ඔළුගෙඩි වෙනස්කර ආණ්ඩු බලය ලබා ගැනීම සිහිනයක් පමණයි – ජනපති

0

පාර්ලිමේන්තුවේ ඔළුගෙඩි ප‍්‍රමාණය වෙනස්කර ආණ්ඩු බලය ලබා ගැනීමට කවුරුන් සිහින දුටුව ද අලුත් ආණ්ඩුවක් සෑදීමට නම් තම කැමැත්ත සහ ආශිර්වාදය අනිවාර්යයෙන් ලබාගත යුතු බව සියලුදෙනා සිහිතබාගත යුතු බව ජනාධිපතිවරයා පවසයි.

පාර්ලිමේන්තුවේ ආසන 113 ක් හදාගැනීමෙන් පසුව ආණ්ඩුව සහ ජනාධිපතිවරයාත් අවසන් බවට විපක්ෂයේ මන්ත්‍රීවරයෙක් මෙන්ම හිටපු අමාත්‍යවරයෙක් ජාතික පුවත්පතකට කර තිබූ ප‍්‍රකාශය ද සිහිපත් කළ ජනාධිපති මෛත්‍රීපාල සිරිසේන කියා සිටියේ පාර්ලිමේන්තුවේ බහුතර ආසන ලබාගත්ත ද ආණ්ඩුක‍්‍රම ව්‍යවස්ථාව අනුව අලුත් ආණ්ඩුවක් සාදා ගැනීමේ සිහිනය තම ආශිර්වාදයෙන් තොරව කිසිවෙකුට ඉටුකරගත නොහැකි බවයි.

රටක් ලෙස ඉදිරියට යාමට තිබෙන බාධක ඉවත් කර ගනිමින්, වත්මන් ආණ්ඩුව සිය කටයුතු ඉදිරියට කරගෙන යද්දී පුහු ඝෝෂාකාරීන් පිරිසක් විසින් රට තුළ විවිධ නොසන්සුන්තාවයන් ඇතිකරමින් සිටින බව පෙන්වා දුන් ජනපති අද ඇතැම් මාධ්‍ය තුළ ද ඉඩ ලැබී තිබෙන්නේ යහපත් දේ කරන සහ රට පිළිබඳ සැබෑ හැඟීමකින් කටයුතු කරන පිරිස සඳහා නොව, පුහු ඝෝෂාකාරීන් සඳහා බැවින් රටේ සුළුතර පිරිසක් ආණ්ඩුව පිළිබඳ වැරදි අවබෝධයක් ඇතිකරගෙන තිබෙන බව ද ප‍්‍රකාශ කළේය.

වෙනස ඉවසා ගත නොහැකි

වංචාව, දුෂණය, නාස්තිය මෙන්ම පවුල්වාදය වපුරමින් සහ බලය අනිසි ලෙස භාවිතා කරමින් රට ගෙන ගිය ගමන වෙනස් කර, රටේ නිදහස සහ ප‍්‍රජාතන්ත‍්‍රවාදය සුරක්ෂිත කරමින් යහපත් රටක් ගොඩනැගීමට ගමෙන් පැමිණි නායකයෙකු ලෙස තම නායකත්වය යටතේ වත්මන් රජය ගෙනයන වැඩපිළිවෙළ ඉවසාගත නොහැකිව ඇතැමුන් මෙම ඝෝෂා පවත්වමින් සිටින බව ජනාධිපති සිරිසේන කියා සිටියේ 31 සදුදා හිඟුරක්ගොඩ කලාප අධ්‍යාපන කාර්යාලයේ නව ගොඩනැගිල්ල විවෘත කිරීමේ අවස්ථාවේදීය.

වැරදි කරන පුද්ගලයන්ට රට තුළ පැවැත්මක් නොමැති බව ද සඳහන් කළ ජනාධිපතිවරයා බෞද්ධ පින්බිමක් ලෙස මේ රටේ පැවැත්මක් ඇත්තේ සත්‍ය සහ යුක්තිය සමග සාධාරණ සමාජයක් කරා යන ගමනකට පමණක් බව අවධාරණය කළේය.

Facebook Comments

wedding people