පූජිත්ට හා හේමසිරිට එරෙහි නීතිපති චෝදනා පදනම් විරහිතයි

0

පාස්කු ඉරිදා ප්‍රහාර වළක්වා නොගත් බවට චෝදනා නගා රක්ෂිත බන්ධනාගාර ගත කර සිටි ආරක්ෂක අමාත්‍යංශයේ හිටපු ලේකම් හේමසිරි ප්‍රනාන්දු සහ අනිවාර්ය නිවාඩු යවා සිටින පොලිස්පති පූජිත් ජයසුන්දර ඇප මත මුදා හැරීමට අධිකරණය තීරණය කර තිබේ.

මනුෂ්‍ය ඝාතනයන්ට අදාළ චෝදනා මත අත්අඩංගුවට ගැනුණු ඔවුන් දෙදෙනා රුපියල් ලක්ෂ 5 බැගින් වූ ශරීර ඇප මත මුදා හරින ලෙස කොළඹ ප්‍රධාන මහේස්ත්‍රාත් ලංකා ජයරත්න 09 අඟහරුවාදා නියෝග කළාය.

නීතිපතිවරයා විසින් හේමසිරි ප්‍රනාන්දු සහ පූජිත් ජයසුන්දරට ගොණු කර ඇති චෝදනා පදනම් විරහිත බව මහේස්ත්‍රාත්වරිය කියා සිටියාය.

“පොලිසිය ඉල්ලා සිටින නිසා ම හෝ වෙනත් පාර්ශවයක මන දොළ සපුරාලීමට යමෙකු බන්ධනාගාරගත කළ නොහැකි,” කොළඹ ප්‍රධාන මහේස්ත්‍රාත් ලංකා ජයරත්න කියා සිටියේ හිටපු අග්‍රවිනිශ්චයකාර ශිරාණි බණ්ඩාරනායකගේ අධිකරණ වාර්තාවක් උපුටා දක්වමිනි.

හිටපු ලේකම් හේමසිරි ප්‍රනාන්දු සහ අනිවාර්ය නිවාඩු යවා සිටින පොලිස්පති පූජිත් ජයසුන්දර අත්අඩංගුවට ගෙන ඇත්තේ ඔවුන්ගේ ප්‍රකාශයක් හෝ සටහන් නොකර ගෙන බව පෙන්වා දී ඇති මහේස්ත්‍රාත්වරිය ජනාධිපතිවරයා විසින් පත් කරන ලද පරීක්ෂණ මණ්ඩලයක වාර්තාවක් නීතිමය වාර්තාවක් නොවන බවද පෙන්වා දී ඇත.

අනිවාර්ය නිවාඩු යවා සිටින පොලිස්පති පූජිත් ජයසුන්දර සහ හිටපු ආරක්ෂක ලේකම් හේමසිරි ප්‍රනාන්දු කොළඹ පිහිටි රෝහල් දෙකක ප්‍රතිකාර ලබමින් සිටියදී අත්අඩංගුවට පත්වු අතර ඔවුන් දෙදෙනා ජුලි 09 දක්වා රක්ෂිත බන්ධනාගාර ගත කර තිබුනි.

මේ අතර හිටපු ලේකම් හේමසිරි ප්‍රනාන්දු සහ අනිවාර්ය නිවාඩු යවා සිටින පොලිස්පති පූජිත් ජයසුන්දරට ඇප ලබාදෙමින් කොළඹ ප්‍රධාන මහේස්ත්‍රාත් අධිකරණය ලබාදුන් නියෝගයට එරෙහිව නීතිපතිවරයා ප්‍රතිශෝධන අයදුම්පතක් ඉදිරිපත් කිරීමට කටයුතු කරන බව නීතිපතිවරයාගේ සම්බන්ධීකරණ නිලධාරිනී රජයේ අධිනීතිඥ නිෂාරා ජයරත්න පැවසු බව මාධ්‍ය වාර්තා කළේය.

Facebook Comments

wedding people