ශ්‍රී ලංකාවේ ආණ්ඩුව දෙමළ ජනතාවට කිසිදු යුක්තියක් හෝ ස්ථිර දේශපාලන විසදුමක් ලබා නොදෙන බව අවධාරණය කරන උතුරු නැගෙනහිර දෙපළාතේ යුද පීඩිත දෙමළ මව්වරුන් නිදහස් දිනය කළු දිනයක් ලෙස ප්‍රකාශයට පත් කරමින් විරෝධතා දියත් කර තිබේ.
‘ජාතික පුනරුදයට පෙළ ගැසෙමු’ තේමාව යටතේ 77 වැනි රාජ්‍ය නිදහස් උත්සවය පෙබරවාරි 4 වැනිදා කොළඹ නිදහස් චතුරස්‍රයේ දී අනුර කුමාර දිසානායක ජනාධිපතිවරයාගේ නායකත්වයෙන් පැවැත්වෙද්දී, කිලිනොච්චියේත්, මඩකලපුවේත් විරෝධතා දියත් කළ බලහත්කාරයෙන් අතුරුදහන් කරන ලද්දවුන්ගේ ඥාතීන් තමන් දීර්ඝකාලීනව පීඩා විදින ගැටළු වලට විසදුම් ඉල්ලා සිටියේ ජාත්‍යන්තර ප්‍රජාවෙනි.
යාපනය සරසවි සිසුන් මෙන්ම P2P නමින් ප්‍රකට පොතුවිල් සිට පොලිකන්ඩි දක්වා වූ පාද යාත්‍රාවේ සාමාජිකයන් පිරිසක්ද නිදහසේ කළු බව ප්‍රදර්ශනය කරමින් විරෝධතා දියත් කළ බවයි පළාත් බද වාර්තාකරුවන් පවසන්නේ.
අනුර කුමාර දිසානායක ජනාධිපතිවරයාගේ නායකත්වය යටතේ සමරනු ලබන පළමු නිදහස් දින උත්සවයත් පසුගිය වසරවල මෙන්ම කළු දිනයක් ලෙස නම් කළ උතුරු නැගෙනහිර බලහත්කාරයෙන් අතුරුදහන් කළවුන්ගේ උතුරේ දිස්ත්‍රික්ක පහේම ඥාතීන් එකතුවී කිලිනොච්චියේදීත්, නැගෙනහිර පලාතේ දිස්ත්‍රික්ක තුනම එකතුව මඩකලපුවේදීත් විරෝධතා දියත් කර තිබුනි.
කිලිනොච්චිය කන්දසාමි කෝවිල ඉදිරිපිටින් පෙබරවාරි 04 වැනිදා විරෝධතා පෙළපාලිය ආරම්භ කළ උතුරු පළාතේ බලහත්කාරයෙන් අතුරුදහන් කළවුන්ගේ ඥාතීහු කිලිනොච්චිය පරණ කච්චේරිය දක්වා ගමන් කර එම ස්ථානයේදී උද්ඝෝෂණය කළහ.
මඩකලපුවේ ගාන්ධි උද්‍යානය අවට විරෝධතා හෝ උද්ඝෝෂණ පැවැත්වීම තහනම් කරමින්, මේ වන විටත් විදෙස් ගතව සිටින පාර්ලිමේන්තු මන්ත්‍රී ශානක්‍යන් රාසමානික්‍යම් සහ තවත් දෙමළ ජනතා නියෝජිතයන් කිහිප දෙනකු ඇතුළු කණ්ඩායමකට එරෙහිව මඩකලපුව පොලීසිය අධිකරණ නියෝග ලබා ගෙන තිබීම නිසා නැගෙනහිර පළාතේ බලහත්කාරයෙන් අතුරුදහන් කළවුන්ගේ ඥාතීන් මඩකලපු චෙන්කලඩි පිහිටි සිත්ති විනාගයර් ( ගණ දෙවි කෝවිල) ඉදිරිපිටින් ගමන් ඇරඹු පා ගමනින් කෝම්මාතුරෙයි පිල්ලයාර්කෝවිල (ගණ දෙවි කෝවිල) තෙක් ගමන් කර එහිදී විරෝධතා දියත් කළ බවයි පළාත් බද වාර්තාකරුවන් පවසන්නේ. පිල්ලයාර් කෝවිල ඉදිරිපිටදී පොල් ගසා යුද පිඩිත දෙමළ මව්වරුන් සත්‍යක්‍රියාවක් කර තිබුනි.
