මරණීය දණ්ඩනය ලබාදීමට තමා ගත් තීරණයට එරෙහිව අධිකරණයට යන්නේ මත්ද්‍රව්‍ය ජාවාරම්කරුවන් සහ ඔවුන්ගේ මුදලට යට වූ පිරිස් බවට ජනාධිපතිවරයා චෝදනා කර ඇත.
ජාතික ඛේදවාචකයක් බවට පත්ව ඇති මත්ද්‍රව්‍ය ජාවාරම විනාශ කිරීමට තමා නායකත්වය ගෙන සිටින විට දේශපාලන භේදයකින් තොරව රටේ ප‍්‍රබල දේශපාලනඥයන් මෙන්ම රාජ්‍ය නිලධාරින් ද මත්ද්‍රව්‍ය ජාවාරම්කරුවන් රැකීමට ඉදිරිපත්ව සිටින බව ජනපති මෛත්‍රීපාල සිරිසෙන පැවසීය.
“මත්ද්‍රව්‍ය මර්දනය කරන්න තමයි මම මරණ දණ්ඩනයට අත්සන් කළේ.මරණ දණ්ඩනයට අත්සන් කළාට පස්සේ මත්ද්‍රව්‍ය ජාවාරම්කරුවෝ කොච්චර එළියට බැහැලාද.මත්ද්‍රව්‍ය ජාවාරම්කරුවෝ තමයි උසාවි ගිහින් තියෙන්නේ.සිවිල් සංවිධාන කියලා මාධ්‍යවල කියන මේ අයව මෙහෙය වන්නේ මත්ද්‍රව්‍ය ජාවාරම්කරුවෝ.” ජනාධිපතිවරයා 06 සෙනසුරාදා රට වෙනුවෙන් එකට සිටිමු මොනරාගල දිස්ත්‍රික් වැඩසටහනේ ප්‍රගති සමාලෝචනය සහා සමාප්ති වැඩසටහන දී කියා සිටියේය.
ජනාධිපතිවරයා විසින් එල්ලුම් ගහ ක්‍රියාත්මක කිරීමට ගෙන ඇති තීරණය අත්හිටුවන ලෙස ඉල්ලා මරණීය දණ්ඩනය ලබා සිටින සිරකරුවන් කිහිප දෙනෙකු ඇතුළු පුද්ගලයින් කිහිප දෙනෙකු ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සම් ගොණු කරන ලදී.
විකල්ප ප්‍රතිපත්ති කේන්ද්‍රය, ගල්කන්දේ ධම්මානන්ද හිමි, මහාචාර්ය සී. ගුණරත්න, ආචාර්ය තාර ද මැල් සහ ආචාර්ය කේ සේනාරත්න ද එම පෙත්සම්කරුවන් අතර විය.
මරණීය දණ්ඩනය ලබා සිටින විත්තිකරුවන් අතුරින් මත්ද්‍රව්‍ය ජාවාරමට සම්බන්ධ පුද්ගලයන් පමණක් තෝරාගෙන එම දඬුවම ක්‍රියාත්මක කිරීමට ජනාධිපතිවරයා ගත් තීරණය තුළින් ආණ්ඩුක්‍රම ව්‍යවස්ථාව තුළින් සහතික කර තිබෙන නීතිය ඉදිරියේ සමාන සැලකිලි ලැබීමේ මූලික අයිතිය උල්ලංඝනය වන බවයි පෙත්සම්කරුවන් පෙන්වා දී තිබුනි.
Facebook Comments
