නිරෝධායන තහංචි මැද ජනඝාතනයේ එකොලොස් වසර අනුස්මරණය කෙරේ (VIDEO)

0

ශ්‍රී ලංකා යුද හමුදාව විසින් පනවන ලද තහංචි මැද උතුරු නැගෙනහිර දෙමළ ජනයා යුද්ධයෙන් අහිමි වූ තම සමීපතමයන් එකොලොස් වැනි අවුරුද්දේත් එක්ව සැමරීමට පියවර ගෙන තිබේ.

දස දහස් ගණනක් ජනඝාතනයට බිලිවූ මුල්ලිවයික්කාල් භූමියේ පැවති හැඟීම්බර අනුස්මරණය සඳහා සහභාගිවූවන් මාරාන්තික කෝවිඩ් වසංගතයට ගොදුරු නොවනු පිණිස සමාජ දුරස්ථභාවය සහතික කිරීමට කටයුතු යොදා තිබෙනු දැකගන්නට ලැබුණි.

හින්දු සහ කතෝලික පූජකවරුන් කැටුව මුහුණු වැසුම් පැළඳ පැමිණි බාල මහලු සැවොම සංවිධායකයන් විසින් සපයන ලද වතුරෙන් හා සබන් කැටයෙන් අත් දොවා මුහුදු වැල්ලේ සිටවූ නවාගත් කම්බි කූරු මත තැබූ කපුරු කැට දල්වන්නට පිය මැන්නෝය.

හැඟුම්බර අනුස්මරණය කෙටි වෙලාවකින් හමාර වූයේ පුෂ්පයෙන්, සුගන්ධයෙන් හා දීපයෙන් මල’වුන්ට බුහුමන් දක්වමිනි.

කෝවිඩ් 19 හේතුව සේ දක්වමින් සමරු බිම කරා දිවෙන ප්‍රධාන මාවත් අහුරා හමුදා පොලිස් මුරකපොලු යෙදීමෙන් ආරක්ෂක අංශ විසින් කල්තියාම තහංචි පනවා තිබුනි.

ආරක්ෂක අමාත්‍යාංශය විසින් ආරක්ෂක අංශ වෙත කරන ලද දැඩි නිවේදනයකින් කියා තිබුනේ මුල්ලිවයික්කාල් දින සමරු වැලැක්වීම සඳහා නිරෝධායන නීති යොදා ගන්නා ලෙසයි.

මහ සමරුවට යාම සඳහා උතුරේ හිටපු මහ ඇමැති සීවී විග්නේශ්වරන් සංගුපිටි ප්‍රධාන මාර්ගයෙන් ගමන් ගැනීමට ගත් උත්සාහය වලකා ලනු ලැබුවත් විකල්ප මාර්ගයක් ඔස්සේ සිය ගමනාන්තය කරා යාමට ඔහු සමත් වී තිබුණි.

එම් කේ ශිවාජිලිංගම් සහ ගජේන්ද්‍ර කුමාර් පොන්නම්බලම් යන දේශපාලකයන්ද අනුස්මරණ සඳහා සහභාගී වූයේ මුලින් බාධා කරනු ලැබීමෙන් අනතුරුවය.

දෙමළ ජාතික ජනතා පෙරමුණේ (TNPF) නායක ගජේන්ද්‍ර කුමාර් ඔහුගේ කාර්යාලයෙන් පිටවීමට එරෙහිව යාපනය අධිකරණය නිරෝධායන තහනමක් පනවා තිබුනත් එය පසුව ඉවත් කරවා ගැනීමට ඔවුහු සමත් වුහ.

කෙසේවෙතත්, යාපනයේ පිහිටි ඔහුගේ කාර්යාලය ඉදිරිපිට හමුදා බලමුළු රඳවා තිබුණි.

යාපනය ආරක්ෂක සේනා ආඥාපති මේජර් ජෙනරාල් රුවන් වනිගසුරිය පවසා තිබුනේ, “තිස් අවුරුදු යුද්ධයෙන් මියගිය නෑදෑයන් සමරන්නට අවශ්‍ය නම් නිවසේ සිට එය කරගත හැකි,” බවය.

