එළැඹෙන 77 වැනි නිදහස් දින සමරුව දා මඩකලපුවේ විරෝධතා පැවැත්වීමේ නිදහස වලක්වන්නට පොලීසිය අධිකරණ නියෝගයක් ලබාගෙන තිබේ.
පසුගිය වසරවල මෙන් මෙවරත් නිදහස් දිනය කළු දිනයක් ලෙස නම් කරමින් බලහත්කාරයෙන් අතුරුදහන්කරවුවන්ගේ ඥාතීන්ගේ සංගමයේ සංවිධානත්වයෙන් උතුරු නැගෙනහිර දෙපළාතේ විරෝධතා දෙකක් පැවැත්වීමට කටයුතු සැලසුම් කර ඇති බවයි පළාත් බද වාර්තාකරුවන් වැඩි දුරටත් පවසන්නේ.
මඩකලපුව පොලිස් මුලස්ථාන පොලිස් පරීක්ෂක විසින් අධිකරණයෙන් කරන ලද ඉල්ලීමකට අනුමැතිය දෙමින් මඩකලපුව මහේස්ත්‍රාත් වී ත්‍යාගේස්වරන් අපරාධ නඩු විධාන සංග්‍රහයේ 106 ( 1) ( 2) ( 3) වගන්ති යටතේ පෙබරවාරි 2 වැනිදා නියෝග කර ඇත්තේ 2025 පෙබරවාරි 04 වැනිදා මඩකලපුවේ ගාන්ධි උද්‍යානය අවට විරෝධතා හෝ උද්ඝෝෂණ පැවැත්වීම තහනම් බවයි.
විරෝධතාව තහනම් කරමින් මහේස්ත්‍රාත් වී ත්‍යාගේස්වරන් විසින් දෙමළ ජනතා නියෝජිතයන් ඇතුළු පිරිසකට එරෙහිව නිකුත් කළ නියෝගය පොලිසිය විසින් සිවිල් සමාජ ක්‍රියාධර සබාරත්නම් සිවයෝගනාදන් ට බාර දී ඇත.
ඔහුට අමතරව මඩකලපුව දිස්ත්‍රික් පාර්ලිමේන්තු මන්ත්‍රී ඥානමුත්තු ශ්‍රීනේෂන්, මඩකලපුව දිස්ත්‍රික් පාර්ලිමේන්තු මන්ත්‍රී ශානක්‍යන් රාසමානික්‍යම්, බලහත්කාරයෙන් අතුරුදහන්කරවුවන්ගේ ඥාතීන්ගේ සංගමයේ මඩකලපුව දිස්ත්‍රික් නායිකා අමලනායගී අමලිරාජා, මඩකලපුව දිස්ත්‍රික් පාර්ලිමේන්තු මන්ත්‍රී ඉලයතම්බි ශ්‍රීනාත්, සහායරාසා සුගන්තිනී, P2P නමින් ප්‍රකට පොතුවිල් සිට පොලිකන්ඩි දක්වා වූ පාද යාත්‍රාවේ සාමාජික ඉරුදයම් සෙල්වකුමාර් සහ ‘ඔවුන් හා සම්බන්ධ වෙනත් පුද්ගලයන්’ ට මෙම තහනම පනවා තිබේ.
‘ජාතික පුනරුදයට පෙළ ගැසෙමු’ තේමාව යටතේ 77 වැනි රාජ්‍ය නිදහස් උත්සවය පෙබරවාරි 04 වැනිදා කොළඹ නිදහස් චතුරස්‍රයේ දී පැවැත්වීමට අනුර කුමාර දිසානායක ජනාධිපතිවරයාගේ නායකත්වයෙන් යුත් ජාතික ජන බලවේග ආණ්ඩුව කටයුතු සුදානම් කර තිබේ.
මෙය අනුර කුමාර දිසානායක ජනාධිපතිවරයාගේ නායකත්වය යටතේ සමරනු ලබන පළමු නිදහස් දින උත්සවයයි. පෙර අවුරුදුවල සේම නිදහස් දින දහවල් 12.00ට මුහුදේ නෞකාවකින් නාවික හමුදාව විසින් පවත්වනු ලබන වෙඩි මුර 25ක් මෙවර ද පත්තු කරන බව රජය විසින් නිවේදනය කර ඇත.
Facebook Comments
