිරාජ් වව්නියාවේ සත්‍යග්‍රහ භූමියේදී ඉකුත් 10 වැනිදා අනුස්මරණය කරමින්ය.
“ඇමෙරිකාවට ගොස් දෙමළ ජනතාව හෑල්ලුවට ලක් කරන්න එපා,“යැයි වව්නියා දිසා අතුරුදහන් කළවුන්ගේ ඥාතීන්ගේ සංගමයේ ලේකම් ගෝපාලක්‍රිෂ්ණන් රාජ්කුමාර් සුමන්දිරන් ඇතුළු පිරිසගෙන් ඉල්ලීමක් කළේය.
ඇමරිකානු මැදිහත් වීම
ආණ්ඩුව ගෙන ඒමට සැලසුම්කර ඇති නව ව්‍යවස්ථාව සඳහා දහ තුන්වැනි ව්‍යවස්ථා සංශෝධනයෙන් ඔබ්බට යන බලය බෙදීමක් වෙනුවෙන් ඇමෙරිකා එක්සත් ජනපදයේ රාජ්‍ය දෙපාර්තමේන්තුව සමග සාකච්ජා කිරීම සිය අරමුණ ලෙසින් දෙමළ ජාතික සන්ධානය ප්‍රකාශයට පත් කර තිබේ.
මීට සති කිහිපයකට පෙර ලංකාවේ ඇමෙරිකානු තානාපතිනිය හමුවූ ආර් සම්බන්ධන් ප්‍රමුඛ මන්ත්‍රී කණ්ඩායමට ඇය අවධාරණය කළේ නව ව්‍යවස්ථාව ගැන සාකච්ඡා කිරීමට සන්ධානය වෙනුවෙන් විද්වත් මණ්ඩලයක් වොෂින්ටනයට යවන ලෙසයි. ඒ අනුව මෙම දුත ගමන සංවිධානය කර තිබේ.
ශ්‍රී ලංකාවේ මානව හිමිකම් උල්ලංඝන සම්බන්ධයෙන් එක්සත් ජාතීන්ගේ මානව හිමිකම් කවුන්සලය විසින් සම්මත කරගෙන ඇති යෝජනාවේ ආරම්භක පාර්ශවකරුවකු ලෙසින් තම අපේක්ෂාවන් සම්බන්ධයෙන් එක්සත් ජනපදය දැනුවත් කිරීමේ අවශ්‍යතාවක් ඇති බව දෙමළ ජාතික සන්ධාන නායකත්වයේ පිළිගැනීමයි.
පාර්ලිමේන්තු මන්ත්‍රී සුමන්තිරන් සති අන්ත ඉංග්‍රීසි පුවත් පත් වෙත ප්‍රකාශ කර තිබුනේ රාජපක්‍ෂ ආණ්ඩුව විසින් සම්පාදනය කෙරෙන නව ව්‍යවස්ථාව සැලකිල්ලට ගනිමින් බලය බෙදීම පිළිබඳ ෆෙඩරල් විසඳුමක් ගැන එක්සත් ජනපද නිලධාරීන් දැනුවත් කරන බවයි.
“අපගේ දේශපාලන අභිලාෂයන් මොනවාද, එක්සත් ජනපදයට සමාන අනෙකුත් රටවල ඇති ෆෙඩරල් ව්‍යුහයන් ගවේෂණය කිරීමෙන්, ගැටුමට විසඳුමක් ලබා ගැනීමට අප අදහස් කරන්නේ කෙසේද යන්න පැහැදිලි කරනවා,” යැයි සුමන්තිරන් පැවසු බව එම වාර්තා වැඩි දුරටත් සඳහන් කරයි.
ජනාධිපති නීතීඥ රොමේෂ් ද සිල්වාගේ ප්‍රධානත්වයෙන් යුත් නව ව්‍යවස්ථා සම්පාදන කමිටුව නව ආණ්ඩුක්‍රම ව්‍යවස්ථාවේ පළමු කෙටුම්පත මේ වනවිටත් පවතින්නේ අවසන් අධියරේ බව අගමැති මහින්ද රාජපක්‍ෂ පාර්ලිමේන්තුවේදී කියා සිටියේ ජනතා විමුක්ති පෙරමුණේ නායක අනුර කුමාර දිසානායක ඇසු පැනයකට දෙමින්ය.