දිවි හැරගිය සමීපතමයන්ට බුහුමන් දැක්වීමද මූලික මිනිස් අයිතිවාසිකමක් වන ඇදහිල්ලේ නිදහසේ අංගයක් බව නීති අංශ පෙන්වා දෙයි. “ඔවුන්ට එය අහිමි කිරීම මූලික මානව හිමිකමක් උල්ලංඝනය කිරීමක් වෙයි.”

උතුරු නැගෙනහිර දෙමළ සමරු සඳහා එතෙක් පැවති සීමා පසුගිය ආණ්ඩු පාලන සමයේ ලිහිල් වී තිබුණි. ගෝඨාභය රාජපක්ෂ පාලනය යටතේ පැවති පළමු මුල්ලිවක්කාල් සමරුව මෙයයි.

තොරතුරු පිටවීමට බාධා

මාධ්‍යවේදීන්ටද මුල්ලිවයික්කාල් ගමට යාමට තහංචි පනවා තිබුණි. වාර්තාකරණය මෙන්ම බුහුමන් දැක්වීම ද අරමුණු කොටගෙන යාපනයෙන් පාන්දර හයට ගමන් ඇරැඹු යාපනය මාධ්‍ය සමාජයේ තිහක් පමණ මාධ්‍යවේදීන් ට අනුස්මරණ භූමියට ලඟා වනු හැකි වී ඇත්තේ දවල් 11ට ය.

“අපිව චෙක් පොයින්ට් හයක විතර ඕනෑකමින්ම නතර කෙරුනේ මියගිය අය සමරන පාන දහයමාරට පත්තුකරනකොට යන්න බැරි වෙන්න,” යි යාපනයේ මාධ්‍යවෙදියකු පැවසුවේය.

“නිලධාරියෝ අපිව නවත්තගෙන ඉන්න එක එක හේතු කිව්වා. වෙලාවකට අපේ නම් රෙජිස්ටර් කරන්න ඕනේ කිව්වා. ආයෙත් තවත් තැන්වල කිව්වේ හමුදාවේ, පොලිසියේ ඉහලින් අවසර ගන්න ඕනේ කියලා.”

සමරුවේ ප්‍රධාන අංගය ඔවුන්ට මගහැරී ගොස් තිබුණි.

“තොරතුරු පිටවෙන එක වලක්වන එක ප්‍රධාන අරමුණ බව පැහැදිලිවම පෙනෙන්නට තිබුනා.”

මාධ්‍ය නිදහස පිළිබඳ ජගත් දර්ශකයේ ශ්‍රී ලංකාවට හිමිව ඇත්තේ පහල ස්ථානයකි. බලධාරීන්ගේ චෝදනාව වන්නේ දෙමළ සමරුව කෝටි කැරලිකරුවන්ට බුහුමන් පිදීමක් බවයි.

LTTE උනත් සැමරීමේ අයිතිය

ශ්‍රී ලංකා මානව හිමිකම් 2017 දී එවක ජනාධිපතිවරයාට මෙසේ ලියා දැන්වීය: “මියගිය අයකු LTTE සටන්කාමියකු වූ පලියට එය සිය ආදරණීයයන් වෙනුවෙන් ශෝක වීමට හා සිහිපත් කිරීමට ඥාතීන්ට සැලසෙන අවස්ථාව වැළක්වීමේ හේතුවක් කොට නොගත යුතුය. සමීපතමයන්ගේ තරාතිරම හෝ දේශපාලන විශ්වාසය කුමක් වුවත් ඔවුන් සිහිපත් කිරීම සෑම පවුලකම අයිතියකි.”

යුද පීඩිතයන්ගේ සෝබර මුල්ලිවයික්කාල් සමරුව පැයකට අඩු කාලයක් තුලදී නිමා වූ අතර යුද්ධය උත්කර්ෂයට නැංවූ බත්තරමුල්ලේ උත්සවය පැය දෙකකට වැඩි කාලයක් ඇදෙනු දකිත හැකි විය.

රටතුල දවල් වරුවේ ඇඳිරි නීතිය බලපැවැත්වෙන්නේ කොළඹ හා ගම්පහ දිස්ත්‍රික්ක වල පමණක් බව මෙහිදී සටහන් කර තබනු වටී.

Facebook Comments

wedding people