රටේ ලොකුම සමූහ මිනීවලේ යටකළ අය ගැන හෝඩුවාවක්

0

ලංකාවේ මෙතෙක් හමුවූ විශාලතම සමුහ මිනී වලේ කැනීම් වල දී මතු වූ මිනිස් ඇට කටු තම සමීපතමයන්ගේ විය හැකි බවට රජයේ හමුදා විසින් බලහත්කාරයෙන් පැහැරගෙන ගොස් අතුරුදහන් කළවුන්ගේ ඥාතීන් විශ්වාසය පළකර තිබේ.

බලහත්කාරයෙන් අතුරුදහන් කරනු ලැබූවන්ගේ ඥාතීන් විසින් වවුනියාව මහාධිකරණයේ ගොනු කළ නඩුවක් පෙබරවාරි 22 වැනිදා විභාගයට ගනිමින් විනිසුරු මානික්කවාසගර් ඉලන්චේලියන් විසින් මන්නාරම සමුහ මිනී වලේ කැනීම් යළි අරඹන ලෙස නියෝග කරන ලදී.

එහිදී ගොඩගනු ලබන ශේෂයන් හඳුනාගෙන ප්‍රසිද්ධියට පත් කළ යුතු බව ඥාතීන්ගේ ඉල්ලීමයි.

“1990 ඉඳන් 2009 වෙනකම් හමුදාව අපේ ඥාතියන්ව ගෙවල් වලට ඇවිත් බලහත්කාරයෙන් අරන් ගිහින් අතුරුදහන් කළා. මෙතැන මිනිස් ඇටකටු හමුවෙලා තියෙනවා. ඒවා අපේ ඥාතීන්ගේ වෙන්න පුළුවන්. අපිට ඇත්ත දැන ගන්න ඕනෑ. යුක්තිය ඉටුවෙන්න ඕනෑ මේ මිනිස් ඇටකටු කාගේද කියලා ප්‍රසිද්ධ කරන්න ඕනෑ,“යැයි සමුහ මිනිවලේ කැනීම් යළි අරඹන ලෙස අධිකරණ තීන්දුව ප්‍රකාශ කිරීමෙන් අනතුරුව පෙබරවාරි 24 වැනිදා අතුරුදහන් කළවුන්ගේ ඥාතීන්ගේ සංගමයේ මන්නාරම දිසා ලේකම් පී.ෂර්මිලා මන්නාරම් දුපතේ මාධ්‍යවේදීන් හමුවේ පැවසුවාය.

ඇය ඉල්ලා සිටියේ අතුරුදහන් කළවුන්ගේ ඥාතීන්ට කැනීම් නිරීක්ෂණයට වැඩි අවස්ථාවක් ලබා දෙන ලෙසයි. එවිට සත්‍ය හෙළිදරව් කර ගැනීමට පහසු වනු ඇති බවද ඇය සඳහන් කළාය.

වවුනියා මහාධිකරණ විනිසුරු විසින් අතුරුදන්වූවන් කළවුන්ගේ ඥාතීන්ට සහ ඔවුන්ගේ නීතිඥවරුන්ට මරණ පරීක්ෂණයට සහභාගි වීමට අවසර ලබා දුන් අතර එක් එක් කැණීම් දිනයකදී පුද්ගලයන් 10 කට පමණක් සෘජුව සහභාගී වීමටත්, තවත් අයට මීටර් 30ක දුරින් කැණීම් භූමිය නැරඹීමටත් අවසර ලබා දී තිබේ.

“සමුහ මිනී වලෙන් හමුවුණු මිනිස් සිරුරු, ඇට කැබලි අපේ අයගේ කියලා සැක තිබුණා. මන්නාරම උසාවියේ නඩුවක් පැවරුවත් අපි වෙනුවෙන් නීතිඥයන්ට ඉදිරිපත් වෙන එක වැලැක්කුවා. ඊට පස්සේ තමයි අපි වවුනියා මහාධිකරණයේ නඩු දැම්මේ,“ ෂර්මිලා සඳහන් කළාය.

එම නඩුවේදී නීතිඥ රනිතා ඥානරාජ්ගේ උපදෙස් පරිදි වී එස් නිරංජන් සහ ආර් සුවතිකා අගතියට පත් පාර්ශවය වෙනුවෙන් ද, නීතිඥ පුරතානි සිවලිංගම් අතුරුදහන් තැනැත්තන් පිළිබඳ කාර්යාලය (OMP) වෙනුවෙන්ද පෙනී සිටි අතර ජ්‍යෙෂ්ඨ රජයේ නීතිඥ චමින්ද වික්‍රම නීතිපති දෙපාර්තමේන්තුව නියෝජනය කළේය.