දෙමළ ජාතික සන්ධාන නියෝජිත පිරිසේ එක්සත් ජනපද සංචාරය සිදුවන්නේ, 13 වැනි ආණ්ඩුක්‍රම ව්‍යවස්ථා සංශෝධනය සම්පුර්ණයෙන්ම ක්‍රියාත්මක කරන ලෙස ඉල්ලා දෙමළ පක්‍ෂ හා මුස්ලිම් කොංග්‍රසය අතර යාපනයේ පැවති නායක මට්ටමේ සාකච්ඡාවකින් අනතුරුවය.
දෙමළ ජාතික සන්ධානය නියෝජනය කරන සෙසු පක්‍ෂ මෙම සාකච්ජාවට එක්ව සිටිය ද සන්ධානයේ ප්‍රබලතම පක්‍ෂය වන තමිල් අරසු කච්චි නියෝජිතයෝ කිසිවෙක් ඊට සහභාගි නොවුහ.
ඊට අමතරව පාර්ලිමේන්තු නියෝජනයක් ඇති දෙමළ ජාතික ජනතා පෙරමුණ සහ දෙමළ ජාතික මහජන සංසදය ද මේ සඳහා සිය දායකත්වය ලබා දී නොතිබිණි.
සම්බන්ධන් සුමන්දිරන් මන්ත්‍රීවරු හා තමිල් අරසු කච්චි නායක මාවෙයි සේනාධිරාජා නොවැම්බර් 11 වැනිදා හමුවූ මෙරට ඉන්දීය මහ කොමසාරිස් ගෝපාල් බග්ලේ දැඩි ලෙස කියා ඇත්තේ දෙමළ-මුස්ලිම් පක්‍ෂ නායකයන්ගේ සාකච්ජාවට දායක වන ලෙසයි.
මුස්ලිම් කොන්ග්‍රස් නායක රවුෆ් හකීම් සහ දෙමළ ප්‍රගතිශීලි සන්ධානයේ මනෝ ගනේෂන් යාපනේ කතා බහෙන් අනතුරුව හිටපු විපක්‍ෂ නායක සම්බන්ධන් හමුවී ඉදිරි කටයුතු වලට එක්වන ලෙස ඉල්ලා තිබේ.
“ඒකීය රාජ්‍ය යටතේ ගන්නා තීන්දු තත්වය තවත් බරපතල කරන නිසා, දෙමළ ජනයාට ස්ථිර සාර විසදුමක් වෙන්නේ උතුරු නැගෙනහිර ඒකාබද්ධ කරලා පෙඩරල් ක්‍රමයට ගන්නා විසදුමක්, මේ යන කණ්ඩායම ඒ සඳහා ඇමෙරිකාවට බලපෑම් කළ යුතුයි,“ යනුවෙන් දෙමළ ජනතා ජාතික සන්ධානයේ නායක, උතුරු පළාතේ හිටපු මහ ඇමැති, පාර්ලිමේන්තු මන්ත්‍රී සී.වී.විග්නේශ්වරන් පවසයි.
මාධ්‍ය වෙත අදහස් දැක්වූ හිටපු මහ ඇමැති විග්නේශ්වරන් කියා සිටින්නේ දෙමළ ජනයාගේ ගැටලුවලට විසදුමක් ලෙස ඉන්දියාවේ මැදිහත්වීමෙන් ලංකා පාර්ලිමේන්තුවේ සම්මත කළ 13 වැනි ව්‍යවස්ථා සංශෝධනය ඒකීය රාජ්‍ය යටතේ ක්‍රියාවට නැංවූ පරිපාලන ව්‍යුහයක් බවයි.
“ජාතික ප්‍රශ්නයට විසඳුම් ලෙස ඉල්ලා සිටිය යුත්තේ, නැවත කැඳවිය නොහැකි අයුරින් වන බලය බෙදීමක්, පෙඩරල් ක්‍රමය තමයි ඊට ගැලපෙන්නේයැ,“ යි විග්නේශ්වරන් අවධාරණය කරයි.
Facebook Comments
