ජනපති නිර්දේශයෙන් සංවර්ධන ලොතරැයි මණ්ඩලයට නව සභාපතිවරයෙක්

0

රාජ්‍ය හා පෞද්ගලික අංශයේ ජ්‍යෙෂ්ඨ කළමනාකරුවෙකු වූ එස්. ඒ. පී. සූරියප්පෙරුම ජනාධිපතිවරයාගේ නිර්දේශය මත, සංවර්ධන ලොතැරැයි මණ්ඩලයේ සභාපති ලෙස මුදල් හා ජනමාධ්‍ය අමාත්‍ය මංගල සමරවීර විසින් පත් කල බව රජය පවසයි.

කඳපොල මහින්ද මහා විද්‍යාලය, පොරමඩුල්ල මධ්‍ය මහා විද්‍යාලය හා මිනුවන්ගොඩ නාලන්දා මධ්‍ය මහා විද්‍යාලයේ ආදි සිසුවෙකු වන මොහු ශ්‍රී ජයවර්ධනපුර විශ්වවිද්‍යාලයෙන් ව්‍යාපාර පරිපාලන විශේෂ (ගෞරව) උපාධිය ලබාගෙන ඇත.

ලංකා බැංකුවේ අභ්‍යාසලාගී කළමනාකරුවෙකු වශයෙන් කළමනාකරණ ක්ෂේත්‍රයට පිවිසි මොහු, පසුව සෙලාන් බැංකුවේ ප්‍රධාන කළමනාකරුවෙකු වශයෙන් දීර්ඝ කාලයක් කටයුතු කර ලැබීය.

බැංකු ක්ෂේත්‍රෙයන් ඉවත් වු එස්. ඒ. පී. සූරියප්පෙරුම ලංකා සිමෙන්ති සමාගමේ සභාපතිවරයා ලෙසත් සමෘද්ධි අධිකාරියේ අධ්‍යක්ෂවරයෙකු ලෙසත්, සමෘද්ධි අමාත්‍යාංශයේ උපදේශකවරයෙකු ලෙසත්, පොල් සංවර්ධන අධිකාරියේ අධ්‍යක්ෂවරයෙකු ලෙසත් පසුගිය කාලය තුළ දී කටයුතු කළ ඇති අතර, ශ්‍රී ලංකා ආයුර්වේද වෛද්‍ය සභාවේ සාමාජිකයෙකු ලෙස ද සේවය කර තිබේ.

ජාත්‍යන්තර ෆාම් තෙල් නිෂ්පාදන සමාගමක් වන විල්මාර් ජාත්‍යන්තර සමාගමේ අනුබද්ද සමාගමක් වූ පිරිමිඩ් ලංකා සමාගමේ ශ්‍රී ලාංකීය ෆාම් තෙල් පිරිපහදුවේ ආරම්භක සාමාන්‍යාධිකාරිවරයා හා අධ්‍යක්ෂ මණ්ඩල සාමාජිකයෙකු ලෙස 2012 වසර දක්වා කටයුතු කරමින් ආහාරමය තෙල් පිරිපහදු ක්‍රමය ශ්‍රී ලංකාවට හඳුන්වාදීමට ද ඔහු දායක වී ඇත.

විල්මාර් ජාත්‍යන්තර සමාගම් සමූහයේ (Willmar International) විල්මාර් අප්‍රිකානු සමාගමේ අධ්‍යක්ෂවරයෙකු සහ සාමාන්‍යාධිකාරිවරයා ලෙසත් බෙන්සෝ ඔයිල් ෆාම් වැවිලි සමූහයේ අධ්‍යක්ෂකවරයකු සහ විගණන කමිටු සාමාජිකයකු ලෙසත්, ඝානා රාජ්‍යයේ වසර හතරක කාලයක් කටයුතු කර ඇති අතර, විල්මාර් ඔලිවින් (Willmar Olivin) සිම්බාබ්වේ සමාගමේ ප්‍රධාන ව්‍යාපාර කළමනාකරු වශයෙන් වසරක කාලයක් කටයුතු කර තිබේ.

සේන සූරියප්පෙරුම විද්‍යුත් සහ මුද්‍රිත මාධ්‍ය මගින් ආර්ථික හා මූල්‍ය කටයුතු පිළිබඳ විශ්ලේෂණය කිරීමේ නියළුණු අතර ජාතික පුවත්පත් කිහිපයකට ව්‍යාපාර, මූල්‍ය හා සංවර්ධන කටයුතු සම්බන්ධ තීරු ලිපි ලේඛකයෙකු වන අතර, ශ්‍රී ලංකා රූපවාහිනී සංස්ථාවේ “සතියේ ආර්ථික විමසුම” සංකල්පය ඉදිරිපත් කර දීර්ඝ කාලයක් එම වැඩසටහනට පවත්වාගෙන යාමට දායක වී ඇති බව රජය වැඩි දුරටත් නිවේදනය කරයි.

Facebook Comments

wedding people