‘පෙඩරල් ව්‍යවස්ථාවක් යටතේ තිරසාර විසඳුමක් ලබාදීමට ජනාධිපති අනුර කුමාර දිසානායකට සිත් පහල වේවා’ යන්න පෙරදැරි කරගෙන සත්‍යක්‍රියාවේ යෙදෙන ලෙස ආරාධනා කරන ලද්දේ දෙමළ පොදු ජනාධිපති අපේක්ෂක පාක්‍යසෙල්වම් අරියනේත්‍රන් විසිනි.
කිලිනොච්චියේ මෙන්ම මඩකලපුවේදීත් බලහත්කාරයෙන් අතුරුදහන් කරන ලද්දවුන්ගේ ඥාතීන් දියත් කළ විරෝධතා සදහා දෙපළාතේ දෙමළ ජනතා නියෝජිතයන්ද එක්ව සිටින අයුරු පළාත් බද වාර්තාකරුවන් විඩියෝ ගත කර තිබේ.
කිලිනොච්චියේ දියත් කළ විරෝධතාවය අවසානයේදී උතුරු නැගෙනහිර අතුරුදහන් කරනු ලැබුවන්ගේ ඥාතීන්ගේ සංගමයේ සභාපතිනි යෝගරාසා කනගරංජනී මාතාවත්, මඩකලපුවේ දියත් කළ විරෝධතාවය අවසානයේදී අම්පාර දිස්ත්‍රික්කයේ බලහත්කාරයෙන් අතුරුදහන් කළ අයගේ ඥාතීන්ගේ සංගමයේ සභාපති තම්බිරාසා සෙල්වරානි මාතාවක් දෙමළ ජනයා දිගින් දිගටම පීඩා විදින ගැටළු 14 ක් වෙනුවෙන් ජාත්‍යන්තර ප්‍රජාවෙන් යුක්තිය ඉල්ලා තිබුනි.
ශ්‍රී ලංකාවේ ආණ්ඩුව දෙමළ ජනතාවට කිසිදු යුක්තියක් හෝ ස්ථිර දේශපාලන විසදුමක් ලබා නොදන බව අවධාරණය කරමින් කළු දිනය ප්‍රකාශයට පත් කළ ඔවුන් බලහත්කාරයෙන් ‘අතුරුදහන් කරවුවන් සම්බන්ධයෙන් අපට ජාත්‍යන්තර යුක්තිය ලබා දිය යුතුයි, දෙමළ දේශපාලන සිරකරුවන් වහා නිදහස් කළ යුතුයි, දෙමළ නිජබිම බෞද්ධකරණය කිරීම වහාම නැවැත්විය යුතුයි, දෙමළ නිජබිම තුළ සිදුවෙමින් පවතින ඉඩම් කොල්ලය වහාම නැවැත්විය යුතුයි, දේශීය සම්පත් අත්පත් කර ගැනීම වහාම නැවැත්විය යුතුයි, දෙමළ නිජබිමෙන් හමුදාව වහා ඉවත් විය යුතුයි, දෙමළ සංහාරය ගැන ජාත්‍යන්තර අධිකරණයේ පරීක්ෂණයක් පැවැත්විය යුතුයි, සිවිල් ක්‍රියාකාරීන් බිය ගැන්වීම නැවැත්විය යුතුයි, මාධ්‍යවේදීන් බිය ගැන්වීම නැවැත්විය යුතුයි, අපට අපේ ඉඩම් දිය යුතුයි, අපගේ අයිතිවාසිකම් වන දෙමළ නිජබිම, ජාතිකත්වය, ස්වයං නිර්ණය වහාම අනුමත කළ යුතුයි, උතුරු නැගෙනහිර දෙමළ නිජබිම ලෙස පිළිගත යුතුයි, ජාත්‍යන්තරය වඩුක්කෝඩෙයි යෝජනාව අනුමත කළ යුතුයි,’ යනුවෙන් ජාත්‍යන්තර ප්‍රජාවෙන් ඉල්ලා තිබුනි.
