පොලිස් අත්අඩංගුවේ මිය ගිය දෙමළ තරුණයා ගැන දෙවැනි මරණ පරීක්ෂණයක්

අත්අඩංගුවේ සිටියදී පහර දී මරා දැමූ බවට ශ්‍රී ලංකා පොලිසියට චෝදනා එල්ල වූ, දෙමළ තරුණයකුගේ දේහය නැවතත් මරණ පරීක්ෂණයකට භාජනය කිරීම සඳහා ගොඩ ගැනීමට තීරණය කර තිබේ.

මෙසේ සිරුර නැවත ගොඩ ගැනීමට නියෝග කිරීම තුළින්, ඔහුගේ මරණයට හේතුව පිළිබඳ වර්තමාන නිල ස්ථාවරයට දෙමළ තරුණයාගේ පවුලේ ඥාතීන් ඉදිරිපත් කළ අභියෝගය අධිකරණය විසින් පිළිගෙන තිබේ.

විශේෂ අධිකරණ වෛද්‍ය නිලධාරියෙකු (JMO) විසින් මීට පෙර සිදු කරන ලද මරණ පරීක්ෂණය තුළින් කියැවුණේ, විසි එක් හැවිරිදි තරුණයා මත්ද්‍රව්‍ය අධික ලෙස භාවිත කිරීම නිසා මියගොස් ඇති බවයි.

මත්ද්‍රව්‍ය සම්බන්ධ චෝදනා පිට පොලිසියට රැගෙන ගිය 21 වියැති චන්ද්‍රන් විදූෂන්, සිය පවුලේ සාමාජිකයන් ඉදිරියේ අමානුෂික ලෙස පහරකෑමෙන් පසුව පොලිස් අත්අඩංගුවේ සිටියදී මිය ගොස් තිබේ.

ජුනි 18 වැනි සිකුරාදා මඩකලපුවේ මහේස්ත්‍රාත්වරයා තීන්දු කළේ චන්ද්‍රන් විදූෂන්ගේ මෘත දේහය අද දින ගොඩ ගෙන, දිවයිනේ ප්‍රමුඛ අධිකරණ වෛද්‍ය විශේෂඥයකුගේ අධීක්ෂණය යටතේ අලුත් මරණ පරීක්ෂණයක් සඳහා යොමු කළ යුතු බවයි.

“මහේස්ත්‍රාත් අධිකරණය අද ඓතිහාසික තීන්දුවක් දීල තියෙනවා,” යි මියගිය තරුණයාගේ පවුල වෙනුවෙන් පෙනී සිටින නීතිඥ කනගරත්නම් සුගාෂ්, උසාවියෙන් පිටතට පැමිණ මාධ්‍යවේදීන් හට පැවසීය.

“මෙම ක්‍ෂේත්‍රයේ ප්‍රමුඛතම විශේෂඥයා ලෙස සැලකෙන පේරාදෙනිය විශ්වවිද්‍යාලයේ ඒ පිළිබඳ මහාචාර්යවරයා ඉදිරිපිට විදූෂන්ගේ දේහය ගොඩට අරගෙන, මරණ පරීක්ෂණය නැවත සිදු කරන ලෙස අධිකරණය නියෝග කළා. අපි මේ තීරණය සාදරයෙන් පිළිගන්නවා”

ජුනි 2 බදාදා රාත්‍රියේ මඩකලපුවේ ඉරුදයපුරම්හිදී මඩකලපුව පොලීසියේ බුද්ධි අංශ නිලධාරීන් විසින් චන්ද්‍රන් විදූෂන් අත්අඩංගුවට ගනු ලැබූ අතර පසුදා උදෑසන ඔහුගේ මරණය පිළිබඳව පවුලේ අයට දැනුම් දී තිබේ.

පෙර වාර්තාව පිළිබඳ සැක

අධිකරණ වෛද්‍ය නිලධාරී අරසරත්නම් ඉලන්ගෝවන් ඉදිරිපත් කළ පළමු වාර්තාවට අනුව, විදූෂන්ගේ මරණයට හේතුව ලෙස තීරණය කෙරුනේ “ප්‍රබල උත්තේජක ඖෂධයක් වන මෙතම්ෆෙටමින් හි එක් ආකාරයක් වන ‘අයිස්’ අඩංගු පැකට් ගිල දැමීම” බවයි.

“අයිස් අඩංගු පැකට් හතරක් ගිල දැමීමෙන් පසුව, පපුව ප්‍රදේශයේදී ඒවා පුපුරා යාම නිසා, පෙනහලු වලට සිදුවූ බලපෑම හේතුවෙන් ඔහුගේ මරණය සිදු වූ බව මරණ පරීක්ෂණයේදී හෙලි වුනා” යි මෘත දේහය භූමදානය සඳහා බලධාරීන් විසින් ඔහුගේ පවුල වෙත භාර දීමට පෙර අධිකරණ වෛද්‍ය නිලධාරීයා විසින් පවසනු ලැබීය.

