ලසන්ත ඝාතනයේ සැකකරුවන් නිදහස් කිරීම ගැන ආණ්ඩුවට ‘පිළිකුල සහ විරෝධය’

රටේ මුල් පුටුවේ අසුන් ගැනීමට සහාය දැක්වු විශ්‍රාමික හමුදා නිලධාරීන්ගේ බලපෑම නිසා අපරාධ චූදිත හමුදා පොලිස් සාමාජිකයන් නිදහස් කර යැවීමට ජනාධිපතිවරයා පියවර ගනිමින් සිටින්නේද යන ප්‍රශ්නය මතුවී තිබේ.

ලසන්ත වික්‍රමතුංග ඝාතනයේ චූදිතයන් නිදහස් කිරීමට නීතිපති ගත් තීන්දුව ජනාධිපතිවරයාගෙන් ලත් නිර්දේශ කිරීමක් මත සිදුවුවක්
දැයි ශ්‍රී ලංකා වෘත්තීය ජනමාධ්‍යවේදීන්ගේ සංගමය සැක පළ කරයි.

“රටේ සිදුව ඇති අපරාධ සම්බන්ධයෙන් සැකකරුවන් ලෙස චෝදනා ලැබ ඇති ආරක්ෂක අංශ සාමාජිකයන් එම චෝදනාවන්ගෙන් නිදොස් කොට නිදහස් කිරීමට ජනාධිපතිවරණයේදී වත්මන් ජනාධිපතිවරයාට සහයෝගය දැක්වු විශ්‍රාමික ආරක්ෂක අංශ සාමාජිකයන්ගේ සංගම් විසින් කළ ඉල්ලීමට ජනාධිපතිවරයාගෙන් ලත් නිර්දේශ කිරීමක් නීතිපති දෙපාර්තමේන්තුව විසින් ක්‍රියාවට නගමින් පවතින්නේද යන සැකය මේ මොහොතේ සමාජය තුළ මතුව තිබීම ඉතා බරපතල තත්වයකි.”

කළු ජනවාරිය තුළ සිදු වූ බිහිසුනු සංවිධානාත්මක අපරාධයක් වු මාධ්‍යවේදී ලසන්ත වික්‍රමතුංග ඝාතනයට සැකපිට අත්අඩංගුවට ගෙන විත්තිකරුවන් ලෙස මෙතෙක් චෝදනාවන්ට සෘජුව හෝ වක්‍රව සබඳතා දැක්වූ ආරක්ෂක අංශ සාමාජිකයන් තිදෙනකු මුදා හැරීමට නීතිපතිවරයා විසින් නිර්දේශ නිකුත් කර තිබීම සම්න්ධයෙන් දැඩි පිළිකුළ හා විරෝධය දක්වමින් ශ්‍රී ලංකා වෘත්තීය ජනමාධ්‍යවේදීන්ගේ සංගමයේ සභාපති දුම්න්ද සම්පත් සහ ලේකම් රංග බණ්ඩාරනායකගේ අත්සනින් යුතුව පෙබරවාරි 05 වැනිදා නිකුත් කර තිබෙන මාධ්‍ය නිවේදනය මගින් වැඩි දුරටත් කියා සිටින්නේ අවනීතිය රජ කළ සමාජයකට නීතියේ ආධිපත්‍යය තහවුරු කිරීමට බහුතර ජනබලය ලද රජයක් යටතේද තවදුරටත් අවනීතියම ක්‍රියාත්මක වන්නේ නම් එය කණගාටුවට කරුණක් බවයි.

ලසන්ත වික්‍රමතුංග ඝාතනයේ චූදිතයන් වන හිටපු හමුදා බුද්ධි අංශ නිලධාරි ප්‍රේම් ආනන්ද උදලාගම, විශ්‍රාමික නියෝජ්‍ය පොලිස්පති ප්‍රසන්න නානායක්කාර හා ගල්කිස්ස පොලිස් අපරාධ විමර්ශන අංශයේ ස්ථානාධිපති තිස්සසිරි සුගතපාලට එරෙහිව තවදුරටත් නීති මගින් කටයුතු නොකර නිදහස් කිරීමට නීතිපති තීන්දු කර තිබේ.

එම තීන්දුව අපරාධ පරීක්ෂණ දෙපාර්තමේන්තුවේ (CID) අධ්‍යක්ෂවරයාට ජනවාරි 27 දා දැනුම් දෙන නීතිපති පාරින්ද රණසිංහ (කණිෂ්ට) ඒ පිළිබඳ ගන්නා ක්‍රියාමාර්ගය මේ සමග අමුණා ඇති ආකෘතිය මගින් මෙම ලිපිය ලැබී දින 14ක් ඇතුළතදී මා වෙත වාර්තා කරන ලෙස” නියම කර තිබුනි.

