රුපියල් කෝටි 2 ක අල්ලසක් ලබා ගැනීමේදී අත්අඩංගුවට ගත් ජනාධිපති කාර්ය මණ්ඩල ප්‍රධානී එච්.අයි. මහනාම සහ රාජ්‍ය දැව සංස්ථාවේ සභාපති පී. දිසානායක බන්ධනාගාර ගත කරන ලෙස අධිකරණය නියෝග කර තිබේ.
අල්ලස් කොමිසම මඟින් අත්අඩංගුවට ගත් මෙම සැකකරුවන් දෙදෙනා 03 බ්‍රහස්පතින්දා රාත්‍රී කොළඹ ප්‍රධාන මහේස්ත්‍රාත් ලාල් රණසිංහ බණ්ඩාර වෙත ඉදිරිපත් කිරිමෙන් අනතුරුව ලබන 09 වනදා දක්වා රක්ෂිත බන්ධනාගාර ගත කර ඇත.
මෙරට කර්මාන්ත ශාලාවක් ස්ථාපිත කිරීමට සූදානම් වූ ඉන්දියානු ව්‍යාපාරිකයෙකුගෙන් එම කටයුතු ඉටුකර දීම සඳහා රුපියල් කෝටි 10ක මුදලක් අල්ලස් වශයෙන් ඉල්ලා ඉන් රුපියල් කෝටි 2 ක මුදලක් අල්ලස් වශයෙන් ලබාගත් අවස්ථාවේ දී අල්ලස් කොමිසමේ නිලධාරීන් විසින් මෙම සැකකරුවන් දෙදෙනා අත්අඩංගුවට ගන්නා ලදී.
මේ අතර ජනාධිපති කාර්යාලයේ ජ්‍යෙෂ්ඨ නිළධාරියාගේ සහ රාජ්‍ය සංස්ථා සභාපතිවරයාගේ සේවය වහාම ක්‍රියාත්මක පරිදි අත්හිටුවීඹට ජනාධිපතිවරයා නියෝග කළේය.
ඔවුන්ට එරෙහිව කිසිදු බලපෑමකින් තොරව නීතිය දැඩිව ක්‍රියාත්මක කරන ලෙස සියලු බලධාරින්ට දැනුම්දුන් බව ජනාධිපති මාධ්‍ය අංශය නිවේදනය කරන්නේ.
නීතිය ක්‍රියාත්මක කිරීමේ වගකීම දරණ රජයේ නිළධාරින්ට සිය රාජකාරිය නිසි ලෙස ඉටුකිරිම පිණිස වර්තමාන රජය යටතේ ඇති කර තිබෙන ස්වාධින හා අපක්ෂපාති පසුබිම පිළිබඳව තමා සතුටු වන බවට ජනාධිපතිවරයා ප්‍රකාශ කල බව ද එම ඒකකය පවසයි.
Facebook Comments
