සිසු දැරියක් ගැබ් ගැන්වු තරුණයා රිමාන්ඩ්

0

දිනකට අඩුම වශයෙන් ස්ත්‍රී දූෂණ හතරක් සිදුවන ශ්‍රී ලංකාවේ, වයස අවුරුදු 15 ක පාසල් වියේ පසුවන දැරියක් ගැබිනියක කර, පලා ගොස් සිටි සැකකරුවෙකු අත්අඩංගුවට ගත් බව ජාතික ළමා ආරක්ෂක අධිකාරිය පවසයි.

වයස අවුරුදු 22 ක තරුණයෙකු සමග ඇති කරගත් ප්‍රේම සබඳතාවක් හේතුවෙන් ගර්භනී භාවයට පත්වූ වයස අවුරුදු 15ක දැරියක් සම්බන්ධයෙන්, ජාතික ළමා ආරක්ෂක අධිකාරියේ විශේෂ පොලිස් විමර්ශන ඒකකය වෙත ලැබුණු පැමිණිල්ලකට අනුව සිදුකළ විමර්ශනයක් මගින්, සැකකරු අත් අඩංගුවට ගෙන අධිකරණයට ඉදිරිපත් කිරීමෙන් පසු රක්ෂිත බන්ධනාගාර ගතකර තිබේ.

2019 වසරේ ජූනි මාසයේ දිනක බස් රථයක නැගී යන අතරතුරදී, දැරියට මෙම තරුණයා මුණගැසී ඇති අතර එහිදී ඔවුන් දෙදෙනා ප්‍රේම සබඳතාවක් ගොඩනගාගෙන ඇති බව ජාතික ළමා ආරක්ෂක අධිකාරිය අගෝස්තු 26 බදාදා නිකුත් කළ නිවේදනයක දැක්වේ.

ප්‍රේම සම්බන්ධතාවයෙන් මාසයකට පසුව දින කිහිපයක්ම ඔවුන් දෙදෙනා එකට ජීවත් වීමෙන් පසුව මෙම දැරියව පිටකොටුව බස් නැවතුම්පලට ගෙනවිත් ඇරලවා ඇති බව ජාතික ළමා ආරක්ෂක අධිකාරියයේ සභාපති මහාචාර්ය මුදිත විදානපතිරණ සදහන් කරයි.

පසුව ගර්භනී තත්ත්වයට පත්වී ඇති මෙම දැරිය, දරු ප්‍රසූතිය සඳහා රෝහල් ගත කිරීමෙන් අනතුරුව දියණියක් බිහි කර තිබේ.

ඒ පිළිබඳව රෝහලේ වෛද්‍යවරයෙකුගෙන් ජාතික ළමා ආරක්ෂක අධිකාරිය වෙත ලැබුණු පැමිණිල්ලකට අදාළව විමර්ශන කටයුතු සිදුකර කළ බව මහාචාර්ය මුදිත විදානපතිරණ වැඩි දුරටත් සදහන් කරයි.

එහිදී, මෙම සැකකාර තරුණයා සම්බන්ධ කිසිදු තොරතුරක් දැරිය විසින් දැන නොසිටි අතර, පසුව දැරිය වෙත දුරකථන ඇමතුම් ලබා දුන් දුරකථන අංකය ඔස්සේ පර්යේෂණ කටයුතු සිදු කර තරුණයා අත්අඩංගුවට ගෙන ඇති බව ජාතික ළමා ආරක්ෂක අධිකාරිය පවසයි.

අත්අඩංගුවට ගත් සැකකාර තරුණයා අධිකරණයට ඉදිරිපත් කර, රක්ෂිත බන්ධනාගාර ගත කොට තිබේ.

මෙවැනි වරදක් සිදු කරනු ලබන තැනැත්තෙකුට 1995 අංක 22 දරණ ලංකා දණ්ඩ නීති සංග්‍රහයේ (සංශෝධිත) වගන්ති අංක 364 (1) යටතේ, ස්ත්‍රී දූෂණය වරද සඳහා අවු. 7ට නොඅඩු 20ට නොවැඩි බරපතළ වැඩ සහිතව බන්ධනාගාරගත කිරීමක්, රුපියල් විසිදහසක් නොඉක්මවන දඩයක් හා වින්දිත ළමයාට වන්දි මුදලක් ගෙවීමට ද වගන්ති අංක 354 යටතේ, නීත්‍යානුකූල භාරකාරිත්වයෙන් අපහරණය කිරීමේ වරද සඳහා අවු. 7ක බරපතළ වැඩ ඇතිව හෝ නැතිව බන්ධනාගාරගත කිරීමක් හා දඩයක් ගෙවීමට ද සිදුවන බව ජාතික ළමා ආරක්ෂණ අධිකාරිය අවධාරණය කරයි.

ළමයින් අනිවාර්ය අධ්‍යාපනය ලැබිය යුතු වයස් සීමාව තුළ, අනිවාර්ය අධ්‍යපනය ලබා ගැනීම සඳහා යොමු කරන ලෙසත්, ළමයින්ගේ ක්‍රියාකාරකම්, ඔවුන් ඇසුරු කරන පුද්ගලයන් හා යන එන ස්ථානයන් පිළිබඳව නිරන්තරයෙන්ම වඩාත් විමසිලිමත්ව කටයුතු කරන ලෙසත් ජාතික ළමා ආරක්ෂක අධිකාරිය දෙමව්පියන්ගෙන්, වැඩිහිටියන්ගෙන් හා භාරකරුවන්ගෙන් වැඩි දුරටත් ඉල්ලා සිටී.

ළමා අපයෝජන සම්බන්ධයෙන් දැනුම් දීම සදහා ජාතික ළමා ආරක්ෂණ අධිකාරිය 1929 කෙටි දුරකථන ඇමතුම් අංකයක්ද හදුන්වා දී තිබේ.

අපරාධ සහ සංවිධානාත්මක අපරාධ දිසාව භාර නියෝජ්‍ය පොලිස්පති ප්‍රියන්ත ජයකොඩි 2019 වසරේ අපරාධ සංඛ්‍යා ලේඛන උපුටා දක්වමින් පසුගියදා හෙළි කර තිබුනේ ශ්‍රී ලංකාවේ සෑම පැය දෙකකට වරක්ම කුඩා දරුවකු අපචාරයට ගොදුරු වන අතර දිනකට අඩුම වශයෙන් ස්ත්‍රී දූෂණ හතරක් වාර්තා වන බවයි.

Facebook Comments