ඛනිජ වැලි ටොන් ලක්ෂ ගණනක් හාරා ගැනීමේ අරමුණින් ශ්‍රී ලංකාවේ උතුරු පළාතට අයත් මන්නාරම් දුපතට ගොඩබැස සිටින බහුජාතික සමාගම් ඔවුන්ට විරෝධය දක්වන ප්‍රදේශවාසී දුප්පත් ජනයාට බලය පෑම සඳහා හිටපු හමුදා සාමාජිකයන් යොදවා ගන්නා බවට පරිසර සංවිධානයක් විසින් හෙළි කොට තිබේ.
“මේ ප්‍රදේශ වලට ඒ සමාගම් වලට සම්බන්ධ කරගෙන තියනවා දැනට සේවයේ නැති හමුදා නිලධාරීන් ඇතුළු යම් කිසි බලයක් යොදවන්න පුළුවන් පුද්ගලයන්. ඒ හරහා දුප්පත් අහිංසක මිනිස්සුන්ට විශාල බලපෑමක් කරනවා.”
පාතාලය වෙනුවෙන් කුලියට මිනීමරන වෙඩික්කාරයන් පිරිසක් ශ්‍රී ලංකා යුද හමුදාවේ සිටින බව ත්‍රිවිධ හමුදාවේ සේනාධිනායකයාද වන ජනාධිපතිවරයා විසින් ප්‍රකාශයට පත් කර දස දිනක් ගත වීමටත් මත්තෙන් පරිසර යුක්ති කේන්ද්‍රයේ සභාපති හේමන්ත විතානගේ එම තොරතුරු හෙළි කර ඇත්තේ රාජ්‍ය හා විදේශිය ආයෝජන මගින් මන්නාරම දුපතේ ක්‍රියාත්මක කරන වානිජ ව්‍යාපෘති නිසා ප්‍රදේශවාසී ජනයා විදින දුක් ගැහැට සම්බන්ධයෙන් මන්නාරම සිවිල් පුරවැසි කමිටුව සමග පැවැති සාකච්ඡාවකදීය.
මන්නාරමේ 2023 වසරේත්, මේ වසරේත් සිදුකරන ලද ඝාතන කිහිපයක් සම්බන්ධයෙන් මේ වනවිට අත් අඩංගුවට ගන්නා ලද දෙදෙනාම යුද හමුදාවේ බව පොලිසිය පවසා ඇත.
මන්නාරම සිවිල් පුරවැසි කමිටුව සමග බදාදා (29) පැවැත්වු ඒකාබද්ධ මාධ්‍ය හමුවකදී හේමන්ත විතානගේ තව දුරටත් පෙන්වා දී තිබුනේ ශ්‍රී ලංකා විදුලි බල මණ්ඩලය විසින් මන්නාරම් දුපතේ ඉදි කර ඇති විදුලි බලාගාරයේ සහ මාර්ග සංවර්ධනයේ ප්‍රතිපලයක් ලෙස ගොඩ බිම ජලයෙන් යටවී ප්‍රදේශවාසීන් දුක් පීඩා විදින ආකාරයයි.
“අපිට මේ මොහොත වන විට දකින්නට හම්බුවෙන්නේ මන්නාරමේ විශාල ප්‍රදේශයක් පුරා ජලය පිරිලා, පහත් බිම් සියල්ල පිරිලා ඒ ජනතාව ඉතාමත් අසීරු තත්වයකට පත් වෙලා තියනවා. ඔවුන්ගේ රැකියාව අහිමි වෙලා තියනවා. ඔවුන්ට වැසිකිලි පහසුකම් ඇත්තේ නැහැ. ඒ වගේම දරුවන්ට වතුරේ බැහැගෙන තමයි පාසල් යන්නට වෙලා තියෙන්නේ. ඒ ගෙවල් දැන් සති කිහිපයක් තිස්සේ මේ ගං වතුරට යට වෙලා තියනවා.”
කුරුල්ලන්ට සංවේදී ප්‍රදේශයක් හරහා තවත් විදුලි බලාගාරයක් ඉදිකිරීමේ සුදානමක්ද හෙළි කළ පරිසර යුක්ති කේන්ද්‍රයේ සභාපති හේමන්ත විතානගේ ගොඩ බිම ජලයෙන් යටවීමට හේතු විස්තර කර තිබුනේ පහත අයුරිනි.
