අලුත් අවුරුදු නිවාඩුවෙන් පසු දෛනික පාසල් කාලය පැයකින් දීර්ඝ කිරීමට අධ්‍යාපන අමාත්‍යාංශය ගත් තීරණයට දෙමළ ගුරු සංගමයක විරෝධය පළ වී තිබේ.
නිවේදනයක් නිකුත් කරමින් ශ්‍රී ලංකා දෙමළ ගුරු සංගමය පෙන්වා දෙන්නේ මේ වන විට රට මුහුණ දී සිටින ආර්ථික අර්බුදය හමුවේ එම තීරණය ප්‍රායෝගික නොවන බවයි.
අප්‍රේල් මස 18 වැනි දිනෙන් ආරම්භ වන අධ්‍යයන වර්ෂය සඳහා දෛනික පාසල් කාලය පැයකින් දීර්ඝ කිරීමට අධ්‍යාපන අමාත්‍යාංශය තීරණය කර ඇත.
ශ්‍රී ලංකා දෙමළ ගුරු සංගමයේ ලේකම් එස්. පුවනේෂ්වරන් පවසන්නේ පාසල් දරුවන්ගේ පෝෂණය වෙනුවෙන් දිවයින පුරා තෝරා ගත් පාසල් වලට ලබාදුන් ආහාර වේලත් කප්පාදු කර ඇති මෙවන් මොහොතක දරුවන් වැඩිපුර පැයක කාලයක් පාසල තුළ රදවා ගැනීම දැඩි අසීරු කරුණක් බවයි.
දරා ගත නොහැකි ආකාරයට රටේ අත්‍යවශ්‍ය ආහාර ද්‍රව්‍ය හා භාණ්ඩ මිළ ඉහළ ගොස් ඇති මෙවැනි අවස්ථාවක දරුවන්ගේ පෝෂණය ගැන වඩාත් සැලකිලිමත් වීමට දෙමාපියන්ටත් නොහැකි තත්වයක් උද්ගත වී ඇති බව ගුරු සංගම් නායකයා පවසයි.
පාසල් කාලය පැයකින් දීර්ඝ කිරීම කිරීම තුළ දරුවන්ගේ, ගුරුවරුන්ගේ මෙන්ම දෙමාපියන්ගේද දෛනික ජිවන රටාව වෙනස් වීමකට ලක් වන බව පෙන්වා දෙන ගුරු සංගම් නායකයා තව දුරටත් පෙන්වා දෙන්නේ ඒ හේතුවෙන් ප්‍රවාහන ගැටළුවකටද මුහුණ දීමට සිදු වන බවයි.
ප්‍රවාහන වියදම්ද විශාල ලෙස ඉහළ ගොස් ඇති අවස්ථාවක ඒ සදහා අමතර වියදමක් දැරීම සිදු කළ නොහැක්කක් බව ඔහු වැඩි දුරටත් අවධාරණය කරයි.
“දරුවන්ගේ අධ්‍යාපනය ගැන සැලකිලිමත් වෙනවා වගේ රඟ පාන්න එපා ” එස්. පුවනේෂ්වරන් ගුරු සංගම් නායකයා ආණ්ඩුවෙන් ඉල්ලා සිටි.
අප්‍රේල් 18 සිට
කොවිඩ් වසංගතයත් සමග මේ වර්ෂයේ පාසල් අධ්‍යයන කටයුතු ප්‍රමාද වී ආරම්භ කිරීමට සිදුවීම හේතුවෙන් විෂය නිර්දේශයන් ආවරණය කර ගැනීමේ අරමුණින් අප්‍රේල් මස 18 වැනි දිනෙන් ආරම්භ වන අධ්‍යයන වර්ෂය සඳහා දෛනික පාසල් කාලය පැයකින් දීර්ඝ කිරීමට අධ්‍යාපන අමාත්‍යාංශය තීරණය කර ඇත.
ඒ අනුව අප්‍රේල් 18 වැනි දින සිට දෙසැම්බර් මස 23 වැනි දින දක්වා වන 2022 අධ්‍යයන වර්ෂයේදී පාසල් කාලසීමාව පැයකින් දීර්ඝ කිරීමට රජයේ පාසල් වෙත උපදෙස් ලබා දී ඇති බව අධ්‍යාපන අමාත්‍යාංශයේ පාසල් කටයුතු පිළිබඳ අතිරේක ලේකම් ලලිතා එගොඩවෙල ජනමාධ්‍ය වෙත පවසා තිබේ.
මීට අමතරව සෙනසුරාදා දිනයන්හි පාසල් පැවැත්වීම සම්බන්ධයෙන් ද අධ්‍යාපන අමාත්‍යාංශයේ අවධානය යොමුව ඇති බව ද ජනමාධ්‍ය වැඩි දුරටත් වාර්තා කර ඇත.
Facebook Comments