මන්නාරම සතොස භූමියෙන් 2018 මැයි මාසයේදී දරුවන් 28 දෙනකු ඇතුලු තුන්සියයකට අධික ගැහැණු සහ පිරිමි ඇට සැකිලි හමුවීමෙන් පසු ආරම්භ කළ කැනීම් ඉන් වසරක් ගත වීමෙන් අනතුරුව අත්හැර දමන ලදී. එය නැවත ආරම්භ කරන ලෙස උසාවි නියෝගය දීමට අවුරුදු තුනකට ආසන්න කාලයක් ගතවිය.

කැනීම් කටයුතු කඩිනමින් ආරම්භ කර අවසන් කරන ලෙස නියෝග කළ විනිසුරු ඉලන්චෙලියන්, අදාළ විමර්ශන මන්නාරම මහේස්ත්‍රාත්ගේ ඍජු පාලනය යටතේ නීතීඥවරුන්, පොලිසිය, අධිකරණ වෛද්‍ය නිලධාරීන්, අතුරුදන් කළවුන්ගේ ඥාතීන් ඇතුළු සියලු දෙනා එක්ව පරීක්ෂණ අවසන් කළ යුතු බව ද සඳහන් කළේය.

මහාධිකරණය මගින් වැඩි දුරටත් නියෝග පනවා ඇත්තේ මන්නාරම මහේස්ත්‍රාත් ගේ නියෝගය යටතේ වවුනියාව මහාධිකරණයේ අධීක්ෂණය යටතේ පැවැත්වෙන සමුහ මිනී වලේ විමර්ශන වල ප්‍රගතියේ පළමු වාර්තාව තුන් මාසයක් ඇතුලත ලබාදී ඉන් අනතුරුව සෑම මාස දෙකකට වරක් වවුනියාව මහාධිකරණයට වාර්තා ඉදිරිපත් කරන ලෙසයි.

අපරාධයක් සිදුවූ ස්ථානයක් ලෙස තීන්දු කරමින් මන්නාරම සතොස සමුහ මිනීවලේ කැනීම් කටයුතු සිදුකෙරෙන බව වෝහාරික විශේෂඥ සමින්ද රාජපක්ෂ විමර්ශන කටයුතු සිදුකෙරෙන 190 වැනි දිනයේදී මාධ්‍යවේදීන්ට කියා සිටියේය.

මන්නාරම සතොස සමූහ මිනීවලෙන් ගොඩගත් අස්ථි කොටස් හයක් පරීක්ෂා කළ ෆ්ලොරීඩාවේ, මියාමි හි පිහිටි බීටා ඇනලිටික්ස් ආයතනය විසින් නිගමනය කොට තිබුනේ ඒවා ක්‍රිස්තු වර්ෂ 1404 ත් 1635 ත් අතර සියවස් ගණනක කාල පරාසයකට අයත් බවය.

එම නිගමනය දැඩි ලෙස ප්‍රතික්ෂේප කරන කැළණිය විශ්ව විද්‍යාලයට අනුබද්ධිත පුරාවිද්‍යා පශ්චාත් අධ්‍යයන අංශයේ මහාචාර්ය රාජ් සෝමදේව සමූහ මිනිවළෙහි කාලය පිළිබඳ විශ්වසනීය නිගමනයකට එළැඹිය හැකි වන්නේ මිනිස් අස්ථි කොටස් සමගින් ගොඩගෙන ඇති භාණ්ඩ සිය ගණනක් සම්බන්ධයෙන් 2019 ජූලි මාසයේ අලුතින් පරීක්ෂණ ආරම්භ කර තිබුණි.

අවුරුදු 13ක් මහපාරේ

මේ තාක් හමුවූ ඇටකටු අතරින් සමහරක ගැඹුරු කැපුම් තුවාල දැකගත හැකි වූ අතර එකට ගැටගසා තිබුණු ආකාරයක් දිස්වන අස්ථි කොටස් ද සමූහ මිනී වලෙන් සොයා ගෙන තිබුණි.

“අතුරුදහන් කළ අපේ ඥාතියෝ ගැන සත්‍යය දැන ගන්න ජාත්‍යන්තර පරීක්ෂණයක් දෙන්න කියලා අපි ජිනීවා මානව හිමිකම් කවුන්සිලයෙන් ඉල්ලනවා. දැන් අපි අවුරුදු දහ තුනක් තිස්සේ පාරට බැහැලා උද්ඝෝෂණය කළත් ආණ්ඩුව සලකා බැලුවේ නැහැ,” යි මන්නාරමේ අතුරුදහන්කළවුන්ගේ ඥාතීන්ගේ සංගමයේ ලේකම්වරිය මෙහිදී පෙන්වා දුන්නාය.

“OMP එකෙන් අපේ තොරතුරු අරන් ගියත් අපිට විසදුමක් නම් දුන්නේ නැහැ.” මන්න්නාරම සමූහ මිනීවලේ විමර්ශන නිරීක්ෂණයට OMP කාර්යාලයත් හවුල් වී සිටී.

Facebook Comments

wedding people