ජනාධිපති රනිල් වික්‍රමසිංහ සහ දෙමළ නායකයන් අතර යෝජිත සාකච්ජා නිරීක්ෂණයට ජාත්‍යන්තරය මැදිහත් විය යුතු බවට උතුරු – නැගෙනහිර අතුරුදහන් කළවුන්ගේ ඥාතීන්ගේ සංගමය අවධාරණය කර තිබේ.
“කපටි දේශපාලඥයකු වූ ජනාධිපති රනිල් වික්‍රමසිංහ සමඟ කතා කරන්න යන දෙමළ නායකයෝ ඔහුගේ දේශපාලන ඉතිහාසය මතක් කර ගන්න ඕනෑ. ඔහු දෙමළ ජනතාවට එරෙහිව බොහෝ දේ කරපු කෙනෙක්,” යැයි උතුරු -නැගෙනහිර අතුරුදහන් කළවුන්ගේ ඥාතීන්ගේ සංගමයේ ලේකම් ජී රාජ්කුමාර් පවසයි.
රජයේ හමුදා මගින් බලහත්කාරයෙන් අතුරුදහන් කළ තම ආදරණීයයන් වෙනුවෙන් යුක්තිය පතා දින 2100 කට ආසන්න දිගු නොනිමි අරගලයක නිරත උතුරේ මව්වරුන්ගේ වව්නියා සටන් බිමේ දී මාධ්‍ය වෙත අදහස් දක්වමින් රාජ් කුමාර් මේ බව පවසා තිබේ.
“සිංහල ජනතාවගෙන් ප්‍රතික්ෂේප වුනු රනිල් ගෝල්ෆේස් අරගලයට සහාය දෙන විදිහට නාටකයක් කරලා ජනාධිපති පුටුවට ඇවිත් හමුදාව දාලා අරගලකරුවන්ටම පහර දුන්නා.”
“සටන් විරාමය කාලයේදී කරුණා අම්මාන්ට පගා දීලා අපේ නිදහස් සටන විනාශ කළා.”
බලහත්කාරයෙන් අතුරුදහන් කළවුන්ගේ ඥාතීන්ගේ සංගමයේ ලේකම්වරයා පෙන්වා දෙන්නේ පසුගිය යුද සමයේ දෙමළ ජනයා 140000 මරා දමා,දේපොළ විනාශ කිරීම් වලට රනිල් වික්‍රමසිංහ ද වගඋත්තරකරුවෙක් බව ඔහු සමඟ සාකච්ජාවට යන දෙමළ නායකයන් සිහි තබා ගත යුතු බවයි.
” TNA සහයෝගයද ඇතිව දෙමළ ප්‍රදේශවල සිංහල-බෞද්ධ පන්සල් 1000 ක් හදන්න `බජට්` එකෙන් මුදල් පාස් කර ගත්තා.”
“වවුනියාවේ නෙදුන්කර්නි වල පිටතින් ගෙනාපු සිංහල අය 4000 ක් පදිංචි කරන්න දෙමළ මිනිස්සුන්ගේ ඉඩම් අරගන්න වැඩ කලෙත් රනිල්.”
දෙමළ ජනයා බහුතරය වෙසෙන උතුරු – නැගෙනහිර පළාත් වෙන් වෙන්ව පාලනය කර ගෙන යන ජනාධිපති වික්‍රමසිංහ, හම්බන්තොට වරාය ගිවිසුම් මගින් චීනයට ලබා දී, දෙමළ ප්‍රදේශ වල මුහුදු කූඩැල්ලන් ව්‍යාපෘති සඳහා චීන සමාගම්වලට මග සකසා ඇති බවට අතුරුදහන් කළවුන්ගේ ඥාතීන්ගේ සංගමයේ ලේකම්වරයා චෝදනා කරයි.
“දෙමළ නායකයන් සමඟ සිංහල නායකයන් කරපු හැම කතා බහක්ම කුණු කූඩේට විසිකරලා දැම්මා. මේ ඉතිහාසය ගැනත් දෙමළ නායකයෝ සිහි කරගන්න ඕනෑ.”
Facebook Comments
