සිංහල බෞද්ධ ජනතාව වෙනුවෙන් පෙනී සිටින බවට සහතික කරන දිවයිනේ ඉහලම සංඝ නායකත්වය මුස්ලිම් විරෝධී වෛරක්කාරී බණක් වදාරා දින කිහිපයක් ගතවෙත්ම මහා සංඝරත්නයේ උපදෙස් හා අනුශාසනා පරිදි කටයුතු කරන්නේ නම් කිසිසේත් රටක් වැරදි මඟට යොමු නොවන බවට ජනාධිපතිවරයා ප්‍රකාශ කර තිබේ.
“මමත් කියනවා මුස්ලිම් කඩවලට යන්න එපා. ඒ කඩවලින් කන්න බොන්න එපා,” යි වරකාගොඩ ඤාණරතන අස්ගිරි මහනාහිමියන් දෙසා වදාළේ යටිනුවර, දියකෙළිනාව කිත්සිරිමෙවන් රජමහ විහාරස්ථානයේ විසි එක් රියන් සමාධි බුද්ධ ප්‍රතිමාව නිරාවරණය කිරීමේ උත්සවය අමතමිනි.
සිංහල කාන්තාවන් වඳ බවට පත් කළේ යයි ජනමාධ්‍ය මගින් අපහාසයට ලක් කෙරුනු මුස්ලිම් ජාතික වෛද්‍යවරයකුට ගල් ගැසීමට ඇතැමුන් කරන යෝජනාවද අස්ගිරි මහනාහිමියන් විසින් අනුමත කරන ලද්දේ “කළ යුත්තේ ඒක තමයි” යනුවෙන් පවසමිනි.
අස්ගිරි මහා නායක හිමි කරන ලද ප්‍රකාශ දුටු බව පැවසු ජනපති ඒ පිළිබඳව කතා කළේ එය අනුමත කරන ආකාරයෙනි.
“උපවාස කරන, සත්‍යග්‍රහ කරන, යකඩ වැටවල් වලින් පනින භික්ෂූන් වහන්සේලා ගැන නෙමෙයි මම මේ කියන්නේ. මම මේ කියන්නේ සමාජයේ වැඩ වෙසෙන වන්දනීය, පූජනීය ඔබ වහන්සේලා වැනි මහා ශ්‍රේෂ්ඨ බුද්ධ පුත්‍රයාණන් වහන්සේලාගෙන් අපට ලැබෙන මඟ පෙන්වීම් පිළිබඳවයි. ඊයේ පෙරේදා අස්ගිරියේ මහා නායක ස්වාමීන් වහන්සේ කරපු ප්‍රකාශයක් මම පුවත්පතක දැක්කා. මම ඒ ගැන කියන්නේ නැහැ ඔබ ඒ පිළිබඳව දැනුවත් ඇති.”
සෑමවිටම බෞද්ධ දර්ශනය පදනම් කරගත් රාජ්‍ය ප්‍රතිපත්තියක් රට තුළ ක්‍රියාත්මක විය යුතු බව ජනපති මෛත්‍රීපාල සිරිසේන 18 අඟහරුවාදා හඟුරන්කෙත, මාදන්වල රජමහා විහාරයේ අභිනව චෛත්‍යයේ ධාතු නිධන් කිරීමේ අවස්ථාවේදී සඳහන් කළේය.
අප රට තුළ සෑම ජන කොටසකටම සහ ආගමිකයෙකුටම නිදහසේ ජීවත් වන බවට විශ්වාසය පළ කරන ජනාධිපතිවරයා එම පරිසරය ගොඩනැඟී තිබෙන්නේ බෞද්ධ දර්ශනයේ එම මානවවාදී මඟපෙන්වීම හේතුවෙන් බව ද වැඩි දුරටත් කියා සිටියේය.
Facebook Comments
