සතොස මුදල් අවභාවිත චෝදනාවට සැක පිට රක්ෂිත බන්ධනාගාර සිටි කුරුණෑගල දිස්ත්‍රික් පාර්ලිමේන්තු මන්ත්‍රී ජොන්ස්ටන් ප්‍රනාන්දු මහතා ඇතුලු සැකකරුවන් තිදෙනා නිදොස් කොට නිදහස් කර තිබේ.
හිටපු මන්ත්‍රීවරයා සමඟ ඔහුගේ පුද්ගලික ලේකම්වරයෙකු වන මොහොමඩ් සකීර් හා සතොස ආයතනයේ හිටපු සභාපති නලින් ප්‍රනාන්දු සැක පිට බන්ධනාගාර ගත කර තිබුණි.
අධි චෝදනා මත එල්ල කර ඇති චෝදනා පවත්වාගෙන යාමට නොහැකි වීම, පැමිණිල්ලේ සාක්ෂි විශ්වාසයෙන් බැහැරවීම හා සාක්ෂි පරස්පර වීම හේතුවෙන් විත්තියේ සාක්ෂි නොකැඳවන ලෙස ජොන්ස්ටන් ප්‍රනාන්දු වෙනුවෙන් පෙනී සිටි ජනාධිපති නීතීඥ කාලිංග ඉන්ද්‍රතිස්ස කුරුණෑගල මහාධිකරණයෙන් ඉල්ලා සිටියේය.
ඉදිරිපත් වු කරුණු සැලකිල්ලට ගත් මහාධිකරණ විනිසුරු මේනකා විජේසුන්දර විත්තියේ සාක්ෂි නොකැඳවා නඩුව අවසන් කරමින් සැකකරුවන් සියලු දෙනා නිදහස් කිරීමට නියෝග කළේය.
මෙම නඩුව විභාගයට ගත් මසයකට වැඩි කාලය තුල සැකකරුවන් සියලු දෙනා ඇප ලබා නොදී රක්ෂිත බන්ධනාගාර ගත කර තිබුණි.
වයඹ පළාත් සභා මැතිවරණ සමයේ 2013 ජූලි මස පලමුවැනිදා සිට සැප්තැම්බර් 30 දක්වා කාලය තුලදී සතොස සමාගමට අයත් කුරුණෑගල යන්තම්පලාව ශාඛාවෙන් භාණ්ඩ මිලදී ගෙන සාවද්‍ය පරිහරණය කිරිමේ චෝදනා මත මෙම නඩුව විභාග විය.
Facebook Comments
