තීරු බදු ගෙවා ගත නොහැකිව රේගු බාරයේ තිබු බුදු පිළිම දහසක් මුදා හැරීමට ඇමැති මංගල සමරවීර රේගුවට උපදෙස් දී තිබේ.
වෙසක් පිංකමක් සඳහා ගෙන්වා ඇති බුදු පිළිම 1000ක් රුපියල් ලක්ෂ 32ක තීරුබදු ගෙවා ගත නොහැකිව රේගු භාරයේ පවතින එහෙයින් ඒවා නිදහස් කරන්නට මැදිහත්වන ලෙස සජිත් අමාත්‍යවරයා මංගල අමාත්‍යවරයාගෙන් ඉල්ලා තිබුණි.
බුදු පිළිම නිදහස් කිරීම පමාවීම සම්බන්ධවද අමාත්‍යවරයා රේගු අධ්‍යක්ෂ ජනරාල්වරයා වෙතින් විමසා ඇති අතර එහිදී රේගු අධ්‍යක්ෂ ජනරාල්වරයා සඳහන් කර ඇත්තේ බදු නිදහස් කර බුදු පිළිම නිදහස් කරන ලෙසට කිසිඳු ඉල්ලීමක් මෙතෙක් නොලැබීම හේතුවෙන් එම බුදු පිළිම නිදහස් කිරීමට හැකියාවක් නොපැවති බවයි.
විදේශයක සිට මෙරටට ගෙන්වනු ලබන සීමිත ප්‍රමාණයක් හැර ඕනෑම භාණ්ඩයක් නිදහස් කිරීමට නම් ඊට අදාළ බදු මුදල් ගෙවිය යුතු බවත් එහිදී ජාතික සංඝ සම්මේලනය හෝ වෙනත් කිසිඳු පාර්ශවයක් වෙසක් පොහෝ දා පිංකමක් බව සඳහන් කර එම පිළිම තොගය ඇප නිදහස් කරන ලෙසට ලිඛිත ඉල්ලීමක් කර නොමැති බවද රේගු අධ්‍යක්ෂකවරයා අමාත්‍ය මංගල සමරවීර වෙත දැනුම් දී තිබේ.
ඉල්ලන්න කලින් නිදහස්
කෙසේ වෙතත් පසුව මංගල සමරවීර ඇමැතිවරයා සජිත් ප්‍රේමදාස අමාත්‍යවරයා හට දන්වා ඇත්තේ තීරු බදු සහනය ලබා ගැනීම වෙනුවෙන් ලිඛිත ඉල්ලීමක් සිදුකරන ලෙස අදාළ පාර්ශව වෙත දැනුම්දෙන ලෙසයි.
එවැනි ඉල්ලීමක් නොමැතිව ශ්‍රී ලංකා රේගුවට භාණ්ඩ නිදහස් කිරීමට නීතියෙන් ඉඩක් නොමැති බව අමාත්‍ය සජිත් හට පෙන්වා දී ඇති මුදල් අමාත්‍යවරයා විෂයභාර අමාත්‍යවරයා වෙතින් අවශ්‍ය තීරු බදු සහනය නියමිත පටිපාටියට අනුව ඉල්ලා සිටියා නම් මේ වන විටත් පිළිම නිදහස් කර ඇති බවයි පෙන්වා දී ඇත්තේ.
අදාළ පාර්ශවයන්ගේ ඉල්ලීම යොමු වීමටත් පෙරම අදාළ බුදු පිළිම සියල්ල කිසිඳු ගාස්තුවකින් තොරව නිදහස් කිරීමට අමාත්‍ය මංගල සමරවීර රේගු අධ්‍යක්ෂකවරයාට දැනුම් දී ඇති බවයි රේගු ආරංචි මාර්ග පවසන්නේ.
Facebook Comments
