රටේ ප්‍රජාතන්ත්‍රවාදය වෙනුවෙන් උපරිම කැපවන බව මෙරට 09 වැනි විධායක ජනාධිපති අනුර කුමාර දිසානායක ප්‍රකාශ කර තිබේ.
විධායක ජනාධිපතිවරයා ලෙස අද උදෑසන (23) කොළඹ ජනාධිපති ලේකම් කාර්යාලයේ දී අගවිනිසුරු ජයන්ත ජයසුරිය ඉදිරියේ දිවුරුම් දිමෙන් අනතුරුව ජාතිය අමතමින් ඔහු මේ බව පැවසීය.
“අප රටේ ප්‍රජාතන්ත්‍රවායේ වැදගත්ම ලක්ෂණය වන්නේ ජනතාව විසින් පාලකයෙක් තෝරා ගැනීමයි. මැතිවරණයට ඡන්ද ප්‍රකාශ කිරීම සහ පාලකයා තෝරා ගැනීමෙන්ම ප්‍රජාතන්ත්‍රවාදය අවසන් වන්නේ නැහැ. අප රට ප්‍රජාතන්ත්‍රවාදය ශක්තිමත් කිරීම සඳහා ව්‍යුහයන්ගේ ශක්තිමත් කිරීම අවශ්‍යයි. මෙරට ප්‍රජාතන්ත්‍රවාදය වෙනුවෙන් මගේ උපරිම කැපවීම සිදුකරන බව ප්‍රතිඥා දෙනවා.”
දේශපාලනය පිරිසිදු කරමින් යහපත් දේශපාලන සංස්කෘතියක් සඳහා කැපවන බවත් අභිනව ජනාධිපතිවරයා කියා සිටියේය.
හිටපු ජනාධිපති රනිල් වික්‍රමසිංහ ප්‍රජාතන්ත්‍රවාදි බල හුවමාරුවක් වෙනුවෙන් කළ කැපවීම හා ආදර්ශය වෙනුවෙන් වත්මන් ජනාධිපතිවරයා මෙහිදී සිය ස්තුතිය පළ කළේය.
”මා ඉන්ද්‍රජාලිකයෙක් නොවේ. මැජික්කරුවෙක් නොවේ”
“මා ඉන්ද්‍රජාලිකයෙක් නොවේ. මැජික්කරුවෙක් නොවේ. මා මේ රටේ සාමාන්‍ය පුරවැසියයි.දන්නා දේවල් මෙන්ම නොදන්නා දේවල් තිබෙනවා.හැකියාවන් යොදා යොදාගෙන නොදන්නා දේ එක්රැස් කරගෙන වඩා හොඳ තීන්දු තීරණ ගැනීම මගේ අරමුණයි.”
රට මුහුණ දී ඇති අර්බුදය නිමා කිරිමේදී පොදු පුරවැසියාටත් වගකීමක් ඇති බව කී ජනපති අනුර කුමාර ඒ සැමගේ අපේක්ෂා කරන බව ද කියා සිටියේය.
“අප රටට ජාත්‍යන්තර සහය අවශ්‍යයි. ඒ ඒ රාජ්‍යයන් සමඟ අපට වාසි සහගත අයුරින් කටයුතු කරන්නට කටයුතු කරනවා. අප හුදෙකලාව යුතු විය යුතු රාජ්‍යයක් නොවේ. එමෙන්ම කර්මාන්තකරුවන්ට සහ ව්‍යවසායකයන්ට රට ගොඩනැගීමේදී විශාල කාර්යභාරයක් තිබෙනවා. ඔවුන් රජයේ කාර්යභාරයට උදව් කරනු ඇතැයි මා සිතනවා.”
තමන්ට සහාය නොදුන් පුරවැසියන්ගේ විශ්වාසය ගොඩනාඟා ගැනීමට කටයුතු කරන බව ජනාධිපති අනුර කුමාර දිසානායක වැඩිදුරටත් සඳහන් කළේය.
Facebook Comments
