බාලිකාවන්ට වද දුන් බව කියන නේවාසිකාගාර පාලිකාවට උසාවියෙන් ඇප

උතුරේ දුපතක පිහිටි දශක අටකට වඩා පැරණි බාලිකා පාසලක නේවාසිකාගාරය තුලදී සිසුවියන් වධ හිංසා කළ බවට එල්ල වන චෝදනා යටතේ පොලීසිය විසින් අත්අඩංගුවට ගන්නා ලද නේවාසිකාගාර පාලිකාව අධිකරණය විසින් ඇප මත මුදා හැර තිබේ.

සිසුවියන්ගේ සිරුරේ පහර කෑමෙන් ඇතිවු කැලැල් ඇතැයි අධිකරණ වෛද්‍ය නිලධාරී වාර්තාවේ දැක්වෙන බව පවසන පළාත් බද වාර්තාකරුවන් වැඩි දුරටත් සඳහන් කරන්නේ නඩු විභාගය දිනයේත් බාලිකාවන් කයිට්ස් රෝහලේ ප්‍රතිකාර ලබමින් සිටින බවයි.

යාපනය කයිට්ස් දුපතේ පිහිටි ‘පුංචි වතිකානය’ ලෙසින් ප්‍රකට කරම්පන්හි ලිට්ල් ෆ්ලවර්ස් ගර්ල්ස් මහා විද්‍යාලයේ ඉගැනුම ලබන වසය අවුරුදු 10 – 17 අතර සිසුවියන් එකොලොස් දෙනකු මැයි 27 වැනිදා කයිට් පොලීසියට සිදු කළ පැමිණිල්ලක් අනුව මැයි 28 වැනිදා පොලීසිය විසින් නේවාසිකාගාර පාලිකා කන්‍යා සොයුරිය අත්අඩංගුවට ගත් බව පළාත් බද වාර්තාකරුවෝ පවසති.

එදිනම අධිකරණයට ඉදිරිපත් කරන ලද කන්‍යා සොයුරිය මැයි 29 දක්වා රක්ෂිත බන්ධනාගාර ගත කළ කයිට්ස් මහේස්ත්‍රාත්වරයා මැයි 29 වැනිදා ඇප මත ඇය මුදා හරින ලෙස නියෝග කර තිබේ.

සිසුවියන් 11 දෙනා මැයි 27 වැනිදා කයිට්ස් පොලීසියට පැමිනිලි කර ඇත්තේ පාසල් නේවාසිකාගාරයේ පාලිකා කන්‍යා සොයුරිය වසර තුනක පමණ කාලයක සිට තමන්ට පහර දී වධ හිංසා කරන බවයි.

නේවාසිකාගාරය තුලදී ඉංශ්‍රිසි භාෂාව නිවැරදි ලෙස උච්චාරණය නොකිරීම, ඉංශ්‍රිසි කතාබහේදී ව්‍යාකරණ නිවැරදි ලෙස භාවිත නොකිරීම මෙන්ම නේවාසිකාගාරය තුලදී ආගම සිහි කිරීමේ කටයුතු නිසි ආකාරයෙන් සිදු නොකිරීම වැනි චෝදනා නගමින් මෙම පහරදීම සිදු කරන බව සිසුවියන් පොලීසියට පැමිණිලි කර තිබේ.

කයිට්ස් පොලීසිය විසින් බාලිකාවන් 11 දෙනා යාපනය ශික්ෂණ රෝහලේ අධිකරණ වෛද්‍ය නිලධාරී (JMO) එස්. ප්‍රනවනාදන් වෙත ඉදිරිපත් කළ බව පළාත් බද වාර්තාකරුවෝ පවසති.

වසර කිහිපයක සිට පාසල් නේවාසිකාගාර පාලිකා කන්‍යා සොයුරිය තමන්ට සිදු කරන පහර දීම සම්බන්ධයෙන් සිසුවියන් සිය දෙමාපියන් මෙන්ම පාසල් බලධාරීන් දැනුවත් කර ඇතත් දොපියන් මෙන්ම පාසලේ ගුරුවරුන්ද ඒ සම්බන්ධයෙන් කිසිදු සොයා බැලීමක් සිදු කර නොමැති බවත් පළාත් බද වාර්තාකරුවෝ පවසති.

මානව හිමිකම් කෙලෙසීමක්

ශ්‍රී ලංකාවද අනුමත කර ඇති ළමා අයිතිවාසිකම් පිළිබඳ එක්සත් ජාතීන්ගේ සම්මුතිය ප්‍රකාර පාසල තුළ විනය ආරක්ෂා කිරීමේදී ශාරීරික දඬුවම් දීමෙන් වැළකී සිටීමටත්, පාසල් විනය පරිපාලනය ළමයාගේ මානව ගරුත්වය රැකෙන ආකාරයෙන් සිදුකිරීමටත් දී ඇති නිර්දේශ පිළිබදව දිවයිනේ සියළු පාසල් දැනුවත් කිරීමේ අවශ්‍යතාව ශ්‍රී ලංකා මානව හිමිකම් කොමිෂන් සභාව විසින් පසුගිය වසරේද අධ්‍යාපන අමාත්‍යාංශය වෙත අවධාරණය කර තිබුනි.

එම මාර්ගෝපදේශ ඇතුලත් කොට අධ්‍යාපන අමාත්‍යාංශය මගින් හදුන්වා දී ඇති පාසල තුළ විනය ආරක්ෂා කිරීම සඳහා වන 12/16 චක්‍රලේඛය ගුරුවරුන්ගේ විවේකාගාරවල ප්‍රදර්ශනය කිරීමේ අවශ්‍යතාවයද එහිදි මතු විය.

පාසල් දරු දැරියන් සම්බන්ධයෙන් විනය ක්‍රියාමාර්ග ගැනීම පිළිබදව අධ්‍යාපන අමාත්‍යාංශය නිකුත් කර තිබෙන චක්‍ර ලේඛයට පටහැනිව කටයුතු සිදුකිරීම තුල පාසල් පද්ධතියට එරෙහිව බරපතල සමාජ විරෝධයක් එල්ල වී තිබෙන ආකාරය ලංකා ගුරු සංගමයේ ප්‍රධාන ලේකම් ජෝසප් ස්ටාලින් විසින්ද අවස්ථා ගණනාවකදීම පෙන්වා දී තිබේ.

සිසුන්ට දඬුවම් දෙන ගුරුවරුන්ට එරෙහිව ළමුන් කෘරත්වයට භාජනය කිරීම සහ මූලික අයිතිවාසිකම් උල්ලංඝනය කිරීම යටතේ නඩු පැවරිය හැකි බවත්, විනය ක්‍රියාමාර්ග ගත හැකි බවත් අධ්‍යාපන අමාත්‍යංශ චක්‍රලේඛයේ දැක්වේ.