ඔන්ලයින් උගන්නන්න “ගුරුවරුන්ට බලකරන්න එපා”

0

අසාර්ථක මාර්ගගත ක්‍රමවේදය යොදාගනිමින් වසංගත සමයේ පාසල් දරුවන්ට ඉගැන්වීමට ගුරුවන්ට සිදුකෙරෙන බලපෑම් කිරීම වහා නතර කළ යුතු බවට ගුරු සංගම් ආණ්ඩුවෙන් ඉල්ලා සිටී.

දිවයිනේ ප්‍රමුඛතම ගුරු සංගම් දහයකට අධික ප්‍රමාණයක් නිවේදනයක් නිකුත් කරමින් පෙන්වා දී ඇත්තේ දුරස්ථ අධ්‍යාපන ක‍්‍රමවේද බොහෝ තිබියදී කෝවිඩ් 19 වසංගත තත්වය තුළ බිඳවැටුණු පාසල් අධ්‍යාපනය පවත්වාගෙන යාම සඳහා ආණ්ඩුවේ එකම විකල්පය වී ඇත්තේ මාර්ගගත (online) ඉගැන්වීම් බවයි.

නමුත් ඒ සදහා අවශ්‍ය මුලික පහසුකම් හෝ සපයා දී නොමැති බවටත් ගුරු සංගම් චෝදනා නගති.

“එහෙත් අධ්‍යාපන අමාත්‍යාංශය හෝ පළාත් අධ්‍යාපන බලධාරීන් විසින් මාර්ගගත අධ්‍යාපනයට අවශ්‍ය උපාංග, ඩේටා වැනි කිසිදු පහසුකමක් ගුරුවරුන්ට ලබාදී නැත. දැනට සිදුවන මාර්ගගත ඉගැන්වීම් ගුරුවරු විසින් තම වියදමින් ස්වේච්ඡාවෙන් සිදු කරමින් තිබේ. මාර්ගගත අධ්‍යාපනය තුළ ළමුන්ගෙන් 60% කට වැඩි පිරිසකට අධ්‍යාපනය අහිමි වී ඇත.”

අධ්‍යාපන අමාත්‍යාංශයේ ම දත්තවලට අනුව දිවයිනේ පාසල් 2000 කට වැඩි ප‍්‍රමාණයක් පවතින ප‍්‍රදේවලට අන්තර්ජාල ආවරණ නොමැති බව පසුගියදා තහවුරු වී තිබුනි.

එවැනි පසුබිමක අධ්‍යාපන අමාත්‍යාංශය, පළාත් හා කලාප අධ්‍යාපන කාර්යාල මගින් ගුරුවරු ස්වේච්ඡාවෙන් සිදු කරන මාර්ගගත ඉගැන්වීම් අධීක්ෂණය කිරීමට කටයුතු කරමින් සිටින බවයි ගුරු සංගම් පවසන්නේ.

ගුරුවරුන්ට අවශ්‍ය පහසුකම් ලබා නොදී ඔවුන් විසින් ස්වේච්ඡාවෙන් සිදු කරන කාර්යයන් අධීක්ෂණය කිරීම තරයේ හෙළා දකින ගුරු සංගම් අවධාරණය කරන්නේ ඇතැම් කලාප අධ්‍යාපන කාර්යාල මගින් මාර්ගගත ඉගැන්වීම් සඳහා ගුරුවරුන්ට දැඩි ලෙස බලපෑම් කරමින් සිටීන බවයි.

“බොහෝ දරුවන් මෙම මාර්ගගත ඉගැන්වීම්වලට සහභාගි නොවන අතර, එවැනි දරුවන් කෙසේ හෝ සම්බන්ධ කර ගැනීමට කලාප අධ්‍යාපන බලධාරීන් විසින් විදුහල්පතිවරුන්ට සහ ගුරුවරුන්ට දැඩි බලපෑම් කරමින් සිටී.”

මෙම බලපෑම්වලට යටත් නොවන ලෙසත්, තමන් ස්වේච්ඡාවෙන් කරන කාර්යයන් අධීක්ෂණයට ඉඩ නොදෙන ලෙසත් ගුරු සංගම් නිවේදනයක් නිකුත් කරමින් සියලූ ගුරුවරුන්ගෙන් ඉල්ලා තිබේ.

එසේම ගුරුවරුන්ට හෝ විදුහල්පතිවරුන්ට කිසිදු පහසුකමක් ලබා නොදී මේ ආකාරයෙන් මාර්ගගත ඉගෙනුම් සඳහා බලපෑම් කිරීම සහ එම ඉගැන්වීම් අධීක්ෂණය කිරීම වහා නතර කරන ලෙස අධ්‍යාපන බලධාරීන්ගෙන් ගුරු සංගම් දැඩිව ඉල්ලා තිබේ.

2020 වසරේ මාර්තු 12 සිට කොරෝනා වසංගතයත් සමග පාසල් වැසීම ආරම්භ විය.

එම ක්‍රියාවලියට වසරකුත් මාස 3 කට වැඩි කාලයක් ගත වී තිබියදීත් දුරස්ථ ඉගැන්වීම් සම්බන්ධයෙන් අධ්‍යාපන බලධාරීන් කිසිදු වැඩපිළිවෙක් ක්‍රියාත්මක කර නොමැති බවට ගුරු සංගම් දිගින් දිගටම චෝදනා කරමින් සිටි.

ලංකා ගුරු සංගමය, ලංකා ගුරු සේවා සංගමය, සමස්ත ලංකා එක්සත් ගුරු සංගමය, ලංකා විදුහල්පති සේවා සංගමය, ශ්‍රී ලංකා ජාතික විදුහල්පති සංගමය, ස්වාධීන අධ්‍යාපන සේවක සංගමය, ලංකා ප‍්‍රගති ගුරු සංගමය, ස්වාධීන ලංකා ගුරු සංගමය, පුහුණු හා විද්‍යාපීඨ ගුරු සංගමය, ශ්‍රී ලංකා ජාතික ගුරු සංගමය හා ලංකා කෘෂි විද්‍යා, ගෘහ විද්‍යා ඩිප්ලෝමාධාරී සංගමය ඒකාබද්ධව එම නිවේදනය නිකුත් කර තිබේ.

Facebook Comments

wedding people