දෙමළ ජනයාගේ ඉරණම තීරණය කිරීම සඳහා ජාත්‍යන්තර සම්මතයන්ට අනුකූලව සිය මව්බිමේ ජනමත විචාරණයක් පවත්වන ලෙසත් ඔවුන් ජාත්‍යන්තර ප්‍රජාවෙන් දැඩිව ඉල්ලා සිටි බවයි පළාත් බද වාර්තාකරුවන් පවසන්නේ.
උතුරු නැගෙනහිර අතුරුදහන් කරනු ලැබුවන්ගේ ඥාතීන්ගේ සංගමයේ සභාපතිනි යෝගරාසා කනගරංජනී මාතාව කිලිනොච්චියේදී මාධ්‍යවේදීන් හමුවේ තව දුරටත් පවසා තිබුනේ ඉංග්‍රීසි ජාතිකයන් තමන් අත පැවැති ආධිපත්‍ය මේ රටේ සිංහල, බෞද්ධ දේශයට පවරා දුන් දිනය කළු දිනයක් බවයි.
“මේ රටේ උතුරු නැගෙනහිර නිජබිම වු දෙමළ දේශය අත්පත් කරගෙන සිටි ඉංග්‍රීසි ජාතිකයන් තමන් අත පැවැති ආධිපත්‍ය මේ රටේ සිංහල, බෞද්ධ දේශයට පවරා දුන් දිනය තමයි මේ කළු දිනය.”
මෙම උද්ඝෝෂණය නැවැත්විම සදහා පොලීසිය ජනතාවට තර්ජනය කර ඇති ආකාරය බලහත්කාරයෙන් අතුරුදහන්කරවුවන්ගේ ඥාතීන්ගේ සංගමයේ මඩකලපුව දිස්ත්‍රික් නායිකා අමලනායගී අමලිරාජා මඩකලපුවේ පැවැති විරෝධතාවයෙන් පසු මාධ්‍යවේදීන් හමුවේ හෙළි කර තිබුනි.
“මිනිසුන් ව්‍යාකූල කරලා. ගමින් ගමට ගිහිල්ලා අපි සුදානම් කර ගත්තු වාහන ටික නවත්තලා ජනතාවට ගෙයින් ගෙට ගිහිල්ලා මේකට කිසිවෙකුත් සහභාගි නොවිය යුතුයි කියලා ග්‍රාම සංවර්ධන සමිතිය හරහා දැනුම්දීලා මිනිසුන්ට තර්ජනය කරලා නවත්තලා තියනවා. මේකට මේ රටේ නිදහස. අපේ දරුවන් ගැන අහන එක, අපේ ඉඩම් ඉල්ලන එක, දෙමළ අය අයිතිවාසිකම් ඉල්ලන එක, මේවා ඉල්ලන්න බැරිද? මේකද මේ රටේ නිදහස?”
‘අපේ තෘණ භුමි අපට ඕන, සාමය නැති රටක නිදහස මොකටද, නිදහස් නැති රටක නිදහස් දිනය මොකටද, කෝ, කෝ අපේ ඥාතීන් කෝ, වන්දි ගෙවන බව කියන්නේ අපරාධය වසන් කිරීමටයි!’ ආදී සටන් පාඨ හා පුවරු දැකගත හැකි වු මඩකලපුවේ විරෝධතා පෙළපාලියේ ප්‍රධාන බැනරයක සදහන්ව තිබුනේ ඒකීය රාජ්‍ය ව්‍යවස්ථාව යටතේ එන සකලවිධ දේශපාලන විසදුම් ප්‍රතික්ෂේප කරන බවයි. 13 වැනි ව්‍යවස්ථා සංශෝධනය ඇස්බැන්දුමක් බව එහි තව දුරටත් සටහන් කර තිබුනි.