“මේකට ප්‍රධාන හේතුවක් විදිහට මේ ප්‍රදේශයේ ඇතිකරලා තියන ප්‍රධාන මාර්ග සංවර්ධනයත්, ඒ වගේම අතුරු මාර්ග සංවර්ධනයත්, හදුනා ගන්නට පුළුවන්. නමුත් ඊටත් වඩා පලපෑමක් සිද්ධ කරලා තියෙන්නේ ශ්‍රී ලංකා විදුලි බල මණ්ඩලය මෙගාවොට් 100 ක බලාගාරයක් සකස් කිරීමේ දී මුහුදු වෙරළට සමාන්තරව මැටි යොදා පාරක් සකස් කරලා තියනවා. මෙන්න මේ පාර සකස් කිරීම හරහා මේ වතුර ගලාගෙන යන මාර්ග සියල්ලම ඇහිරිලා තිබෙනවා. දැනට ඔවුන්ගේ සැකසුමක් තිබෙනවා තවත් මෙගාවොට් 20 ක තවත් කණු 20 ක බලාගාරයක් සකස් කරන්නට තව දුරටත් තලෙයි මන්නාරම දෙසට එහෙම කරන්නට උත්සාහ කිරීමේදී ඒ ප්‍රදේශය ඇත්තටම ඉතාමත් කුරුල්ලන්ට සංවේදී ප්‍රදේශයක්. ඒ වගේම ගං වතුරට සංවේදී ප්‍රදේශයක්.”
ඉන්දියාවේ අදානි සමාගම විසින් මන්නාරමේ ඉදි කිරීමට සැලසුම් කර ඇති බලාගාරය ඉදි කළහොත් මන්නාරම් දුපතට අත්වන ඉරණම දෙගුණ තෙගුන වන ආකාරයත් එම මාධ්‍ය හමුවේදී හේමන්ත විතානගේ පැහැදිලි කළේය.
“ඊට අමතරව අදානි බලාගාරය එහෙම නැතිනම් අදානි සමාගම විසින් කරන්නට යන විදුලි බලාගාරය මෙම දුපත පුරා තැනින් තැන කුළුනු 56 ක ප්‍රමාණයක් සවි කරන්නට තියනවා. මේ කුළුනු සවි කිරීමේදී නැවත වතාවක් අර විදිහයම මැටි යොදා පාරවල් සකස් කිරීම නිසා මේ ප්‍රදේශයේ ගං වතුර තත්වය දෙගුණ, තෙගුන වන්නට බොහෝ දුරට ඉඩ තිබෙනවා. ”
මන්නාරමේ සුලං විදුලි බලාගාර ඉදිකිරීමට අදානි සමාගම සමග ඇතිකරගත් අවබෝධතා ගිවිසුම අවලංගු කර නැතත්, ඒ පිළිබඳ සමාලෝචනය කොට රජය විදුලිය ලබාගන්නා මිලගණන් ගැන ‘කළයුතු වෙනස්කම් කිරීම’ සඳහා කමිටුවක් පිහිටුවා ඇති බවට රජයේ මාධ්‍ය ප්‍රකාශක දොස්තර නලින්ද ජයතිස්ස අමාත්‍යවරයා පසුගිය සතියේ හෙළි කර තිබුනි.
මන්නාරමේ මේ වන විටත් ඉදි කර තිබෙන සුළං බලාගාරය නිසා තමන්ට අහිමි වු ජන ජීවිතය පිළිබද අත්දැකීම් සහිත ගම්වැසියන් දිගින් දිගටම අවධාරණය කරන්නේ මෙම ආයෝජනය හරහා ද තමන්ට තව දුරටත් පීඩා විදීමට සිදු වනු ඇති බවටයි.
විශ්‍රාමික හමුදා සාමාජිකයන්ගේ සහ කිසියම් බලයක් යෙදවිය හැකි පුද්ගලයන්ගේද සහාය ඇතිව මන්නාරම් දුපතේ ඛනිජ වැලි ටොන් ලක්ෂ ගණනක් හාරා ගැනීම සඳහා බහුජාතික සමාගම් තුනක් දරන වීර්යද පරිසර සංවිධානයේ සභාපතිවරයා එහිදී හෙලි කළේය.
“ඒ වගේම ඔරයන් කියන සමාගමත් මාස් මෙට්ල් ඇන්ඩ් මිනරල්ස් කියන සමාගමත්, ඕස්ට්‍රේලියන් සමාගමක් විදිහට තියන ඉල්මනයිට් සෑන්ඩ්ස් කියන සමාගම් තුනම මේ අවස්ථාව වන විට මේ ප්‍රදේශයේ ඛනිජ වැලි කැනීම එහෙම නැතිනම් ඉල්මනයිට් වැලි කැනීම සදහා සියළු කටයුතු සකස් කරමින් තිබෙනවා.”