එවැනි තත්වයක් නීතිපති දෙපාර්තමේන්තුව මගින් ක්‍රියාවට නැංවීමේ සැලැස්මක් ක්‍රියාත්මක වෙමින් පවතින්නේ නම් ඒ කෙරෙහි සිය දැඩි පිළිකුළ හා විරෝධය නීතිපති දෙපාර්තමේන්තුව වෙතත්, ජනාධිපතිවරයා -අධිකරණ ඇමති – ජනමාධ්‍ය ඇමති ඇතුළු සමස්ත රජය වෙතත් ශ්‍රී ලංකා වෘත්තීය ජනමාධ්‍යවේදීන්ගේ සංගමය පළ කර තිබේ.

2020 නොවැම්බර් මාසයේ මහර හිරගෙදර රැඳවියන් 11 දෙනකු ඝාතනය කිරීම සම්බන්ධයෙන් සැකකෙරෙන පොලිස් විශේෂ කාර්ය බලකායේත්, බන්ධනාගාරයේත් නිලධාරීන්ට එරෙහි නඩුව සිරකාර අයිතිවාසිකම් ක්‍රියාධරයන්ගේ විරෝධය නොතකා හකුලා දැමීමට ඉකුත් දෙසැම්බරයේ නීතිපති ගත් තීන්දුව වැලිසර මහේස්ත්‍රාත් තුසිත ධම්මික උඩුවවිදාන ගේ විස්මයට හේතුවී තිබුණි.

ජාතික ජන බලවේගයේ විශ්‍රාමික ත්‍රිවිධ හමුදා සාමුහිකයේ ප්‍රධානී, විශ්‍රාමික මේජර් ජෙනරාල් අරුණ ජයසේකර මේ වන විට ජාතික ජන බලවේග ආණ්ඩුවේ ආරක්ෂක නියෝජ්‍ය අමාත්‍ය ලෙස පත්වීම ලැබ සිටින අතර ජාතික ජන බලවේගයේ විශ්‍රාමික පොලිස් සාමුහිකයේ ප්‍රධානී, විශ්‍රාමික නියෝජ්‍ය පොලිස්පති රවී සෙනවිරත්න මහජන ආරක්ෂක අමාත්‍යාංශයේ ලේකම් ලෙසත් පත් කර සිටී.

ඔහු යටතේ තිබෙන අපරාධ පරීක්ෂණ දෙපාර්තමේන්තුවට නීතිපතිගේ නිර්දේශය සම්බන්ධයෙන් මහජන ආරක්ෂක අමාත්‍යාංශයේ ලේකම් කිසිදු උපදේශයක් දුන් බවක් දැනගන්නට නැත.

ජාතික ජන බලවේගයේ විශ්‍රාමික පොලිස් සාමුහිකයේ ඉදිරිපෙළ සාමාජිකයෙකු වු විශ්‍රාමික ජ්‍යෙෂ්ඨ පොලිස් අධිකාරි ශානි අබේසේකර යළිත් වරක් අපරාධ පරීක්ෂණ දෙපාර්තමේන්තුවේ සේවයේ පිහිටුවා තිබේ.

අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂවරයකු වූ ශානි අබේසේකර වසරක කාලයක් සඳහා නව රජය විසින් කොන්ත්‍රාත් පදනම මත අලුතින් සේවයේ පිහිටුවා ඇත්තේ, අපරාධ බුද්ධි විශ්ලේෂණ හා නිවාරණ කොට්ඨාසයේ අධ්‍යක්ෂවරයා ලෙස ය.

ලසන්ත ඝාතන නඩුවේ සැකකරුවන් මුදා හැරීමට නීතිපති නිර්දේශ කිරීමට විරෝධය පාමින් තරුණ ජනමාධ්‍යවේදීන්ගේ සංගමය ‘අපරාධකරුවන් රකින නීතිපති ගෙදර යනු, ලසන්තගෙ නඩුවේ සැකකරුවන් නිදහස් කළ ආකාරය හෙළිකරනු’ යන ඉල්ලීම් පෙරටු කර ගනිමින් පෙබරවාරි 06 වැනි බ්‍රහස්පතින්දා දහවල් 12 ට නීතිපති දෙපාර්තමේන්තුව ඉදිරිපිටදී විරෝධතාවයක් දියත් කිරීමටත් කටයුතු සුදානම් කර තිබේ.