සිංහල සිනමාවේ රේඛාව දිවි ගමන නිම කරයි

0

සිංහල සිනමාවේ පුරෝගාමියා ලෙස හඳුන්වනු ලබන දෙස් විදෙස් කීර්තිධර සිනමාවේදී ආචාර්ය ලෙස්ටර් ජෙම්ස් පීරිස් මිය ගියේය.

කොළඹ පෞද්ගලික රෝහලකදී 29 ඉරිදා රාත්‍රියේ මිය යන විට ඔහු 99 වන වියේ පසුවිය.

චිත්‍රපට අධ්‍යක්‍ෂවරයකු, තිරකතා රචකයකු හා විත්‍රපට නිෂ්පාදකවරයකු වූ ආචාර්ය පීරිස් සිංහල සිනමාවට ලබා දුන් දායකත්වය අතිමහත්ය.

සංදේශය, ගම්පෙරළිය, දෙලොවක් අතර, රන්සළු, ගොළු හදවත, අක්කර පහ, නිධානය, දෑසනිසා, මඩොල්දූව, අහසින් පොළවට, වීර පුරන් අප්පු, බැද්දේගම, කලියුගය, යුගාන්තය, අවරගිර, වෑකන්ද වළව්ව ආදි සිනමාපට අධ්‍යක්‍ෂණය කළ අතර 2006 වසරේදී තිරගතවූ අම්මාවරුනේ සිනමාපටය ඔහු විසින් අධ්‍යක්‍ෂණය කළ අවසන් සිනමා පටයවේ.

ආචාර්ය ලෙස්ටර් ජේම්ස් පීරිස් මහතා 1975 වසරේදී ද ‘ගෝඞ් කිං’ නැමැති ඉංග්‍රීසි සිනමාපටය අධ්‍යක්‍ෂණය කළ අතර තවත් කෙටි චිත්‍රපට කිහිපයක්ද අධ්‍යක්‍ෂණය කර ඇත.

ෆැරැන්සිස් පීරිස් හා ඈන් ගෙස්ට්‍ර්යට් විනිෆ්‍රච් ජයසූරිය දාව 1919 අප්‍රේල් 9 වැනිදා දෙහිවලදී උපත ලද ලෙස්ටර් ජේම්ස් පීරිස් කොළඹ ශාන්ත පීතර විද්‍යාලයේ අධ්‍යාපනය ලබා මාධ්‍යවේදීයෙකු ලෙස සිය ප්‍රථම රැකියාව කරන ලදී.

ඔහු ප්‍රථමයෙන්ම ඬේලි නිව්ස් පුවත් පතේ අතිරේකයක් සංස්කරණය කල අතර 1939දී ඔහු ‘ටයිම්ස් ඔෆ් සිලෝන්’ පුවත්පතෙහි ෆ්‍රෑන්ක් වොරේස් යටතේ සේවය කර පසුව ශ්‍රී ලංකා ගුවන් විදුලි සංස්ථාවේ ද සේවයට එක් වී තිබේ.

1947 වසරේදි එංගලන්තයට ගොස් කලාව පිළිබඳ වැඩිදුර හැදෑරු හෙතෙම 1952 වසරේදී නැවැත ලංකාවට පැමිණ රජයේ චිත්‍රපට අංශයේ කළමනාකරුවකු වශයෙන් සේවය කළ විලී බ්ලෙක් හා ටයිටස් තොටවත්ත සමඟ එකතුවී වෘත්තාන්ත චිත්‍රපටයක් නිර්මාණය කිරීමට සූදානම් විය.

එම උත්සාහය දේශීය සිනමාවේ විප්ලවීය වෙනසක් ඇති කිරීමට සමත් වු අතර එහි ප්‍රථිඵලයක් ලෙස 1956 වසරේදී ගැමි තේමාවක් වස්තු විෂය කරගත් රේඛාව චිත්‍රපටය නිර්මාණය කළේය.

ශ්‍රී ලංකා සිනමා ඉතිහාසයේ එළිමහනේ රූගත කළ පළමු සිංහල සිනමා පටය රේඛාව චිත්‍රපටය වේ.

Facebook Comments

wedding people