ජාතික ප්‍රශ්නයට දේශපාලන විසඳීමට “රාජපක්ෂලා හැමදාම විරුද්ධයි” (VIDEO)

0

ජාතික ගැටලුව අවසන් කිරීමට දේශපාලන විසඳුමක් ලබා දීමට ගත් සෑම උත්සාහයකටම රාජපක්ෂවරු විරුද්ධ වු බව බලය බෙදීම වෙනුවෙන් පෙනී සිටින ආණ්ඩුවේ ප්‍රබල අමාත්‍යවරයෙක් උතුරේ දී ප්‍රකාශ කර තිබේ.

දකුණේ දී ජාතිවාදය වපුරන ඔවුන් උතුරට පැමිණ දෙමළ ජනතා අයිතිය පිළිබඳව කතා කරන බවට සුව ඇමැති රාජිත සේනාරත්න පසුගියදා වවුනියාව ප්‍රදේශයේ පැවැති උත්සවයකට එක්වෙමින් කියා සිටියේය.

“දැන් මේ ජනාධිපතිවරණය අවස්ථාවේ දී අපේ ප්‍රතිවාදීන් හැම තැනකම හැමවිටකම ජාතිවාදය ගොඩනගා ගෙන ඇවිල්ලා උතුරට ආවාම විතරක් බොරුවට කථා කරනවා දේශපාලනය, දෙමළ ජනතාවගේ අයිතිය කියලා. දෙමළ ජනතාවට අයිතිය දෙන හැම විටකම ඔය පක්ෂය, කට්ටිය විරුද්ධ වුණා. එදා එක්සත් ජාතික පක්ෂ ආණ්ඩුව 13 වැනි සංශෝධනය දෙන විට ඒකට විරුද්ධ වුණ ප්‍රධානතම කට්ටිය තමයි රාජපක්ෂවරු.”

ජාතික ප්‍රශ්නය වෙනුවෙ ගෙන එන ලද දේශපාලන විසඳුම “පාරට බැහැලා කඩාකප්පල් කරන්න” හැදු බවට චෝදනා කළ ඇමැතිවරයා ද්‍රවිඩ, මුස්ලිම් ජනතාවට එරෙහිව රාජපක්ෂවරු සිංහල බෞද්ධ ජාතිවාදය ගොඩනැගු බව ද පැවසීය.

“එදා රණසිංහ ප්‍රේමදාස මහතා වතුකරයේ ජනතාවට පුරවැසිකම දෙනකොට ඒකටත් විරුද්ධ වුණා. සිංහලයට හැර අනෙක් හැම ජාතියට දෙනකොටම මේ අය හැමදාම විරුද්ධ වුණා. මේ ජාතිවාදින් පරාද කරන්න තමුන්නාන්සේලාට අද අවස්ථාව උදා වෙලා තිබෙනවා.”

ජාතික සමගිය සහිත එක්සත් රටක් ගොඩනගමින්, එක්සත් රටක් යටතේ සියලු දෙනා බලය බෙදාගෙන සාධාරණව එක සමානව අයිතීන් භුක්ති විදිමින් ජිවත් විය හැකි රටක් බිහි කිරීම පරමාර්ථය ඇතිව නව ප්‍රජාතන්ත්‍රවාදී පෙරමුණ මෙවර ජනාධිපතිවරණයට ඉදිරිපත් වී සිටින බවද රාජිත සේනාරත්න අමාත්‍යවරයා පෙන්වා දුන්නේය.

රනිල් වික්‍රමසිංහ කිසි දිනෙක ජාතිකවාදයට යටත් නොවී ජාතීන් අතර සමගිය ඇති කිරිමට කටයුතු කළ බවද ඇමැති රජිත සේනාරත්න වැඩි දුරටත් සඳහන් කළේය.

Facebook Comments

wedding people