ප්‍රදේශවාසීන්ගේ දැඩි විරෝධය
ඛනිජ වැලි හාරා ගැනීම සඳහා බහුජාතික සමාගමකට බලපත්‍ර නිකුත් කිරීමට මන්නාරම් භුමියේ විමර්ශන කටයුතු සඳහා 2024 වසරේ නොවැම්බර් මාසයේදී පැමිණි රාජ්‍ය නිලධාරීන් ප්‍රමුඛ ආයෝජකයන් විරෝධතා දක්වා පසුබස්වන්නට ගම්වාසීන් සමත්ව තිබුනි.
2024 නොවැම්බර් 06 වැනි බ්‍රහස්පතින්දා මිනින්දෝරු දෙපාර්තමේන්තු නිලධාරීන්, මධ්‍යම පරිසර අධිකාරියේ නිලධාරීන්, මන්නාරම දිස්ත්‍රික්කයේ සහකාර දිස්ත්‍රික් ලේකම්, මන්නාරම ප්‍රාදේශිය සභාවේ නිලධාරීන් ඇතුළු රාජ්‍ය ආයතන 20 ට අධික ප්‍රමාණයක නියෝජිත මණ්ඩලයක් ටයිටේනියම් කැනීම වෙනුවෙන් නියැදි ලබා ගැනීමට මන්නාරම ප්‍රාදේශීය ලේකම් කොට්ඨාසයට අයත් ඕලෙයිතොඩුවායි, වලනගර් ග්‍රාමයට නිලධාරීන් පැමිණ තිබුනේ මහා පරිමාණයෙන් ඛනිජ වැලි කැනීම සඳහා බලපත්‍ර පහක් ලබා ගැනීමට ශ්‍රී ලංකා භූවිද්‍යා හා පතල් කැනීම් කාර්යාංශය විසින් අනුමැතිය ලබා දී ඇති ඕස්ට්‍රේලියාව මුලස්ථාන කොටගත් ටයිටේනියම් සෑන්ඩ්ස් බහුජාතික සමාගමේ නියෝජිතයන්ද කැටුවය.
2024 නොවැම්බර් මුලදී ලැබුණු එම අනුමැතිය අනුව ශ්‍රී ලංකා ආයෝජන මණ්ඩලයේ විදේශ ආයෝජක බලපත්‍රය සඳහා අයැදුම් කිරීම සඳහා පිහිටුවාගෙන ඇති ව්‍යාපාරික ආයතනය ඔරයන් මිනරල්ස් (පුද්ගලික) සමාගමයි.
“ආයෝජන මණ්ඩලයේ මගපෙන්වීම සහ අනුග්‍රහය මේ කාර්යයට මහත් උපකාරයක් වුණා. භූවිද්‍යා හා පතල් කැනීම් කාර්යාංශයේ අනුමැතියත් ඔරයන් නමට බලපත්‍ර නිකුත් කිරීමත් කැනීම් සඳහා අයැදුම් කිරීමේ වේගයට සහායක්. ඉදිරි මාස කීපය තුලදී ලබාගන්නා ප්‍රතිපලය සමාගම සම්බන්ධ සාධනීය චිත්‍රයක් මවනු ඇත,” යි ටයිටේනියම් සෑන්ඩ්ස් කළමනාකාර අධ්‍යක්ෂ ආචාර්ය ජේම්ස් සියර්ල් පවසා තිබුණි.
වසරකට ඛනිජ වැලි ටොන් 150,000ක් කැනීමේ ශක්‍යතාව සහිත ටයිටේනියම් සෑන්ඩ්ස් ආයෝජනයේ අපේක්ෂිත ආදායම ඕස්ට්‍රේලියානු ඩොලර් බිලියන දෙකක් බව කැනීම් සම්බන්ධ අඩසියවසකට වැඩි විශේෂඥතාවක් සහිත භූ විද්‍යාඥ ඩග් බ්‍රයිට් පවසයි. ඒ සඳහා ආයෝජනය කරනු ඇත්තේ ඕස්ට්‍රේලියානු ඩොලර් මිලියන 122කි. එමගින් ජාත්‍යන්තර පරිමාණයේ ඉල්මනයිට් නිෂ්පාදකයකු වෙමින් ප්‍රදේශවාසීන් 600කට රැකියා සම්පාදනය කෙරෙනු ඇති බවටද ඔහු අපේක්ෂාව පල කර ඇත.
Facebook Comments
