ලාංකීය කම්කරු ව්‍යාපාරයේ ප්‍රවීණ වෘත්තිය සමිති නායකයෙක් හා වාමාංශික ක්‍රියාධරයෙක් වු ලීනස් ජයතිලක දිවි සැරිය නිමා කර තිබේ.
එක්සත් කම්කරු සම්මේලනයේ සහ වානිජ හා කාර්මික සේවක සංගමයේ සභාපති වු ලීනස් ජයතිලක ජ්‍යෙෂ්ඨ වෘත්තිය සමිති නායකයා කලක් රෝගාතුරව සිට මිය යන විට 79 වැනි විය පසු කර තිබුණි.
දේවධර්ම ආචාර්ය උපාධි ලාභී ලීනස් ජයතිලක කතෝලික සභාවට සේවය කරනු වෙනුවට වාමාංශික දේශපාලනය තෝරාගෙන මහාචාර්ය වික්‍රමබාහු කරුණාරත්න ප්‍රධාන ලේකම් ධුරය දරන නව සම සමාජ පක්ෂයේ වෘත්තීය සමිති අංශය භාර ලේකම් ලෙසද දීර්ඝ කාලයක් කටයුතු කළේය.
ජේ ආර් ජයවර්ධන ආණ්ඩුවේ අනුග්‍රහයෙන් 83 ජූලියේ දියත් කරන ලද දෙමළ විරෝධී සමුහඝාතනය සමග නසසපය, ජවිපෙ හා කොමියුනිස්ට් පක්ෂය තහනම් කරන ලද අවස්ථාවේ පක්ෂ තහනම ඉවත් කරවා ගැනීම සඳහා සැඟවී සිට ජනතා ව්‍යාපාරයක් සංවිධානය කිරීමේදී ඔහු ප්‍රමුඛ කාර්ය භාරයක් ඉටු කළ අයෙකි.
දෙමළ විමුක්ති අරගලය සම්බන්ධයෙන් දරන ස්ථාවරයත්, එක්සත් ජාතික පක්ෂයට සමීපව දේශපාලනය කිරීමත් සම්බන්ධයෙන් නව සමසමාජ පක්ෂය සමග ඇතිවූ මතබේද නිසා එයින් බිඳීගිය කණ්ඩායමක් සමග වමේ හඬ සංවිධානය පිහිටුවන්නට ලීනස් ජයතිලක මුල් විය.
අභාවප්‍රාප්ත වු ලීනස් ජයතිලකගේ දේහය 2022 මැයි 12 වැනි බ්‍රහස්පතින්දා උදේ 9 සිට සවස 4 දක්වා ලංකා වෙළද කාර්මික හා පොදු කම්කරු සංගමයේ ( CMU) බාලා තම්පෝ ශාලාවේ අවසන් ගෞරවය සදහා තැම්පත් කෙරේ.
සමුදීමේ අවමංගල්‍ය සභාව එදින පස්වරු 3 ට සිදු කෙරෙන බව වානිජ හා කාර්මික සේවක සංගමය නිවේදනය කර ඇත. සවස 4 ට දේහය 222, සාන්ත මරියා පාර, උස්වැටකෙයියාව නිවසට රැගෙන යනු ලැබේ.
දේහය පිළිබද අවසන් කටයුතු 13 වැනි සිකුරාදා පස්වරු 4 ට උස්වැටකෙයියාව පොදු සුසාන භුමියේදී සිදු කරනු ලැබේ.
Facebook Comments
