මුහුදු මහා විහාරයට ආරක්ෂක හමුදා යෙදවීම ගැන විරෝධය (VIDEO)

0
550
Ivory Agency Sri Lanka
HailHost
wedding people

මතභේදයට තුඩුදී තිබෙන මුහුදු මහා විහාරය අවට ඉඩම් සම්බන්ධ සිවිල් ඉඩම් පරිපාලනය සඳහා පැහැදිලි ක්‍රියාමාර්ග අනුගමනය නොකර ආරක්ෂක හමුදා මැදිහත්කරවීම සම්බන්ධයෙන් රජයට විරෝධයක් එල්ල වී තිබේ.

පුරාවිද්‍යාත්මක වශයෙන් මෙන්ම සංචාරක ආකර්ෂණය අතින්ද වැදගත් කමක් උසුලන අම්පාර දිස්ත්‍රික්කයේ පොතුවිල් වෙරළාසන්නයේ පිහිටි විහාරයබදව නාවික හමුදා අනුඛණ්ඩයක් ස්ථාපිත කරන ලෙස ආරක්ෂක ලේකම් කමල් ගුණරත්න නාවික හමුදාපතිට නියෝග කර තිබුණි.

එම අණ පනවන ලද්දේ ත්‍රිවිධ හමුදා සෙන්පතින් සමග නැගෙනහිර පළාතේ කරන ලද සංචාරයකදීය. හමුදා බලධාරීන් දීඝවාපී ප්‍රදේශයට සහ නොරොච්චෝලේ නිවාස යෝජනා ක්‍රමය ද නිරීක්ෂණය සඳහා සංචාරය කර තිබේ. එම නියෝගය වහාම අවලංගු කරන ලෙස බලහත්කාරයෙන් ඉඩම් අල්ලා ගැනීම සම්බන්ධයෙන් මැදිහත් වන බහුජන සංවිධානයක් ඉල්ලා සිටී.

පොතුවිල් මුහුදු මහා විහාරයේ මෑත කාලීන වර්ධන පිළිබඳව එළි දක්වා ඇති ප්‍රකාශයකින් ඉඩම් අත්පත් කර ගැනීමේ නීති සහ හමුදාව අනිසි ලෙස භාවිතා කිරීම සම්බන්ධයෙන් ඉඩම් අයිතිය සඳහා වූ මහජන සන්ධානය (PARL) කනස්සල්ල පල කර ඇත.

“අම්පාරේ පොතුවිල් මුහුදු මහා විහාරය ප්‍රදේශයේ සිවිල් ඉඩම් පරිපාලනය සඳහා හමුදාව මැදිහත්වීම මෙන්ම පුරාවිද්‍යාත්මක හිමිකම් විද්‍යාත්මකව යුක්ති සහගත කිරීම හා බලපෑමට ලක්වූ ප්‍රජාවන් සමඟ සාකච්ඡා කිරීම වෙනුවෙන් විනිවිද පෙනෙන ක්‍රියා පටිපාටීන් අනුගමනය නොකර පුරාවිද්‍යාත්මක ස්ථානයක් වශයෙන් මෙම ඉඩම් නීත්‍යනුකූලව අත්පත් කර ගැනීමට උත්සාහ කිරීමේ වාර්තාවන් පිළිබඳව ඉඩම් අයිතිය සඳහා වූ මහජන සන්ධානය තම කණස්සල්ල ගැඹුරින් යොමුකර තිබේ.”

“රටේ පුරාවිද්‍යාත්මක හා ඓතිහාසික ස්ථාන කිහිපයක්ම පුළුල් හා පෙර නොවූ විරූ ලෙස අනවසරයෙන් සිදු වූ අල්ලා ගැනීම් සහ විනාශ කිරීම්,” පිළිබඳව චෝදනා කරමින් මෑත කාලීන ප්‍රධාන ධාරාවේ සහ සමාජ මාධ්‍යවල තිබූ ප්‍රවෘත්ති වලට දක්වන ප්‍රතිචාරයක් ලෙසින් හමුදා බලධාරී සංචාරය සිදුව ඇති බව එම සන්ධානය පවසයි.