කළු රෙදි පටි හිසේ බැද, දෙමළ ජනයාගේ පොදු ඉල්ලීම් ඇතුලත් විරෝධතා පුවරු ප්‍රදර්ශනය කරමින් යාපනය විශ්වවිද්‍යාලය ඉදිරිපිටදී සරසවි සිසුන් විරෝධතා දියත් කළ අතර සරසවි භුමියේ ළෙල දෙමින් තිබු ජාතික කොඩිය පහතට ගෙන එහි කළු කොඩියක් එසවීමටත් සිසුන් කිහිප දෙනකු කටයුතු කළ බවයි පළාත් බද වාර්තාකරුවන් පවසන්නේ.
යුද අපරාධ සහ මානව වර්ගයාට එරෙහි අපරාධ සම්බන්ධයෙන් දෙමළ ජනතාවට ඉටු නොවූ යුක්තිය සම්බන්ධයෙන් විරෝධය දියත් කළ සරසවි සිසුන් රජය ජාත්‍යන්තර අධිකරණය හමුවට ගෙනයන ලෙසත් බලකර තිබුනි.
P2P නමින් ප්‍රකට පොතුවිල් සිට පොලිකන්ඩි දක්වා වූ පාද යාත්‍රාවේ සංවිධායකවරයකු වන යාපනය නල්ලුර් ශිව ගුරු ආශ්‍රමයේ තවතිරු වේලන් ස්වාමි තවත් කිහිප දෙනෙකු සමග විරෝධතාවයක් දියත් කර තිබුනේ මාරාන්තික උපවාසයක යෙදී සිටියදී මිය ගිය තිලීපන් සැමරීම සඳහා යාපනය, නල්ලුර් කන්දසාමි කෝවිල අසල ඉදිකර තිබෙන තිලීපන්ගේ ස්මාරකය ඉදිරිපිට දීය. ඔවුන් ද විරෝධතාවය දියත් කර තිබුනේ දෙමළ ජනයා දීර්ඝ කාලීනව පිඩා විදින ගැටළු වලට විසදුම් ඉල්ලමිනි.
ජාතික පුනරුදය
කොළඹ නිදහස් චතුරස්‍රයේ දී පැවැති 77 වැනි ජාතික නිදහස් දින සැමරුම් උත්සවය අමතමින් ජනාධිපති අනුර කුමාර දිසානායක පවසා තිබුනේ “රටට ආර්ථික, සමාජයීය, සංස්කෘතික නිදහස පූර්ණ ලෙස දිනා ගැනීමේ මෙහෙයුම තුළ ඔබ අප සියලු දෙනා එකම අරගලබිමක අරගලකරුවන් වන බවයි.”
සියලු දෙනා එකාවන්ව මාතෘභූමිය වෙනුවෙන් තවදුරටත් කළ යුතු නිදහස් අරගලයක් පවතින බව ඔහු තව දුරටත් අවධාරණය කර තිබුනි.
නියත ලෙසම මේ ලෝකයේ ධනවත්ම රට බවට ශ්‍රී ලංකාවට පත් විය නොහැකි නමුත් උත්සාහ කළොත් මේ ලෝකයේ පොහොසත්ම ජාතික ආත්මය දරා ගත් සමානාත්මතාවයේ හා නිදහසේ ආදර්ශ රාජ්‍යය බවට ශ්‍රී ලංකාවට පත් විය හැකි බව ජනාධිපති අනුර කුමාර දිසානායකගේ විශ්වාසයයි.
Facebook Comments
