උතුරු මුහුදේ මසුන් මැරීම සදහා ඉන්දීය ධීවරයන්ට අවසර ලබා දීමට සුදානම් බවට ලංකාවේ අගමැතිවරයා ඉන්දීය මාධ්‍ය හමුවේ කළ ප්‍රකාශයට ධීවර සංගම් නායකයකු දැඩි විරෝධය පළ කර තිබේ.
ඔක්තෝබර් 6 වැනිදා තමිල්නාඩු තන්දි රූපවාහිනියට සම්මුඛ සාකච්ඡාවක් ලබා දෙමින් අගමැති දිනේෂ් ගුණවර්ධන එම සුදානම ප්‍රකාශ කළේ ඉන්දීය ධීවරයන්ට බලපත්‍ර ලබාදීමට ඉන්දියාව කළ යෝජනාව සම්බන්ධයෙන් මාධ්‍යවේදියකු විමසු අවස්ථාවේදීය.
“ඒ සම්බන්ධයෙන් අපි සාකච්ඡා පවත්වමින් සිටිනවා. ජනාධිපතිතුමා ඉන්දියාවට ආපු වෙලාවේ මේ ගැන කතා කළා.”
මේ සම්බන්ධයෙන් ඔබ සලකා බලනවාදැයි මාධ්‍යවේදියා විමසු විටදී අගමැති දිනේෂ් ගුණවර්ධන ඊට ඇති සුදානම ප්‍රකාශ කර තිබුනේ පහත පරිදිය.
“ඔව් ඒකට ලෑස්තියි. දෙපාර්ශ්වයේම ධීවරයන්ගේ සහයෝගය අත්‍යවශ්‍යයි. මේක ආණ්ඩුවලට අදාළ දෙයක් නෙවෙයි. ධීවරයන් සම්බන්ධ කාරණයක්. මේ කාරණයේදී අවබෝධය අත්‍යවශ්‍යයි.”
ඔක්තෝබර් 11 වැනිදා යාපනයේ දී මාධ්‍ය හමුවක් පවත්වමින් උතුරු පළාත් ධීවර ජාලයේ ලේකම් එන්. එම්. ආලම් අගමැතිවරයාගේ ප්‍රකාශයට ප්‍රතිචාර දැක්වුයේ ලංකාවේ ආණ්ඩුව උතුරේ ධීවරයන්ට සහ දකුණේ ධීවරයන්ට දෙයාකාරයකින් සලකන බවට චෝදනා කරමිනි.
“ඔවුන් උතුරේ ධීවරයන් එක දෘෂ්ටිකෝණයකිනුත්, දකුණේ ඉන්න තමන්ගේ ධිවර ප්‍රජාව තවත් දෘෂ්ටිකෝණයකිනුත් දකිනවා. උතුරු පළාත දෙමළ කතා කරන ජනතාව ලෙසත් ඒක දෙමළ ජනතාවගේ ප්‍රදේශය ලෙසත් වත්මන් ආණ්ඩුව මායිම් කරලා තියනවා. මේ මතය ප්‍රකාශ කළ අග්‍රාමාත්‍යවරයා ඉන්දිය ධීවරයන් මීගමුවේ හෝ හලාවත ධීවර කටයුතු වල නිරත වී සිටිනවා නම් ඔහුට මේ මතය ප්‍රකාශ කරන්න පුළුවන්ද ? ඒ ජනතාව ඒකට ඉඩ දෙයිද ?”
ධීවර සංගම් නායක එන්. එම්. ආලම් එහිදී වැඩි දුරටත් පෙන්වා දුන්නේ උතුරේ ලක්ෂ දෙකකට අධික ධිවරයන් සහ ඔවුන්ගෙන් යැපෙන්නන්ගේ එකම ආදායම් මාර්ගය මසුන් මැරීම පමණක් බවයි.
“සම්පත් විකුණා මුදල් ඉපැයීම තමයි ආණ්ඩුවේ අරමුණ. ඒ හැර ආණ්ඩුවේ ක්‍රියාකාරකම් මිනිස්සුන්ගේ ජීවිකාව සදහා නෙමෙයි. උතුරු මුහුදු ප්‍රදේශයේ වෙසෙන දෙමළ ජනතාවගේ ජීවනෝපාය රඳා පවතින්නේ ඒ මතයි. අද වන විට ධීවරයන් ලක්ෂ 2කට ආසන්න ප්‍රමාණයක් සහ ඔවුන්ගෙන් යැපෙන පවුල්වල සාමාජිකයන් උතුරු ප්‍රදේශයේ කිසිදු රැකියාවක් නොමැතිව මුහුදෙන් පමණක් යැපෙමින් ජීවත් වෙනවා.”
කුමන තත්වයක් යටතේ උවද පිටරැටියන්ට රටේ සම්පත් අත් පත් කර ගැනීමට ඉඩ නොදෙන බව ඔහු වැඩි දුරටත් මාධ්‍ය හමුවේදී අවධාරණය කළේය.
“ඔවුන් සම්පූර්ණයෙන්ම මුහුද විශ්වාස කරලා තමයි ජීවත් වෙන්නේ. මේ ප්‍රශ්නය තේරුම් නොගෙන අපි කොහොමද මේ සාගර සම්පත බෙදා ගන්නේ, කොහොමද බදු දෙන්නේ කියන අගමැති තුමාගේ ප්‍රකාශය අපිට හිතන්න වෙනවා. කොහොම නමුත් අපි එදා සිටි ස්ථාවරයේ තමයි දැනුත් ඉන්නේ. ඉන්දීය ධිවරයන් අපේ මුහුදට ඇතුල් වී මසුන් මැරීමට ඉඩ දෙන්නේ නැහැ.ජනාධිපති වේවා, අගමැති වේවා, ධීවර ඇමැති වේවා අපේ මුහුදේ සම්පත් බෙදලා දෙන්න අපේ රටේ ඉඩම් වෙනත් රටකට විකුනන්න අපි කාටවත් ඉඩ දෙන්නේ නැ.”
Facebook Comments