සංවේදී සහ අර්ථවත් විසඳුම්

ඕනෑම ප්‍රදේශයක ඉඩම් ගැටළු සඳහා සංකීර්ණ ඉතිහාසයක් ඇති බව පෙන්වා දෙන එම සන්ධානය අවධාරණය කරන්නේ, එහි ජනතාවට දිගු කාලීන දුක්ගැනවිලි ඇති අතර, ඒ සඳහා සංවේදී හා අර්ථවත් විසඳුම් අවශ්‍යවන බව ඕනෑම වැඩසටහනක දී සැලකිල්ලට ගත යුතු බවයි.

1961 වන තෙක් අම්පාර දිස්ත්‍රික්කය මඩකලපුව දිස්ත්‍රික්කයේ කොටසක් වූ අතර ඉන් පසුව එහි අනන්‍යතාවය දිගාමඩුල්ලේ ශිෂ්ටාචාරමය වැදගත්කම සමඟ සම්බන්ධ වී තිබු බව පෙන්වා දෙන ඉඩම් අයිතිය සඳහා වූ මහජන සන්ධානය අවධාරණය කරන්නේ සියවස් ගණනාවක් පුරා මෙම ප්‍රදේශයේ පදිංචිව සිටි දෙමළ සහ මුස්ලිම්වරුන් පිළිබඳව එහි කිසිදු සඳහනක් නොමැති බවයි.

අම්පාරේ ඉඩම් ජනපදකරණය සහ ඉඩම්වලින් ඉවත් කිරීම පිළිබඳ නිදහසින් පසු දීර්ඝ හා කටුක ඉතිහාසයක් ඇති අතර එය ගල් ඔය වාරිමාර්ග යෝජනා ක්‍රමය, 1956 කෝලාහල, යුද්ධය හා පශ්චාත් යුද වර්ධනයන් සහ සුනාමිය සමඟ සම්බන්ධ වී ඇති බව එම සන්ධානය පවසයි.

මෙම සියලු සිදුවීම් මගින් ජනගහන සංඛ්‍යාලේඛනවල සැලකිය යුතු වෙනස්කම් ඇතිකර තිබෙන අතර වර්තමානයේ දී මුස්ලිම් සහ දෙමළ ජනගහනය වෙරළ තීරයේ කේන්ද්‍රගතව වාසය කරන බවත් සිංහල ජනගහනය වැඩි වශයෙන් ගොඩබිම දෙසට කේන්ද්‍රගත වී තිබෙන බවත් ඉඩම් අයිතිය සඳහා වූ මහජන සන්ධානය විසින් නිකුත් කළ ප්‍රකාශනයේ දැක්වේ.

“පරිපාලන ආයතනික ව්‍යුහයන්ගේ සංයුතිය අතිශයින් ජනවාර්ගික වී තිබේ. දේශපාලන අනුග්‍රහය සම්පත් වෙන් කිරීම කෙරෙහි බලපාන අතර එමඟින් එය ද ජනවාර්ගික වී තිබේ.”

ඉඩම් ආරාවුල්

මෙම ප්‍රදේශයේ ප්‍රජාවන් අතර ගැඹුරු අවිශ්වාසයක් අඛණ්ඩව ඇති වී තිබෙන බව පෙන්වා දෙන ඉඩම් අයිතිය සඳහා වූ මහජන සන්ධානය අවධාරණය කරන්නේ දීඝවාපී පූජා භූමිය, පොතුවිල් ඉඩම් සහ පුරාවිද්‍යාව පදනම් කරගෙන ඉඩම්වලින් ඉවත් කිරීම, සහ නොරොච්චෝලේ සුනාමි නිවාස යනාදිය සඳහා වෙනස් කොට සැලකීම, බලය යෙදවීම සහ ජනවාර්ගික රේඛා ඔස්සේ බෙදීම පිළිබඳව වූ අම්පාර ප්‍රදේශයේ ඉඩම් ආරාවුල් පැමිණිලි සඳහා පැහැදිලි උදාහරණ වන බවයි.

පුරාවිද්‍යාත්මක ස්ථානයක් ලෙස පොතුවිල් මුහුදු මහා විහාරය අවට ප්‍රදේශය හා සම්බන්ධ මායිම්වල පැහැදිලි බවක්, මහජන සන්නිවේදනයක් නොමැති අතර, ඉඩම්වලින් ඉවත්කිරීම පිළිබඳ දුක්ගැනවිලි වලින් පිරී තිබෙන බවයි ඉඩම් අයිතිය සඳහා වූ මහජන සන්ධානය පවසන්නේ.