“සීරීම් තැලීම් වැනි ඉතා සුළු තුවාල සිරුරේ තිබුනත් ඒවා මාරාන්තික නොවේ,” යි වාර්තාවේ සඳහන් වෙයි

කෙසේ වෙතත්, ‘මත්ද්‍රව්‍ය ගිලීම’ හේතුවෙන් ඔහු මියගිය බවට කරන මේ ප්‍රකාශය ඉතා සැක සහිත බව පවුලේ ඥාතීහු ප්‍රකාශ කර සිටියහ.

ඔහුගේ මරණය පිළිබඳ සත්‍යය හෙළි කළ යුතු බවට, ඔහුගේ බාල සොහොයුරිය වන කැරොලයින් චන්ද්‍රන් දැඩිව ඉල්ලා සිටියාය.

“මේ කට්ටිය කියන්නේ බොරු. මගේ අයියට යුක්තිය දෙන්න ඕනෙ. ඒ දේ වෙනකම් මම නවතින්නේ නෑ. මගේ අයියා මැරෙනකම් ගුටිකනවා මම දැක්කා. එයාව උස්සල පොලවෙයි බිත්තියෙයි ගැහුවා. බිත්තියත් පුපුරලා. ඒගොල්ලන්ට එච්චර හයියක් තියෙනවද?”

ඔහුගේ මරණයට හේතුව ‘අයිස්’ පැකට් ගිල දැමීම බවට කරන ප්‍රකාශය සම්බන්ධයෙන්ද ඇය සැක පළ කරයි.

“එයාගෙ අත් පිටිපස්සට කරල මාංචු දාලා තිබ්බ නම්, කොහොමද එයා ඒක ගිලින්නේ? මේගොල්ලො හැම දෙයක්ම වහන්න හදනවා. සත්‍යය ජයගන්න ඕනෙ” යැයි ඇය පලාතේ මාධ්‍යවේදීන් සමඟ ප්‍රකාශ කර තිබුනාය.

පවුල කම්පනයට පත් වීම

මඩකලපුව දිස්ත්‍රික්කයේ ඉරුදයපුරම්හි පිහිටි ඔහුගේ නිවසෙන් රැගෙන ගිය චන්ද්‍රන් විදූෂන්, ගසකට හේත්තු කර අත් පිටුපසට සිටින සේ මාංචු දමා ඔහුගේ පවුලේ අය ඉදිරිපිට දී පොලු වලින් දරුණු ලෙස පහර දී තිබේ. සිවිල් ඇදුමෙන් පැමිණි බුද්ධි අංශයේ පොලිස් නිලධාරීන් විසින් ඇදගෙන ගොස් ඔහුව මඩකලපුව පොලිසියට භාර දී ඇති අතර පසුව අත්අඩංගුවේදී ඔහු මිය ගොස් තිබේ.

“පොලීසිය මගෙ පුතාට ගහල මැරුවා” යි කම්පනයට පත්වූ දෙමාපියෝ දිගින් දිගටම පවසති.

චන්ද්‍රන් විදූෂන්ගේ දේහය සඳුදා (21) මහේස්ත්‍රාත්වරයා ඉදිරිපිටදී ගොඩ ගැනීමට නියමිත බව, ඔහුගේ පවුල වෙනුවෙන් පෙනී සිටින නීතිඥ සුගාෂ් මඩකලපුවේදී මාධ්‍යවේදීන්ට පැවසීය.

‘අත්අඩංගුවේදී සිදුවන මරණ සහ දණ්ඩ මුක්තිය’ පිළිබඳ සංස්කෘතිය හේතුවෙන් ශ්‍රී ලංකාව අඛණ්ඩව ජාත්‍යන්තර විසින් හෙළා දකිනු ලැබ තිබේ.

චන්ද්‍රන් විදූෂන්ගේ මරණය, වසරක් වැනි කෙටි කාලයක් තුළ පොලිස් අත්අඩංගුවේ දී සිදු වූ 11 වැනි මරණයයි.

ශ්‍රී ලංකා මානව හිමිකම් කොමිසම (HRSCL) විසින් පසුගිය වසරේ නිවේදනය කර සිටියේ, 2020 මැයි සිට ඔක්තෝබර් දක්වා කාලය තුළ අවම වශයෙන්, පොලිස් අත්අඩංගුවේ දී සිදු වූ මරණ අටක් වාර්තා වී ඇති බවයි.

පසුගිය මැයි මාසය තුළ, තරුණයන් දෙදෙනකු දින දෙකක් ඇතුළත පොලීසිය විසින් වෙඩි තබා ඝාතනය කරන ලදී.

මෙයට මසකට ඉහතදී මානව හිමිකම් කොමිසම විසින්, පොලිස් අත්අඩංගුවේදී සිදු වූ මරණ සම්බන්ධයෙන් සිදුකරන ලද පරීක්ෂණ පිළිබඳ වාර්තාවක් ලබා දෙන ලෙස, පොලිස්පති චන්දන වික්‍රමරත්නගෙන් ඉල්ලා සිටියේය.

මේ වන විට එම වාර්තාව ලබා දිය යුතු අවසන් දිනය වන මැයි 30 වැනිදා පසු වී සති තුනකට ආසන්න කාලයක් ගතවී ඇතත්, පොලිස්පතිවරයා විසින් තවමත් ඊට පිළිතුරු ලබා දී නොමැත.