අම්පාර දිස්ත්‍රික්කයේ ධීවරයන්ගේ ගැටළු කෙරෙහි ධීවර ඇමැතිවරයා අවධානය යොමු නොකරන බවට චෝදනා එල්ල වී තිබේ.
නීති විරෝධී දැල් ආම්පන්න යොදා ගනිමින් මසුන් අල්ලන ධීවරයන් අත්අඩංගුවට ගැනීමට කටයුතු කළ ධීවර පරීක්ෂකයකු ස්ථාන මාරු කිරීමට එරෙහිවද ප්‍රදේශයේ ධීවරයෝ විරෝධය දක්වති.
“අට්ටාලච්චේන, ඕලුවිල්, පාලමුනේ අපේ පැත්තේ තහනම් ආම්පන්න වලින් මාළු අල්ලන එක නැවැත්තුවේ අපේ ධීවර සුපවයිසර් බාබු මහත්තයා, ඒත් ප්‍රාදේශීය ධීවර අධ්යක්ෂ එයාව මාරු කරලා, අපි ඇමැතිතුමාට කියන්නේ මේ මාරුව නවත්වන කියලා” යැයි අට්ටාලච්චේන රාහුමානියා ධීවර සංගමයේ නියෝජ්‍ය සභාපති ඒ.ආර් රම්සාන් පවසයි.
අම්පාර දිසා ධීවර පරීක්‍ෂක එස්.බාබු ගේ ස්ථාන මාරුව අවලංගු කරන ලෙස ඉල්ලා ඉකුත් 24 වැනිදා අට්ටාලච්චේන මුහුදු තීරයේ ධීවරයන් උද්ඝෝෂණය කළ අතර ඒ කෙරෙහි ධීවර ඇමැති ඩග්ලස් දේවානන්ද ඇතුළු බලධාරීන්ගේ අවධානය යොමු නොවන්නේ නම් “ධීවර රස්සාවට නොගිහින් අපි කළු කොඩි උස්සලා විරෝධතාවයක් කරනවා” යැයි ද ධීවර සංගම් නායකයා කියා සිටී.
අට්ටාලච්චේන ධීවර සංගම් නායකයන් පවසන්නේ ප්‍රාදේශීය ධීවර අධ්‍යක්‍ෂක තහනම් දැල් ආම්පන්න යොදා මසුන් මරන පිරිස් සමඟ සබඳතා ඇති බවයි.
“බාබු සර් අපිත් එක්ක එකතුවෙලා, හමුදාවේ සහායෙන් තහනම් ආම්පන්න වලින් මාළු අල්ලන කට්ටියක් අල්ලා ගෙන උසාවි දැම්මා, ඒත් ප්‍රාදේශීය අධ්යක්ෂ තුමා මැදිහත් වෙලා ඒ තහනම් ආම්පන්න උසාවියෙන් නිදහස් කරගන්න මැදිහත් වුණේ බාබු සර්ට උසාවි යන්න දෙන්නේ නැතුව,” යැයි රාහුමානියා ධීවර සමිති නායක රාමසාන් චෝදනා කරයි.
ධීවර ඇමැති දේවානන්ද සේවය කරනුයේ උතුරු පලාතට පමණක් බවට චෝදනා කරන අම්පාර දිස්ත්‍රික් ධීවරයෝ නැගෙනහිර පළාතේ ධීවරයන්ගේ ගැටළු කෙරෙහි ද ඇමැති ගේ උනන්දුව තිබිය යුතු බව පවසති.
Facebook Comments