රජය විසින් ඉඩම් අත්පත් කර ගැනීමට හෝ ඉඩම්වල පදිංචිවීමට පෙර ප්‍රදේශයේ හමුදා කඳවුරු පිහිටුවීමේ ක්‍රියාවලිය දිගින් දිගටම සිදුකිරීම පිළිබඳව ඉඩම් අයිතිය සඳහා වූ මහජන සන්ධානය අවධානය යොමු කර තිබෙන අතර ඔවුන් පවසන්නේ මෙය විශේෂයෙන්ම උතුරු හා නැගෙනහිර ප්‍රදේශවල බහුලව දක්නට ලැබෙන බවයි.

පුරාවිද්‍යා, වනජීවී සහ වන සංරක්ෂණ දෙපාර්තමේන්තු භාවිතා කරමින් අපැහැදිලි හෝ සුළු සාධාරණීකරණයකින් යුත් ඉඩම් අත්පත් කර ගැනීමේ ප්‍රවණතාව පිළිබඳව PARL ලේඛනගත කර තිබෙන අතර මෙම අත්තනෝමතික ඉඩම් අත්පත් කර ගැනීම් ස්ථාපිත ප්‍රජාවන් පලවා හැරීමට හේතු වී ඇති අතර ජනවාර්ගික සුළුතරයන් කෙරෙහි අසමාන ලෙස බලපාන ඉඩම් ආරවුල් ඇති කර තිබෙන බව එම සන්ධානය පවසයි.


බුද්ධාගම රකින්නාගේ භූමිකාව

“ජනවාර්ගීකරණය වූ සහයෝගීතාවයේ දේශපාලන අදාළත්වය සහ මැතිවරණ වර්ෂයක් තුළ ‘බුද්ධාගම ආරක්ෂා කරන්නාගේ’ප්‍රතිරූපයක් යෙදවීම ද කැපී පෙනේ.” ඉඩම් අයිතිය සඳහා වූ මහජන සන්ධානය විසින් නිකුත් කළ ප්‍රකාශනයේ සදහන්ව තිබේ.

මුහුදු මහා විහාර සංචාරයේ යෙදුනු ආරක්ෂක ලේකම්වරයාද මාධ්‍යවේදීන්ට ප්‍රකාශ කර තිබුනේ පළාතේ නටබුන් විනාශ වීම ගැන “බෞද්ධයින් ලෙසින්” කම්පාවට පත් වන බවයි.

ඉහත සඳහන් සියල්ල සැලකිල්ලට ගෙන පොතුවිල් ප්‍රදේශයේ නාවික ඒකකයක් පිහිටුවීම කිසිදු ප්‍රමාදයකින් තොරව ඉල්ලා අස්කර ගන්නා ලෙස ආරක්ෂක අමාත්‍යංශයට උපදෙස් දෙන්නැයි ජනාධිපතිවරයාගෙන් ඉල්ලා සිටින ඉඩම් අයිතිය සඳහා වූ මහජන සන්ධානය අවධාරණය කරන්නේ මූලික වශයෙන් සිවිල් පරිපාලන ගැටලුවක් සඳහා මිලිටරි මැදිහත්වීම මෙම ගැටළුව වඩාත් සංකීර්ණ කරවනු හා ජනතාව එකිනෙකාගෙන් තවතවත් දුරස් කරවනු ඇති බවයි.

මේ සම්බන්ධයෙන් වූ ඕනෑම නීතිය හා සාමය පිළිබඳ ගැටළුවක් පොලීසියට අයත් විෂය පථය තුළ තිබිය යුතු බව එම සන්ධානය වැඩි දුරටත් අවධාරණය කරයි.

සියලු කරුණු තහවුරු කර සත්‍යාපනය වන තුරු ප්‍රකෝපකාරී වචන භාවිතා කිරීමෙන් වළකින ලෙස සියලු පාර්ශ්වයන්ගෙන් සහ විශේෂයෙන් මාධ්‍යයෙන් ඉඩම් අයිතිය සඳහා වූ මහජන සන්ධානය ඉල්ලා සිටී.

Facebook Comments

HailHost