වතු කම්කරුවන්ට ‘බ්‍රිතාන්‍යයෙන් වන්දි ඕනෑ’

ඉංග්‍රීසි හමුදාවේ සටන් වැදුණු නේපාලයේ ගුර්කා භටයන්ට ගෙවන්නාක් මෙන් ඉන්දියාවේ සිට රැගෙන ආ වතු කම්කරුවන්ට ද බ්‍රිතාන්‍යය වන්දියක් ලබා දිය යුතු බවට කඳුකරයේ සමාජ හා දේශපාලන ක්‍රියාධරයෙකු අවධාරණය කර තිබේ.

“දැනට වසර 200 කට පෙර එංගලන්ත පාලකයින් මෙරටට ඉන්දියාවේ සිට කම්කරුවන් ලක්‍ෂ ගානක් රැගෙන ආවා. වැඩිපුරම කාලයක් කම්කරුවන් ලෙස වැඩ කළේ ඔවුන්ට .ඒත් ඒ ගොල්ලෝ ලංකාවෙන් යන කොට මේ වතුකම්කරුවන් ගැන වගකීම පැහැර හැරියා,“යැයි සමාජ සංවර්ධන ආයතනයේ විධායක අධ්‍යක්‍ෂක පෙරියසාමි මුත්තුලිංගම් පවසයි.

මාධ්‍යයට අදහස් දක්වමින් මුත්තුලිංගම් පවසන්නේ නේපාලයේ ගුර්කාවරුන් වන්දි ලබා ගත් පරිද්දෙන්, කොරියානුවන් ජපානයෙන් වන්දි ලබා ගත් අයුරින්, ලංකාවේ වතු කම්කරුවන් ද බ්‍රිතානයෙන් වන්දියක් ලබා ගත යුතු බවයි.

“1824 ඉඳන් කෝපි, තේ වගාවන්ට ගෙනාපු මේ කම්කරුවන්වට 48 සහ 72 ව්‍යවස්ථාවන් වලින් පුරවැසිකම ගැන ප්‍රශ්න මතු වුණා. ඒත් බ්‍රිතාන්‍යය ඒ ගැන සැලකුවේ නැහැ. වතු කම්කරුවන්ගේ මානව සංවර්ධන වගකීම අත්හැරියා.“

ශ්‍රීලංකා කොමියුනිස්ට් පක්ෂයෙන් මතවාදී ලෙස ඉවත් වුනු පෙරියසාමි මුත්තුලිංගම් 80 දශකයේදී දයාන් ජයතිලකගේ නායකත්වයෙන් යුත් `විකල්ප කණ්ඩායම` සමඟ දේශපාලනයේ නිරතව සිටියදී එවකට පැවති එක්සත් ජාතික පක්‍ෂ ආණ්ඩුව මගින් රාජ්‍ය විරෝධී කුමන්ත්‍රණ නඩුවක චුදිතයකු ලෙස නම් කෙරිණි.

කඳුකරයේ ජනයා ඉලක්ක කරගනිමින් පවත්වා ගෙන යන සමාජ සංවර්ධන ආයතනයේ විධායක අධ්‍යක්‍ෂ වන ඔහු කඳුකර දෙමළ ජනයාගේ සමාජ හා දේශපාලන අභිලාෂයන් ඇතුලත් ලියවිල්ලක් සකස් කිරීමට පසුගිය දා මුල් විය.

“අපි සකස් කළ මේ ලියවිල්ලෙන් ඉල්ලන්නේ කඳුකර දෙමළ ජනතාව රටේ සම පුරවැසියන් විදිහට සලකන්න. බලය බෙදා හැරීමේ ව්‍යුහයක් ලෙස 13 වැනි ව්‍යවස්ථා සංශෝධනය ශක්තිමත් කරන්න. දෙමළ හා සිංහල රාජ්‍ය භාෂා ලෙස පිළිගන්නා 16 වැනි ව්‍යවස්ථා සංශෝධනය සම්පුර්ණයෙන්ම ක්‍රියාත්මක කරන්න.“

“චන්ද්‍රිකා බණ්ඩාරනායක ජනාධිපති විදිහට හිටිය කාලේ සිංහල දෙමළ භාෂා දෙකෙන්ම වැඩ කරන ප්‍රාදේශීය ලේකම් කාර්යාල 49 ක් තිබුණා. අද දෙමළ මිනිස්සු වැඩියෙන්ම ඉන්න උතුරු නැගෙනහිරවත් ආණ්ඩුව මේ භාෂා ප්‍රතිපත්තිය ක්‍රියාත්මක කරන්නේ නැහැ. එහෙත් රාජ්‍ය ආයතන ගොඩක් වැඩ කරන්නේ සිංහලෙන්.“

සමාජ සංවර්ධන ආයතනයේ විධායක අධ්‍යක්‍ෂකවරයා අවධාරණය කර සිටියේ කඳුකර දෙමළ ජනතාව අධ්‍යාපනය හා සෞඛ්‍ය ක්ෂේත්‍රයේ පසුවන්නේ ඉතාමත් පසුගාමී තැනක බැවින්, ඒවා සංවර්ධනය කිරීමට කෙරෙන යෝජනාවලියක් ද මේ සමගම සකස් කර ඇති බවයි.

කඳුකර දෙමළ ජනයා නියෝජනය කරන බුද්ධිමතුන් සමග සාකච්ජා කර සකස් කර ඇති සමාජ හා දේශපාලන ලියවිල්ල දෙස් විදෙස් ප්‍රජාවට ඉදිරිපත් කරමින්, ඉදිරි වැඩ කරගෙන යාම දෙමළ ප්‍රගතිශීලි පෙරමුණට බාර දී තිබේ.

“මේ යෝජනාවලිය ලංකා ආණ්ඩුවට, ඉන්දියාවට, බ්‍රිතාන්‍යයට වගේම මල්වතු -අස්ගිරි නාහිමි වරුන්ටත් දෙන්න ඕනෑ,“යැයි මුතුලිංගම් කියයි.