වසරකට අධික කාලයක් රඳවාගෙන සිටින නීතිඥ හිජාස් හිස්බුල්ලා පාස්කු බෝම්බ ප්‍රහාරයට සම්බන්ධ බවට නගන චෝදනා තහවුරු කෙරෙන ආකාරයට සාක්ෂි ලබා දෙන ලෙස අපරාධ පරීක්ෂණ දෙපාර්තමේන්තුව රැඳවියන්ට තර්ජනය කර ඇති බව හෙලි වී තිබේ.
අපරාධ පරීක්ෂණ දෙපාර්තමේන්තුවේ නිලධාරීන් මෙලෙස බලපෑම් සිදු කර ඇත්තේ නීතිඥයා හඳුනන්නෙවත් නැති අත්අඩංගුවේ පසුවන ගුරුවරුන් දෙදෙනකුටයි.
මීට ඉහතදීද හෙළිදරව් වූ පරිදි මුස්ලිම් කවියකු වන අහ්නාෆ් ජසීම් අවුරුද්දකට වැඩි කාලයක් රඳවාගෙන සිටින්නේ නීතිඥ හිස්බුල්ලාට එරෙහි චෝදනා ඔප්පු කරගැනීම සඳහා ත්‍රස්ත මර්දන හා විමර්ශන කොට්ඨාශයට (CTID) අවශ්‍ය ආකාරයට පාපොච්චාරණයක් ලබා දෙනතුරුය.
නීතිඥ හිජාස් හිස්බුල්ලාට එල්ල වී තිබෙන චෝදනාවලට ඔහු පටළැවීම සඳහා සාක්ෂි ලබාදෙන ලෙස අපරාධ පරීක්ෂණ දෙපාර්තමේන්තුව බල කරන බවට සඳහන් කරමින් අත්අඩංගුවේ පසුවන අල්-සුහ්රියා විද්‍යාලයේ ගුරුවරුන් දෙදෙනෙක් නීතිඥ එරික් බාලසූරිය මාර්ගයෙන් ශ්‍රේෂ්ඨාධිකරණයට මූලික අයිතිවාසිකම් පෙත්සම් දෙකක් ගොනු කර ඇත.
එම පෙත්සම් ජුලි 07 දා ශ්‍රේෂ්ඨාධිකරණයේදී කැඳවන ලද අවස්ථාවේ පාර්ලිමේන්තු මන්ත්‍රී ජනාධිපති නීතිඥ එම්.ඒ සුමන්තිරන් අධිකරණයට දැනුම් දී ඇත්තේ රිමාන්ඩ් බාරයේ සිටින එම ගුරුවරුන් දෙදෙනාට මහේස්ත්‍රාත්වරයා ඉදිරියේ ප්‍රකාශයක් ලබාදීම වැළැක්වීම සඳහා බන්ධනාගාර දෙපාර්තමේන්තුව විසින් ඔවුන් දෙදෙනා හඳුනා නොගත් තැන් දෙකකට දමා ඇති බවයි.
නීතිඥ හිජාස් හිස්බුල්ලා චෝදනාවලට පටළැවීමට සාක්ෂි ලබාදෙන්නේ නම්, යම් සහනයක් ලබා දෙන බවට හඬ පටිගත කිරීමේ උපකරණයක් සහිතව රහස් පොලිස් නිලධාරීන් දෙදෙනකු පැවසූ බව එම ගුරුවරුන් දෙදෙනා නීතිඥ බාලසූරිය දැනුම් දී ඇතැයි ජනාධිපති නීතිඥ එම්.ඒ සුමන්තිරන් ශ්‍රේෂ්ඨාධිකරණයට දැනුම් දුන් බව ජනමාධ්‍ය වාර්තා කර තිබේ.
“ඔවුන්ට හිස්බුල්ලා එම වැරදිවලට සම්බන්ධ කරන්න සාක්ෂි දෙන්නැයි බල කරලා තිබෙනවා. එහෙම කළොත් යම් ලිහිලක් දෙන බවට හිජාස් හිස්බුල්ලා කවුද කියලා දන්නේවත් නැති ඔවුන්ට පොරොන්දු වී තිබෙනවා,” යි ජනාධිපති නීතිඥ එම්.ඒ සුමන්තිරන් අධිකරණයට දැනුම් දී තිබේ.
පාස්කු ප්‍රහාරයට සම්බන්ධ මරාගෙන මැරෙන බෝම්බ ප්‍රහාරයක් එල්ල කළ බෝම්බකරුවකු සමඟ සබඳතා පැවැත්වු බවට චෝදනා කරමින් නීතිඥ හිජාස් හිස්බුල්ලා 2020 වසරේ අප්‍රේල් මාසයේදී අපරාධ පරීක්ෂණ දෙපාර්තමේන්තුව විසින් අත්අඩංගුවට ගත් අතර මද්‍රසා පාසලක දේශනයක් පැවැත්වූ බවටත් මේ වන විට ඔහුට චෝදනා එල්ල වී තිබේ.
අත්අඩංගුවට ගෙන මාස දහයකට වැඩි කාලයක් ගතවීමෙන් පසු 2021 පෙබරවාරි 18 දින නීතිඥ හිජාස් කොළඹ කොටුව මහේස්ත්‍රාත් අධිකරණයට ඉදිරිපත් කර තිබුනි.
ගුරුවරුන් දෙදෙනා මහේස්ත්‍රාත්වරයකු වෙත ඉදිරිපත් කර ඇත්තේ මූලික අයිතිවාසිකම් පිළිබඳ පෙත්සම ගොනු කිරීමෙන් පසුව බව අධිකරණයට දැනුම් දුන් නීතිඥ එම්.ඒ සුමන්තිරන් වැඩි දුරටත් අවධාරණය කර ඇත්තේ ඉන්පසු ඔවුන් ස්ථාන දෙකක රදවා ඇති බවයි.
ගුරුවරුන් දෙදෙනා මහේස්ත්‍රාත්වරයාට දන්වා ඇත්තේ ඔහු ඉදිරියේ ප්‍රකාශ ලබාදීමට තමන් අදහස් කරන බවයි.
‘මම වගකීමෙන් යුතුව කියනවා ඔවුන් වෙන්කර රටේ තැන් දෙකකට ගෙන යෑමට එකම හේතුව ඔවුන් මහේස්ත්‍රාත්වරයා සමඟ කතා කිරීම නැවැත්වීමටයි’ නීතිඥ සුමන්තිරන් වැඩි දුරටත් අධිකරණයට දැනුම් දී තිබේ.
මේ සම්බන්ධයෙන් උපදෙස් ලබා ගත යුතු බවට ජ්‍යෙෂ්ඨ රජයේ නීතිඥ අවන්ති පෙරේරා අධිකරණයට දන්වා සිටීමන් අනතුරුව නඩු විභාගය නැවත ජූනි 21 දා කැඳවීමට දින නියම කරන ලදී.
Facebook Comments
