ජීවිකාව රැකගැනීම සඳහා උතුරු නැගෙනහිර ගොවීහු වීදි බසිති

0

ගොවිතැන් කටයුතු සදහා අවශ්‍ය රසායනික පොහොර සහ කෘෂි රසායනික ද්‍රව්‍ය ලබා දෙන ලෙස රජයට බලකරමින් උතුරු නැගෙනහිර පුරා විරෝධතා මාලාවක් දියත් කර තිබේ.

පළාත් බද වාර්තාකරුවන් පවසන්නේ ඔක්තෝබර් 18 වැනි සඳුදා උතුරු නැගෙනහිර දෙපළාතේ ගොවිජන සේවා මධ්‍යස්ථාන ඉදිරිපිටම සටන් පාඨ හඬ නගමින් උද්ඝෝෂණ පැවැත්වූ බවයි.

ගොවීන් රැසකගේ සහභාගිත්වයෙන් පැවැති විරෝධතා මාලාව සදහා නායකත්වය ලබා දී ඇත්තේ දෙමළ ජාතික සන්ධානය විසිනි.

රජය විසින් රසායනික පොහොර නැවැත්වීම හේතුවෙන් තම වගා කටයුතු දැඩි අර්බුදයකට මුහුණ දී සිටින බව පවසන ගොවීන් අවධාරණය කර ඇත්තේ ඒ හේතුවෙන් සිය ආර්ථිකය දැඩි ලෙස කඩා වැටීමකට ලක්ව ඇති බවයි.

වසංගතයෙන් පීඩාවට පත්ව සිටින මොහොතක තම ආර්ථිකය කඩා වැඩීම කිසිසේත්ම ගොවීන්ට දරාගත නොහැකි තත්වයක් බව ඔවුන් වැඩි දුරටත් අවධාරණය කර තිබේ.

ගොවිතැන් කටයුතු සදහා අවශ්‍ය රසායනික පොහොර සහ කෘෂි රසායනික ද්‍රව්‍ය ලබා දෙන ලෙස රජයට බලකරමින් දකුනේත් කදුකරයේදී මේ වන විටත් විරෝධතා දියත් වෙමින් පවති.

උතුරේ පිඩිත ජනයාගේ ගැටළුවලට මැදිහත් නොවන බවට චෝදනා එල්ලවීමෙන් පසු දෙමළ ජාතික සන්ධානය ආණ්ඩුවට එරෙහිව විරෝධතා දියත් කිරීමට පසුගියදා තීරණය කර තිබුනි.

දෙමළ ජාතික සන්ධානය නිවේදනය කර තිබුනේ අනවසර ඉන්දීය ධීවරයන්ට නීතිය ක්‍රියාත්මක නොකිරීමටත් එරෙහිව ඔක්තෝබර් 17 වැනි දිනත් රසායනික පොහොර තහනම නිසාවෙන් පිඩාවට පත්ව සිටින උතුරු නැගෙනහිර ගොවි ජනතාව වෙනුවෙන් ඔක්තෝබර් 18 වැනි දිනත් විරෝධතා දියත් කරන බවයි.

ධිවර ගැටළු විසදීමට රජයට බල කරමින් මුලතිව් මුහුදේ සිට පේදුරු තුඩුව දක්වා බෝට්ටු පෙළපාලියක් සහිතව දැවැන්ත විරෝධතාවයක් දියත් කිරීමට ඔවුන් ඊයේ දිනයේ කටයුතු කර තිබුනි.

“ධීවර ඇමැති දෙමළ ජාතිකයෙක් වුනත්, දෙමළ ධීවරයන්ට වෙන මේ අසාධාරණය ගැන නීතිය ක්‍රියාත්මක නොකරන නිසා ඉන්දීය ට්‍රෝලර් යාත්‍රා ඇවිත්, උතුරේ ධිවර ජනයාට හානි කරලා, ඔවුන්ගේ මුහුදු සම්පත් අරගෙන යන තත්වයක් තියෙන්නේ, ඒ නිසා තමයි ධීවරයෝ මුලතිව් ඉඳන් පේදුරු තුඩුව වෙනකම් බෝට්ටු පෙළපාලියේ ඇවිත් ධීවර ඇමතිට එරෙහිව උද්ඝෝෂණය කරන්න සුදානම් වෙන්නේ,” යැයි විරෝධතාවය නිවේදනය කරමින් එම්. ඒ සුමන්තිරන් මන්ත්‍රීවරයා පසුගියදා සඳහන් කර තිබුනි.

ඔහු වැඩි දුරටත් පවසා තිබුනේ තම තමන්ගේ ප්‍රදේශවල ගොවි-ධිවර උද්ඝෝෂණ පැවැත්වීමට දකුණේ අනෙකුත් විරුද්ධ පක්‍ෂ නායකයන් සමඟ දෙමළ ජාතික සන්ධානය පැවති සාකච්ජාවලදී එකඟතාවකට එළඹී බවයි.

දියර පොහොර දිවයිනට

ඉන්දියාවෙන් නැනෝ නයිට්‍රිජන් දියර පොහොර ලීටර් ලක්ෂයක් ගුවනින් ඔක්තෝබර් 19 වැනිදා දිවයිනට රැගෙන ඒමට රජය තීරණය කර තිබේ.

ජනමාධ්‍ය වාර්තා කර ඇත්තේ අද උදෑසන ජනාධිපති කාර්යාලයේ පැවති රැස්වීමකදී එම තීරණය ගෙන ඇති බවයි.

මහ කන්නයේ වී වගාව ආරම්භ කර ඇති ගොවීන්ට එම දියර පොහොර ලබා දෙන බව කෘෂිකර්ම අමාත්‍යාංශ ලේකම් මහාචාර්ය උදිත් ජයසිංහ ජනමාධ්‍ය වෙත පවසා තිබේ.

Facebook Comments