ත්‍රස්තවාදී කටයුතු සම්බන්ධයෙන් සැකපිට රඳවාගෙන සිටින්නන්ට විරුද්ධව උසාවියේ සාක්ෂි වශයෙන් ඉදිරිපත් කිරීම සඳහා බලහත්කාරයෙන් පාපොච්චාරණ ලබාගැනීම සම්බන්ධයෙන් පොලිසියේ ප්‍රධානියාට ප්‍රශ්න මතුවී තිබේ.
වැඩබලන පොලිස්පති චන්දන වික්‍රමරත්න ට ලියන ලිපියකින් ශ්‍රී ලංකා මානව හිමිකම් කොමිසම විමසා ඇත්තේ ත්‍රස්තවාදය වැළක්වීමේ පනත යටතේ රඳවාගෙන ඉන්නා පුද්ගලයන් විසින් දෙනු ලබන බව පැවසෙන ප්‍රකාශ වල වලංගු භාවය සහතික කරන්නේ කෙසේ ද යන්නයි.
පසුගිය අඟහරුවාදා කොමිසම එම ලිපිය ලියා ඇත්තේ තමන්ටම වරද පවරන ප්‍රකාශ ලබා දීමට රැඳවියන්ට බල කෙරෙන බවට ලැබී ඇති පැමිණිලි සම්බන්ධයෙන් ජාතික පොලිස් කොමිසම සමග පැවති සාකච්ඡාවකදී දැනුම් දීමෙන් අනතුරුවයි.
“කලින් සකස් කරන ලද සිංහලෙන් ලියූ ප්‍රකාශ වලට අත්සන් ලබා දීමට පොලිස් මුලස්ථානයට කිහිප වාරයක් යන්නට සිදුවීම, ප්‍රකාශ වලට අත්සන් කළොත් නිදහස් කර යැවීම ආදී වරදාන ලැබෙනු ඇති බවට පොරොන්දු සහ අත්සන් නොකළොත් බොරු චෝදනා නගා නඩු පවරන බවට තර්ජන ආදිය ඊට ඇතුලත් වේ,” යි පරීක්ෂණ හා විමර්ශන භාර කොමසාරිස් රමණී මුත්තෙට්ටුවේගම නොවැම්බර් 24 දා යවා ඇති ලිපියෙන් පෙන්වා දී ඇත.
වැඩියෙන්ම දෙමළ හා මුස්ලිම් ජාතිකයන් වන ත්‍රස්තවාදී පනත යටතේ රඳවාගෙන ඉන්නා පුද්ගලයන්ට වදහිංසා පමුණුවා, නොතේරෙන සිංහලෙන් ලියු ප්‍රකාශයකට හෝ හිස් කොලයකට අත්සන් ගන්නා ලද අවස්ථා පිළිබඳව එක්සත් ජාතීන්ගේ ආයතන ඇතුළු මානව හිමිකම් සංවිධාන විශ්වසනීය තොරතුරු ඉදිරිපත් කර ඇති වාර ගණන අප්‍රමාණය.
ශ්‍රී ලංකා මානව හිමිකම් කොමිසම පොලිස් ප්‍රධානියාට යවා ඇති ලිපියෙන් කියැවෙන පරිදි සිරගත කොට සිටින්නන්ට “පාපොච්චාරණ කරන ලෙස උපදෙස් දී ඇතැයි” පොලිසිය පිළිගෙන තිබේ.
“ඔබ දන්නා පරිදි, තමන්ටම වරද පවරා ගන්නා ප්‍රකාශ, ත්‍රස්තවාදය වැළක්වීමේ පනත යටතේ වුව පිළිගත හැකි වන්නේ සාක්ෂි ආඥාපනතේ 24 වගන්තිය ප්‍රකාර ඒවා ස්වේච්ඡාවෙන් ලබාදීම පිලිබඳ පරීක්ෂණය මත පමණි,” යි මුත්තෙට්ටුවේගම කොමසාරිස්වරිය සිහිපත් කර දී ඇත.
ඒ අනුව, පොලිසියට ලබා දෙන ප්‍රකාශ වල වලංගු භාවය සහතික කිරීම සඳහා ගෙන ඇති පියවර කවරේ දැයි දන්වන ලෙස කොමසාරිස්වරිය පොලිස් ප්‍රධානී වික්‍රමරත්නගෙන් ඉල්ලා තිබේ.
Facebook Comments
