ශ්‍රී ලංකාවේ 8 වන ජනාධිපතිවරයා සිය ජයග්‍රහණය උර දුන් බෞද්ධ භික්ෂුන්ට හා සිංහල ජනතාවට ස්තුතිය පළ කර තිබේ.
සිංහල ජන්ද වලින් පමණක් තමන් ජය ගන්නා බව දැන සිටි බව කී ජනාධිපති ගෝඨාභය රාජපක්ෂය ඒ සඳහා සුළු ජාතීන්ගෙන් ඉල්ලා සිටි සහයෝගය සිතු තරම් නොලැබුන බව ද කියා සිටියේය.
“සියල්ලන්නටම පෙර මා ඉතා ගෞරවයෙන් සඳහන් කරන්නට කැමැතියි, මේ මැතිවරණය ජයග්‍රහණය සඳහා වූ සුවිශේෂීම පිටුවහල වූයේ අපේ රටේ සිවු දිග වැඩවසන ගරුතර මහා සංඝරත්නය විසින් මට ලබාදුන් ආශිර්වාදය නිසා බව. මේ ජයග්‍රහණයේ ප්‍රධානතම සාධකය වන්නේ මේ රටේ බහුතර සිංහල ජනතාව බව මම මුල සිටම දැන සිටියා. සිංහල ජනතාවගේ සහායෙන් පමණක් ජනාධිපතිවරණය ජයග්‍රහණය කළ හැකිව තිබුණු බව මා දැන සිටියත් මා දමිළ හා මුස්ලිම් ජනතාවගෙන් විශේෂ ඉල්ලීමක් කළා ඔබත් ඒ ජයග්‍රහණයේ කොටස්කරුවන් වන්නට කියා. එයට ප්‍රතිචාරය නම් මා අපේක්‍ෂා කළ මට්ටමට තිබුණේ නැහැ.”
එහෙත් තමන් සියලු දෙනාගෙන ජනාධිපතිවරයා බැවින් රටේ අනාගත අභිවෘද්ධිය වෙනුවෙන් සැබෑ ශ්‍රී ලාංකිකයන් ලෙස තමන් හා එක්වන ලෙස ජනපති ගෝඨාභය රාජපක්ෂ සුළු ජාතීන්ගෙන් නැවත වරක් ඉල්ලා සිටියේ 18 සඳුදා අනුරාධපුරයේ පැවති ජනාධිපති පදවි ප්‍රප්තියෙන් පසු ජනතාව අමතමිනි.
තම ධුර කාලය තුල මෙරට තුල බෞද්ධ දර්ශනය ආරක්ෂා කොට පෝෂණය කිරීමට ඇප කැප වන ජනාධිපතිවරයා වැඩි දුරටත් කියා සිටියේය.
අද දින සිය 76 වන උපන් දිනය සමරන විපක්ෂ නායක මහින්ද රාජපක්ෂ හට සුබ පැතිමට ද ගෝඨාභය රාජපක්ෂ ජනාධිපතිවරයා අමතක නොකළේය.
Facebook Comments
