පරිස්සමින් පරිහරණය කරන බවට ආණ්ඩුව විසින් සහතික කරන ලද ත්‍රස්තවාදය වැළක්වීමේ පනත යොදාගෙන පොලිසිය කිසිදු හේතු දැක්වීමකින් තොරව දෙමළ දේශපාලන ක්‍රියාධාරියකු ත්‍රස්ත මර්දන සහ විමර්ශන කොට්ඨාසයට කැදවා තිබේ.
ඉලංගෙයි තමිල් අරසු පක්ෂයේ (ITAK) මධ්‍යම කාරක සභිකයකු ද වන පීටර් ඉලන්චේලියන්ට පෙබරවාරි 1 වැනිදා මුලතිව් අලම්පිල්හි පිහිටි ත්‍රස්ත මර්දන සහ විමර්ශන කොට්ඨාසයට (CTID) පැමිණෙන ලෙස ජනවාරි 29 වැනිදා දැනුම් දී ඇත්තේ එම ඒකකය විසින් සිදු කරනු ලබන විමර්ශනයකට අදාලව කට උත්තර ලබා ගැනීම සදහා බව පවසමිනි.
ඔහු ත්‍රස්ත මර්දන සහ විමර්ශන කොට්ඨාසයට කැදවා ඇති දිනට තෙදිනකට පසු උදාවන නිදහස් දිනය උතුරු නැගෙනහිර දෙමළ ජනයා මෙවරත් කළු දිනයක් ලෙස ප්‍රකාශයට පත් කර තිබේ.
පීටර් ඉලන්චේලියන් මින් ඉහත වසර කිහිපයකම ආණ්ඩුවේ නිදහස් සමරුවට හෙලා දකින විරෝධතාවලට නායකත්වය සැපයුවෙකි.
පාර්ලිමේන්තුවේ සභානායක, අමාත්‍ය බිමල් රත්නායක 2025 ජනවාරි 21 දා පවසා තිබුනේ ත්‍රස්තවාදය වැලැක්විමේ පනත ඉතාම පරිස්සමෙන් පාවිච්චි කරන්නට සිදු වන බවයි.
“ඒ වගේම ත්‍රස්ත විරෝධි පනත ගැන කියන්න තියන එකම දේ තමයි ඒක අපේ අභිලාෂයවත්, ප්‍රතිපත්තියවත් නෙමෙයි, නමුත් අළුත් පනත සකස් කරගන්නකං රටේ තියන නීති අපිට ඉතාම පරිස්සමෙන් පාවිච්චි කරන්න වෙනවා. මොකද අපි ආණ්ඩුවක් කරන්න ඕන පනත් සම්මත වෙනකං.” ඔහු පවසා තිබුනි.
පළාත් බද වාර්තාකරුවන් පවසන්නේ නව රජය බලයට පත් වීමෙන් පසුත් උතුරු නැගෙනහිර දෙමළ ක්‍රියාධරයන් ත්‍රස්ත මර්දන සහ විමර්ශන කොට්ඨාසයට කැදවීම් රැසක්ම වාර්තා වු බවයි.
Facebook Comments
