කොරෝනා වසංගතය හමුවේ ඇති වී තිබෙන ආර්ථික අර්බුදයෙන් ගොඩ ඒමට ණය කපාහැරීමක් සිදුවන්නේ නම් එය ශ්‍රී ලංකාවට ප්‍රතිඵලදායක වනු ඇති බව විදේශ දූත පිරිසක් හමුවේ පවසා ඇති ජනාධිපතිවරයා මෙරට ආර්ථිකය නැංවීමට විකල්පය ණය ලබා ගැනීම නොව ආයෝජන බව ප්‍රකාශ කර තිබේ.
ජනාධිපති ගෝඨාභය රාජපක්ෂ සහ යුරෝපා සංගමයේ කොළඹ සිටින තානාපතිවරු හමුවී කොවිඩ් – 19 අර්බුදයෙන් පසු ආර්ථිකය නැවත ගොඩනැංවීම පිළිබඳව ජනාධිපති ලේකම් කාර්යාලයේදී 18 බදාදා පැවති සාකච්ඡාවකදී මේ බව පවසා ඇතැයි ජනාධිපති මාධ්‍ය ඒකකය නිවේදනය කරයි.
වසංගතය හේතුවෙන් උද්ගත වූ සෞඛ්‍ය අභියෝග ආමන්ත්‍රණය කිරීම සඳහා මහජන සෞඛ්‍ය සේවාව කඩිනමින් යොදා ගැනීමට ශ්‍රී ලංකාව ක්‍රියා කළ බව පෙන්වා දී ඇති ජනාධිපතිවරයා පොලීසියේ සහ ආරක්ෂක අංශවල සහයෝගය ඇතිව මහජන සෞඛ්‍ය පරීක්ෂකවරු විසින් නිවැරදිව ආසාදිතයන් පමණක් නොව ඔවුන් සමීපව ඇසුරු කළ පුද්ගලයන් ද හඳුනා ගැනුණු අතර ඔවුන් නිරෝධායනය සඳහා යොමු කිරිම නිසාවෙන් වෛරසය සාර්ථකව පාලනය කර ගැනීමට හැකි වු බවයි පවසා ඇත්තේ.
ආර්ථිකය නැවත ගොඩනැංවීම රට ඉදිරියේ ඇති ඊළඟ අභියෝගය බව යුරෝපා සංගමයේ නියෝජිතයන් හට පෙන්වා දී ඇති ජනපති වත්මන් ආර්ථික වර්ධන වේගය ඉතා පහළ අගයක් ගන්නා බවත් ජාතික ණය ප්‍රමාණය ඉහල ගොස් ඇති බවද කියා සිටි බවයි ජනාධිපති මාධ්‍ය ඒකකය පවසන්නේ.
ජනාධිපති ගෝඨාභය රාජපක්ෂ හට යුරෝපා සංගමයේ කොළඹ සිටින තානාපතිවරුන්ගෙන් ධනාත්මක ප්‍රතිචාර ලැබුන බව සහ තම රටවලට මෙම ක්ෂේත්‍රයන්හි දී ශ්‍රී ලංකාවට සහාය වීමේ විවිධ ක්‍රම පිළිබඳව ද දීර්ඝ ලෙස සාකච්ඡා කළ බව ජනාධිපති මාධ්‍ය ඒකකය වැඩි දුරටත් වාර්තා කර ඇත.
Facebook Comments
