මන්නාරම සමූහ මිනී වලෙන් පාදා ගත් අස්ථි කොටස් සාම්පල කාල නිර්ණය කිරීම සඳහා ෆ්ලොරිඩාවට රැගෙන යන බව සමුහ මිනි වලෙහි පරික්ෂණ කටයුතු සිදු කරන අධිකරණ වෛද්‍යවරයා පවසයි.
පැරණි සතොස ගොඩනැඟිල්ල පැවති ස්ථානයෙන් හමුවු සමූහ මිනිවල තුළ දින 86 ක කාලයක් සිදුකළ කැනීම් මගින් මිනිස් සිරුරු 180 ට අදාළ අස්ථි කොටස් මගින් මතුකරගෙන ඇති බව ද වෛද්‍ය සමින්ද රාජපක්ෂ ප්‍රකාශ කළේය.
අදාළ අස්ථි තමන්ගේ භාරය යටතේ මන්නාරම අධිකරණ සංකීර්ණයේ විශේෂිත කුටියක තැන්පත් කොට ඇති බව පවසන වෛද්‍යවරයා අස්ථි කොටස් කාබන් පරීක්ෂා කිරීම වෙනුවෙන් ෆ්ලොරීඩාවේ කාබන් පරීක්ෂණය කිරීමේ රසායනාගාරයක් වෙත රැගෙනයාමට නියමිත බව කියා සිටියේය.
“මේ සම්බන්ධ අනුමැතිය සහිත අධිකරණ නියෝගය සිකුරාදා ලැබුණා.” යි අධිකරණ වෛදවරයා සඳහන් කළේය.
මෙම පරීක්ෂන සම්බන්ධව තමන් පුද්ගලිකවම මැදිහත්වී කටයුතු කරන බවත්, චෝදනා එල්ලවිය හැකි බැවින් අස්ථි කොටස් පරීක්ෂණය සඳහා වෙනත් පාර්ශ්ව සම්බන්ධ කරගැනීමෙන් වැළකීමට තීරණය කළ බව ද අධිකරණ වෛද්‍ය නිළධාරී, විශේෂඥ වෛද්‍ය සමින්ද රාජපක්ෂ පැවසීය.
සමුහ මිනී වලෙහි ඉදිරි කටයුතු සඳහා අතුරුදහන් වූවන්ගේ කාර්යාලයෙන් ප්‍රතිපාදන ලබාදීමට ඉදිරිපත්වී තිබෙන බවත් කාබන් නිර්ණය සඳහා තෝරාගත් ආයතනයෙන් මිල ගණන් ලබා ගැනීමෙන් අනතුරුව ඉදිරි ක්‍රියා මාර්ග ගන්නා බවයි විශේෂඥ වෛද්‍යවරයා පෙන්වා දෙන්නේ.
“මහේස්ත්‍රාත්වරයා, රජයේ රස පරීක්ෂක, පොලිසිය ආදී සියලු පාර්ශ්ව සමග එක්වෙලා ස්තර කීපයකට අයත් අස්ථි කොටස් මේ සඳහා රැගෙන යන්න බලාපොරොත්තු වෙනවා.”
මේ අතර තමිල්නාඩු මහජන සංවිධාන නියෝජිතයින් පිරිසක් පසුගිය මෙම සමූහ මිනිවළ නිරීක්ෂණ කරන ලදී.
මන්නාරම මහේස්ත්‍රාත් ටී සරවනරාජාගේ නියෝගය මත අදාළ පිරිස සමූහ මිනී වළ නිරීක්ෂණය වෙනුවෙන් සහභාගි වූ ඇත.
Facebook Comments
